Karikani B'aai 28 - Kiribati New Version Bible

1Ao e wetea Iakob'a Itaaka, e kamauria, ao e taku nako ina, “Ko na aki mare ma ainen Kanaan.

2Ko na nako Metobotamia, nakon ana auti tibum are Betuera, ao karekea buum ikekei, temanna mai buakoia natin Raab'an aine.

3E bia kakab'aiaa am mare te Atua ae M'aaka man anganiko natim aika m'aiti, b'a ko aonga n riki b'a tamaia botannaomata.

4E bia kakab'aiako n arona naba ngke E kakab'aiaa Aberaam, ao ko na b'aina te aba aei, ae ko a tia ni maeka iai, ae E a tia n anga te Atua nakon Aberaam.”

5Ao e kanakoa Iakob'a Itaaka nako Metobotamia nakon Raab'an, are natin Betuera te I-Turia, ao m'anen naba Nei Rebeka are tinan Iakob'a ma Etau.

Manga karekean buun Etau temanna

6Ao e a ataia Etau b'a e a tia Aberaam ni kakab'aiaa Iakob'a, ao e kanakoa nako Metobotamia b'a e na kakaea buuna iai. Ao e ataia naba are e kakab'aiaa Itaaka, ao e tuangnga b'a e na aki iein ma ainen Kanaan.

7Ao e ataia naba b'a e ongotaeka Iakob'a iroun tamana ma tinana, ao e a tia n nako Metobotamia.

8Ao e a tib'a ataia Etau b'a ngaia e ribaia ainen Kanaan tamana are Itaaka.

9Ma ngaia are, e a nako ni kawara natin Aberaam are Itimaera, ao e iein ma natina te aine are Nei Maarata, are m'anen Neb'aiota. Miin Iakob'a i Betaera

10Ao e kitana Beerateb'a Iakob'a, ao e nako Aran.

11Ao e roko n te tabo ae tabu ngke e a b'aka taai, ao e maeka ikekei. Ao e wene b'a e nang matu, ao e uninga te atiibu.

12Ao e miia te kaintam'arake ae tei mai aon te aba nako karawa, ma taian anera aika a tam'arake, ao a ruorikaaki i aona.

13Ao e tei te UEA i rarikina, ao E taku, “Boni Ngai te UEA, are Atuan Aberaam, ao Itaaka. N na anganiko ma am kariki te aba aei ae ko wene iai.

14A na rangi ni m'aiti am kariki n ai aron m'aitin tanon aonnaba. Ao a na rababanako abaia ni wairio, ni waerake, nakoiang, ao n nakoaiaki, ao ane a na butiai botannaomata b'a N na kakab'aiaia n ai arou ngke I kakab'aiako ma am kariki.

15Uringnga b'a N na bon kakawakiniko n taabo nako ike ko nako iai, ao N na manga kaokiko nakon te aba aei. N na bon aki kitaniko ni karokoa I tia ni karaoi b'ai ni kabane ake I a tia ni berita iai.”

16Ao e uti Iakob'a, ao e taku, “E mena te UEA ikai. E mena n te tabo aei, ao I aki ataia.”

17Ao e maaku, ao e taku, “Ai kakamaaku ra te tabo aei! Bon Ana auti te Atua te tabo aei; bon te mataroa nako karawa.”

18Ao e uti m'aaka Iakob'a n te ingabong are i mwiina, ao e anaa te atiibu are e uninganna, ao e kateia b'a te kanuringa. Ao e kab'aroa b'aan te oriwa i aona ma ni katabua nakon te Atua.

19Ao e arana te tabo arei b'a “Betaera.” (Aran te kaawa aei ngkoa bon Ruti)

20Ao e karaoa ana berita Iakob'a nakon te UEA, ao e taku, “Ngkana tao Ko irai mani kaawakinai ni kawaiu aei ma n anganai te am'arake ma te kunnikai,

21ao ngkana arona b'a I okirikaaki nakon au auti ma te rau, ao Ko na riki b'a Atuau.

22E na riki te atiibu ae I kateia aei b'a te tabo i bukin taromauriakim, ao N na anganiko te katebwina ni m'akoro man au b'ai ni kabane.”