2.Rongorongo 11 - Kiribati New Version Bible

Kauringan Reoboam Iroun Temaia are te Burabeti(1 Uea 12.21-24)

1Ngke e a tia n okira Ierutarem Reoboam, ao e iangoia b'a e na buakana Iteraera b'a e aonga ni manga taua riki taekan te aba ni kabuta. Ma ngaia are, e bootia tebubua wanibwi te ngaa tautia man te baronga are Iuta ao Beniamin.

2I nanon te tai anne, ao e a tia te UEA n tuanga Temaia are te burabeti

3b'a e na tuanga Reoboam ao aomata ni kabane i Iuta ao Beniamin ni kaangai,

4“E kauringko te UEA b'a ko na aki nako ni buaka ni kaaitaraia barongan meang b'a bon ami koraki. Kam riai n okiri mwengami! Bon te UEA ae e kariki baikai.”

Ao a ongotaeka Reoboam ma ana taanga ni buaka nakon ana rongorongo te UEA ao a aki buakaniia Ieroboam ma ana taanga ni buaka.

Nonoakin Kaawa aika a buubura i Iuta Iroun Reoboam

5E tautaeka Reoboam mai Ierutarem, ao e onei kaawa ake a buubura tabeua i Iuta b'a taian nono b'a e aonga ni konaa ni kabonganai i bukin totokoan abana. Taiani kaawa ake a buubura akekei bon

6Betereem, Etam, Tekoa,

7Beta-Tura, Toko, Aturam,

8Kata, Maretia, Tiba,

9Atoraim, Rakiti, Ateka,

10Tora, Aiiaron, ao Eberon. Ngke e a tia n nonoi taiani kaawa aika a buubura aikai n te aba are Iuta ao Beniamin,

11ao e a anganiia mataniwin nako taian taanga ni buaka tib'angaia n tatabemaniia nako taiani kaawa akekei n tatabeua nako ao e kaoni n taian am'arake, b'aan te oriwa, ao te wain,

12ao ai uana naba n taian otanga ao kainiwai. E kabonganai taian kaawa aika a buubura aika a nonoaki aikai i bukin tararuaan Iuta ma Beniamin.

Boutokaan Reoboam irouia Ibonga ma Kanoan Rewi

13Ao a anga aia boutokaa ibonga ma kanoan Rewi man te baronga are Iteraera meang nakon Reoboam.

14A m'aiti kanoan Rewi ake a kiitan aia kaawa ma aia tabo n uteute i aon Iteraera ma ni m'aing nako Ierutarem ao kaawa tabeua ake i Iuta i bukina ngke a aki kariaia Ieroboam ao uean Iteraera ake imwina b'a a na m'akuri kanoan Rewi b'a taiani ibonga.

15E a manga bon karekeia ana ibonga Ieroboam b'a taani m'akuri n taiani baangota ake baangotan te aba i Iteraera ao n taabo n taromauri ake e a tia ni kateaki iai bouanantin te kooti are te anti ao taian kao ataei.

16Ma a tangiria n taromauria te UEA ae te Atua tabeman Iteraera, n aron are a tia ni karaoia aia bakatibu. Ma ngaia are, a iriia ibonga ao kanoan Rewi nako Ierutarem, ike a konaa iai n anga taiani karea nakon te UEA.

17I mwiin tenua riki te ririki, a maeka i Iuta ao a kakaonimaki nakon Reoboam ma abanueana n aron kakaonimakiia ngkoa nakon Tawita ao Toromon.

Ana Utu Reoboam

18Ao e mare Reoboam ma Nei Maarata, are natin Ierimota te aine, Ierimota are natin Tawita te m'aane, ao tinana bon Nei Abiaira are natin Eriaba te aine ao tibun Iete te ataeinaine.

19Bon iai natiia Reoboam ma Nei Maarata aika teniman m'aane: Ieuti, Temaria, ao Taam.

20Ao e a manga mare Reoboam ma Nei Maaka are natin Abetarom te aine. Ao natiia m'aane bon Abiia, Atai, Tita, ao Teromita.

21Bon tengaun ma waniman m'aitin buun Reoboam ma e a manga mare riki ma onongaun aine, ao bon tamaia uangaun ma waniman naati m'aane, ao onongaun naati aine, ma e tangira riki buuna are Nei Maaka Reoboam,

22ma ngaia are, e rinea aia karimoa te m'aane are Abiia b'a te uea i mwiina.

23E wanawana Reoboam ngke e kamanenaia natina m'aane b'a a na tararuai kaawa ake a nonoaki n tatabeua nako i nanon abanueana. E anganiia ni b'aai ni kabane ake a tangiri ao e karekei buuia n tatabemaniia nako.