Etekiera 3 - Kiribati New Version Bible

1E taku te UEA, “Etekiera, ae natin te aomata, ngkana ko tia ni kana te niira ni boki, ao ko na nako n taetae nakoia Iteraera.”

2Ma ngaia are, I kaurea wiiu, ao e anganai te niira ni boki b'a N na kanna.

3Ao e taku, “Natin te aomata, kana te niira ni boki aei ae I anganiko; kaona birotom iai.” Ao I kanna, ao kanakina kaanga karewen ana karewe te manibeeru.

4Ao e taku te UEA:

Etekiera, I kanakoko nakoia ake oin am aomata.

5Tiaki te botannaomata ae ko babanga aia taetae, ma bon Iteraera.

6Ngke arona b'a I kanakoko nako ia aia botannaomata ianena ao a na bon ongo iroum.

7Ma ane a na rawa n ongo iroum Iteraera, i bukina b'a a rawa n ongo i Rou. A bane n taningabono ao a matoatoa atuuia,

8ma ngaia ae, N na karaoiko b'a ko na taningabono n ai aroia.

9Ko na kataua te taekina Au rongorongo n te aro ae akea te b'ai ae e na konaa ni katokiko. N na kamatoatoako kaanga te taiman, ao ko na bon aki konaa ni maaku irouia aomata aika a kainikatonga aika taani kamangao.

10Kakauongo raoi nakon b'aai ni kabane ao karaua iangoia.

11Ao i mwiina, ko na nakoia aomata ake raom n nakomai mai B'aburon ao tuangiia b'a iai te rongorongo nakoia mai Rou, Ngai ae te UEA ae te Atua. Karaoa aei, e aoria ngkana a ongora ke a aki.

12Ao e tabekai rake te Tamnei, ao I ongo rebwen te baa i akuu ngke e tabe n nako mimitongin te UEA.

13Bon te rebwe ae e riki man baiia ni kiba maan akekei ngke a boboo teaina ma teaina, ao rurungaan taian wiira ake i rarikiia.

14Ao e uotai nako te Tamnei nako kiiraroa.

Ao e niiniai m'aakan te UEA ao E kairai, ao e a rangi ni maraki nanou ao I un.

15Ao ngke I oki ma ake tekorakina ake a maeka n te Tabuki are Abib'a i rarikin te Karaanga are Keeb'ara, ao I a tekateka i buakoia inanon itiua te bong, n tiaoki n te b'ai are e a tia n riki nako iu.

Rinean Etekiera Iroun Te UEA

B'a E Na Tei N Taratara(Etekiera 33.1-9)

16E a manga taku te UEA itiua te bong i mwiin noorakin raneanean mimitongin te UEA irou:

17Etekiera ae natin te aomata, I a tia n rineiko b'a ko na teirake n taratara i bukiia Iteraera. Ma ngaia ae, ko na ongora nakon te b'ai ae I taekinna, ao i mwiina ko na taetae i buku ni kauringiia.

18Ngkana I tuangiia aomata aika a buakaka b'a a na mate i bukin aia bure, ko na kauringiia b'a a na kiitan kawaia aika a bure b'a aonga n aki katuaaeaki. Ngkana ko rawa ni karaoa anne, ao ko na bukintaeka ni mateia.

19Ma ngaia are, ngkana ko kauringiia, ao a bon teimatoa naba ni buakaka, ao a na mate i bukin aia bure, ao ngkoe akea am bure iai.

20Ngai ko na iangoia b'a aongkoa b'a a karaoa te bure aomata aika a kakaonimaki, ao I iangoia b'a N na kawenea te atiibu ni kab'akab'aka i m'ain kawaia b'a a aonga ni b'aka. A na bon riai ni mate i bukin aia bure. Ma ngaia are ngkana ko rawa ni kauringiia, ao N na m'aninga taekan taai ake a kakaonimaki iai, ao N na tauko b'a ko bukintaeka ni mateia.

21Ma ngkana ko bon kauringiia, ma a aki kan toki man karaoan te bure, ao N na kamaiuia. Ao ngkoe akea am bure iai.

Baen Newen Etekiera

22Ao e taua taekau te UEA ao E taku, “Teirake! Nakon te m'arua, ao N na taetae ma ngkoe ikekei.”

23Ao I m'ananga nakon te m'arua n te tai naba arei, ike I a noora raneanean mimitongin te UEA, n aron are I nooria naba ngkoa i rarikin te Karaanga are Keeb'ara, ao I bobaraaki ni kaboo matau ma aontano.

24E niniai Tamneina ao e kateirakeai i aon waeu. Ao i mwiina E taku te UEA:

Naako oki ni kainiko i nanon am auti!

25Ko na riai ni kabaeaki b'a ko aonga n aki otiotinako,

26ao N na karaoiko b'a ko na aki konaa n taetae ke ni kauringiia akana a kakaitaraai.

27Ma e na roko te tai are N na tuangko iai te b'ai ae ko na taekinna, ao ane ko na manga konaa n taekina Au rongorongo. Ane a na ongo tabeman, ao tabeman a na bonotaninga ma n rawa n ongo.