Ieremia 46 - Kiribati New Version Bible

Ana Taeka Te UEA

I bukiia Botannaomata

1E aki toki n tuangai te UEA te b'ai ae N na taekinna i bukiia botannaomata aika a kakaokoro n te aonnaba.

Ana Taeka Te UEA

I bukin Aikubita

2N ana kaaua n ririki ni uea Ieoiakim i aon Iuta, e a taenikai uean Aikubita are Neko i roun Uean B'aburon are Nebukaneta n te buaka n te kaawa are Kakemiti i rarikin te Karaanga are Iuberetiti. Ao aei are E tuangai te UEA b'a N na taekinna i bukin ana taanga ni buaka Aikubita:

3E a boo tain te nako ni buaka! Ma ngaia are, anai ami otanga,

4tokari ami aoti,

ao karaneaneai ami kainiwai.

Katokai b'arami ni buaka ao kunnikaimi ni buaka,

ao kaei nnemi.

5I konaa n noora te buaka ngkai

kam a taenikai

ao kam biri nako,

n aki manga tatanrikaaki.

E otab'aniniingkami te maaku.

6Kam marurung ao kam biri m'aaka,

ma kam aki konaa ni biri nako.

Kam b'aka n te buaka

i rarikin te Karaanga are Iuberetiti.

7Tera te botannaomata aei,

ae e teirake kaanga te Karaanga are te Naire

8Bon Aikubita ae e teirake ma te rurunga

kaanga te karaanga ae e korakora raangana

ao e taku,

“N na kaiekaa te aonnaba,

n na kamaunai taiani kaawa aika a buubura, ao n na tiringiia

kaaina ni kabane.”

9Waaki nako Aikubita ni karaoa ane ko taku.

Tuangiia am kaanibuaka ao am taan toka i aoia aoti

b'a a na buaka ni kakorakoraia.

Tuangiia am taanga ni buaka b'a a na oti nako,

ma kaain Itiobia ao kaain Ribia

aika a uouoti aia otanga,

ao kaain Ritia aika a uakainikatebe

ao kanoanikatebe.

10Ma E na tokanikai te UEA ae Moan te M'aaka

n te buaka aei

ao E na katoka nanona irouia aiana.

A na kanaki n ana kaabaang

ao ma n nimaki raraaia

ni karokoa e ngae.

Ane a na tiringaki i meaang

i rarikin te karaanga are Iuberetiti,

b'a te karea nakon te UEA.

11Aikubita, bon akea te b'atin ae ko na konaa ni marurung iai,

e aki konaa naba ni marurung n tangaurin te kun

mai Kireata.

12A a tia n ongo tangim botannaomata ni kabane;

ko b'ainrang,

ko a bon ataia.

A na b'aka am tautia nako aon te tano,

ma ni b'aka temanna i aon temanna.

Te kauring Nakon Aikubita

13E taetae te UEA nako iu, ngke e roko Uean B'aburon ni buakana Aikubita. E taku,

14“Ko na taetaekinna i nanon kaawan nako Aikubita, i Miketora, Membiti, ao Tabaneti ni kaangai:

katauraoi ni bon tei i bukimi;

b'aai ni kabane aika iroumi a na bane n uruaki n te buaka!

15I a tia ni kab'aka

antim ae e m'aaka are Abiti ma ni kakioa nako.

16A b'aka i bon irouia am tautia

temanna i aon temanna

ao a taku, “Teirake!

E na tiringiira ara kairiribai,

ti ngkana ti biri

nakon oin abara.”

17Angan uean Aikubita

arana ae e boou,

“Te Tia Taetae Ae Akea Nanona”.

18Aikubita, bon te Uea ni koaua Ngai,

te UEA Ae Moan te M'aaka,

ngkai bon iai Ngai

a na rietaata i aom

kairiribai akana a buakaniko

kaanga te Maunga are Tabora i buakon taian tabuki

ke te Maunga are Karemera i rarikin taari.

19Kam na kairaki nako b'a taenikai,

ma ngaia are, kam na booboti b'aai tabeua,

aika kam na uoti ma ngkami.

E na wene n akea kanoana ma n uruaki

atuun kaawan ami tautaeka ae Membiti.

20Ko na buakanaki irouia,

kairiribai mai meang, ngkoe ae Aikubita ae ko tamaroa,

kaanga te nango ae e tenaa te kao.

21Ane a na rairaki ni biri,

aia tautia ianena aika a kabooaki.

Ma a reke n te kabuanib'ai,

kaanga taian kao ataei aika a kamarikaaki raoi

aika a kairaki nakon te tia tiringa te tiibu.

22E na biri nako Aikubita, kaanga te naeta ae e katiiti,

ngkana a roko aia taanga ni buaka kairiribai.

A buakanna ma te tanai,

kaanga mm'aane aika a korokai

23ma ni kamaunaa te buakonikai ae e matenten

24A na kab'ainrangaki am aomata

ao a na kataenikaiaki irouia kairiribai

mai meaang.

25Bon te UEA Ngai ae Moan te M'aaka, ae Atuaia Iteraera. N na katuaea te anti are Amon are antiia kaain Teebeti ao antin Aikubita ake tabeua, uean Aikubita, ao kaain Aikubita, ao aomata aika a onimakina m'aakan Aikubita.

26N anga ngaiia nakon te Uea are Nebukaneta ma ana taanga ni buaka. Ma I bon berita b'a a na manga roko boong are a na maeka aomata i Aikubita aika a na manga maeka riki ikai, n aron are mai m'aaina. Bon aei Au taeka Ngai ae te UEA.

Kaokaia Aomata Iroun Te UEA

Nakon Mwengaia i IteraeraE taku te UEA nako iu:

27Iteraera,

Ane a na roko boong are N na kaokingkami iai nakoni mwengami

mai abaia ianena.

Ane kam na maeka ma te rau

ngkami ma ami kariki

ao akea te b'ai ae kam na maaku iai.

28Ma ngaia are, kam na aki maaku,

e ngae ngke kam riai ni

katuaaeaki ngkai

ao kam a tia ni kauamaenakoaki

i buakoia botannaomata ake tabeua.

Ma ngkana I uruaniia,

N na kaawakiningkami.

Bon aei Au taeka Ngai ae te UEA.