Tekaria 10 - Kiribati New Version Bible

Boong Aika A Na Roko Aika A Tamaroa I bukin Iuta Ao Iteraera

1Boni Ngai ae te UEA are

I kanakoi nangin te buaka

ao maatim ni karau

b'a a aonga ni kariki uaa taian tawaana.

Ma ngaia are, ngkana a kainanoa te karau taian uita

kam na riai n tataro nako iu.

2Kam aki konaa n onimakini taian bouananti

ma taani kaiwa,

ke ni mwiokoa te kaantaninga

ae kam karekea mairouia taan tabunea

ma taani kab'ara mii.

Ma kam a tia ni katai baikai ni kabane,

ao kam a riki ngkai b'a kaanga taian tiibu

aika akea te tia kaawakiniia.

3I rangi n un Ngai

ae te UEA ae Moan te M'aaka

iroumi ngkami aika taani kairiiri

ao N na katuaaingkami.

I tararuaia Au aomata,

ae te botannaomata ae Iuta,

ao N na bita

te nanai n tiibu aei

nakon te taanga ni buaka aika toka i aoia aoti.

4A na nako taani kairiiri man te nanai aei

aika a korakora

n ai aron atiibun te koona ao biinin te autinrianna

ao b'aini buaka.

5A na ira te buaka,

ao a na kaai naba ni kamanatuaia

aia kairiribai kaanga te bokaboka.

A na buaka,

i bukina ngkai N na

tei n aia itera Ngai ae te UEA.

Ao a na kamanatua

aia taanga ni buaka aia kairiribai ake taani buaka mai aoia aoti.

6N na kakorakoraa

te abanuea are Iuta

ao Iteraera.

Ao N na kaota te akoi

i bukina b'a bon te UEA Ngai

ae Atuaia.

N na kaekai aia tataro

ma ni kaokiia nakon mwengaia.

Ao e na taraa n ae

I tuai man katinanikuia.

7E na riki Iteraerab'a kaanga

baronga ni buaka

aika a karaoa aia bootaki ni kukurei n te wain.

Ngkana a noora aei natiia,

a na bon rangi ni kukurei naba

ibuku Ngai ae te UEA.

8N na anga te kanikina

nakoia b'a a na roko n ikotaki

i bukina ngkai I a tia ni kamaiuia.

Ao a na m'aiti aia koraki

nakon are mai m'aaina.

9E ngae ngke I kamaaenakoia Au aomata

nakon aaba aika a raroa nako,

a na aki m'aninga taekau.

A na manga oki natiia

ngkana a ikawai

10N na kaokiia nakon mwengaia

mai Aikubita ao Aturia,

ao N na katekatekaia

ni karokoa Kireata ma Reb'anon,

ni karokoa e onrake te aba

irouia.

11A na ri nanon

marawan taiani kangaanga Au aomata,

ma N na katoki korakoran taian nao

ma ni kam'autakatakaa m'akoron

te Naire are e rangi n nano.

E na kab'akaaki

kakatongan Aturia are e rangi ni korakora,

ao e na mauna nako

korakoran Aikubita.

12N na kakorakoraia Au aomata

i bukina ngkai bon te UEA Ngai,

ao a na irai.

Bon aei Au taeka Ngai ae te UEA!