Taniera 8 - Kiribati New Version Bible

Mitaraeakinan te Tiibuteteei ao te Kooti.

1I noora te kauoua ni kaotioti i nanon ana katenua n ririki ni uea te uea are Beretiata i aon B'aburon,

2I a mena i nanon oon te kaawa are Tutian n te burawinti are Eram i nanon te kaotioti arei. Ao I tabe n teitei i rarikin te karaanga are Urai,

3Ao I noora te tiibu m'aane ae uaai korona aika a ab'ab'aki, ao e anaanau man boou riki korona are teaina nakon are teaina.

4I tabe n tarataraa te tiibu m'aane arei ngke e butubutu ni wairio, nakoiang, ao n nakoaiaki. Ao bon akea ae e konaa ni kaitaraa, ke ni maiu mai rouna. E karaoa are e bon taku, ao e rikirake ni kainikatonga.

5Ao ngke I tabe ni mimi b'a tera nanon te baei, ao e kaoti te kooti ae e bane birina mai maeao, e rangi ni bane birina n te aro are e a aki toko waena ma aontano. Ao iai korona teaina ae e terenako i marenan matana ake uoua.

6Ao e kanenei ni kaineta te tiibu m'aane are I nooria ngkoa n tei i rarikin te karaanga, ao e kabanea korakorana ni biri nakoina.

7Ao I mataku ngke e tabe n un ma te tiibu te m'aane. E bon rangi n un n te aro are e okianako ao e urui korona te tiibu m'aane ake uoua. Bon akea korakoran te tiibu m'aane ni kaitaraa. A b'aka nako aontano ao e toubekaaki, ao bon akea temanna ae e konaa ni kamaiua.

8Ao e rikirake ni kamoamoa te kooti arei, ao e a uruaki korona i bukini korakoran m'aakana. Ao a manga kaoti aua te koro aika a teretere raoi n onea mwiina, ao a kotoi taabo aika a kakaokoro n tatabeua nako.

9Ao e a manga kaoti te koro teuana i aon te koro teuana mai buakon kooro ake aua, ao e taona maiaki ma mainiku m'aakana ni karokoa te Aba ni Berita.

10E boni korakora n te aro are e kona ni kaaitaraa te taanga ni buaka mai karawa, ma taiani itoi, ao e kab'akaia tabem'aang nako aontano ao e toubekaia.

11Ao bon akea naba karinean mataniwiin te taanga ni buaka mai karawa i rouna, e katoka te angakarea are e katoa bong nakon te Atua, ao e uruaka te Tembora.

12Ao a tannako aomata mairoun te Atua, ao a anga ngaia nakoni m'aakan te koro arei, ao e a tewenakoaki te aro ni koaua nako aontano. E totokanikai te koro ni b'aai ni kabane ake e karaoi.

13Ao I ongo ana taeka te anera temanna ngke e titirakina raona are temanna, “A na maanra waakin b'aai aika a oti n te kaotioti aei? E na maanra ana tai te bure are e kakamaaku n onea mwiin te angakarea are e katoabong? A na maanra aia tai te taanga ni buaka mai karawa, ao te Tembora n toutouaki?”

14Ao I ongo aia kaeka anera ake tabeman ae e kaangai, “E na reitinako te aki angakarea ni karokoa uoua tengaa tenibubua te moaningabong ao te tairiki. Ao i mwiina, e a tib'a okira arona te Tembora.”

Kab'araan Nanon te Kaotioti Iroun te Anera are Kabiriera.

15I tabe ni kakaea nanon te kaotioti ngke e a ti kaoti naba temanna te aomata n tei i moau.

16Ao I ongo te b'anaa ae e weewete i aon te karaanga are Urai ae e kaangai, “Kabiriera, kab'arai nanoni kaotioti nakon teuanne.”

17Ao e roko Kabiriera n tei i rarikiu, ao I a rangi ni maaku n te aro are I a b'aka i aontano. Ao e taku nako iu, “Natin te aomata, ko na atai nanoia. Bon taiani kaotioti i bukin tokin te aonnaba.”

18Ao ngke e tabe n taetae, ao I b'aka n tong i aontano. Ma e tauai ni baina, ao e kateirakeai. Ao e taku, “N na kaoti nakoim baika a nang riki i bukin unin te Atua. E kaineti te kaotioti anne nakon tain te toki.

19ao e taku, “Te b'ai ae I kaotia nakoim bon b'aai aika a na riki i bukin unin te Atua. E nanonaki rokon te toki n te kaotioti aei.

20Te tiibu m'aane are ko nooria are iai korona aika uaai bon rab'atan te tautaeka ni Miiria ao ni Bootia.

21Te kooti bon rab'atan te tautaeka ni Kuriiti, ao te koro are e terenako i marenan matana bon te moani uea.

22Ao kooro ake aua ake a kaoti i mwiin b'akan te moani koro bon rab'atan tautaeka ake aua ake a na tib'aaki nako iai te botannaomata arei, ao e na aki roko ni korakoran te moan tautaeka.

23“Ao ngkana a uakaan tokin taian tautaeka aikai, ao ane a na rikirake n rangi ni buakaka n te aro are a na bon anganaki te rekenikai, e na kaoti te uea ae e taningabono ae e buakaka kateina ae te tia kam'ane.

24E na rikirake ni korakora, ma tiaki man oini korakorana. E na karaoa te urub'ai ae e kakamaaku, ao a kookoro bukin b'aai ake e karaoi. E na kamaunaiia aomata aika a korakora ma ake bon oin ana Aomata te Atua.

25A nanakoraoi ana m'akuri nako ni mamanibuaka, i bukina ngke bon te aomata ae te tia kam'ane ngaia. E kamoamoa i aon rab'atana, ao e tiringiia aomata n akea te katauraoi. E na boni kaitaraa naba te UEA are e korakora i aon b'aai ni kabane, ma e na bon tiringaki, tiaki ni bain te aomata.

26Ao e na boni koro bukin te kaotioti are e a tia ni kab'araaki nakoim are i bukin te tairiki ao te moaningabong. Ma ko na aki kakaotia ngkai, i bukina b'a e na bon kiriaria te tai are e na koro bukina iai.

27Ao I wene ni mamaara ma n aoraki i nanon tabeua te bong. Ao i mwiina I teirake, ao I a manga moana au m'akuri are e anganai te uea, ma e minotaki au iango n te kaotioti arei ao e aki reke nanona.