Etekiera 27 - Kiribati New Version Bible

Te Kuna Ni Mate I bukin Turo

1E taku te UEA:

2Etekiera ae natin te aomata, ko na anenea te kuna ni mate i bukin Turo,

3te kaawa are e kateaki i rarikin taari i bukin te kaboob'ai ma botannaomata ake a mena i mataniwiin taari. Ko na tuangiia kaain Turo aei te rongorongo mairou:

Turo, ko kainikatonga i bukin

nakoraoin tamaroam,

4ao arom n taua aron taari.

Bon te kaibuke ngkoe

ae e kabaaki raoi.

5A kabonganaa te kai are te tiira taani kaba

man te Maunga are Oman

ni karaoi iai taian kairababa

tiiran Reb'anon

i bukin karaoan taian aneang.

6A karaoaki okeni Batian

b'a taian bwe,

a koreaki m'aiangon Kubero

i bukin aon te eke,

are e a manga katamaroaaki

ao ni kamawawaaki ni koron te ereb'anti.

7A kamanenai taian rinen aika tamaroa taani kateitei

mai Aikubita i bukin taian ie,

b'a aonga ni konaa aomata nako n nooringkami.

E kabonganaaki te kunnikai ae e buru ma ae e beebo

i bukin kanuuan te teeke.

8A bweenarina

mm'aanen Titon ma Arewata

ao a mm'aane ake a rangi ni m'aatai n te m'akuri

bon taiani kaaben.

9A karaoa te onob'ai

mm'aanen Keeb'ara aika a rabakau.

A bane kaimoa man taabo nako

ni boob'ai n am titoa nako

ake n am matabaiawa.

10A kaaina am taanga ni buaka i taari

tautian Bootia,

Ruuta, ao Buta aika a ninikoria,

ni kaawakiniko n taian otanga

ma taian b'ara ni buaka,

ma ni karikiko b'a te aomata ae e kakannato.

11A roko am taan tei

mai Arewata ao Tiritia,

ao a taratara man taua nako

m'anen Kammata.

A katinei aia b'ai ni buaka

i aon am oo nako,

ao e rangi n tikiraoi.

12A iokinib'aia te tirewa, te biti, te tiin, ao te buange b'a am b'ai ni bob'ai nako ia taani bob'ai mai Taretiti maiaki.

13A iokinib'ai taian toro ao b'aai aika a karaoaki n te buraati kaain Kuriiti, kaain Tubara ao kaain Meketo,

14ao kaain Beta Tokarema a iokinib'ai taian aoti, ao taian miure.

15Ko bon karikirake naba ma kaain Roteti, ao aomata mani botannaomata ake a mena i mataniwiin taari a anganiko koron te ereb'anti ma kaai aika ebone b'a boon am b'ai ni kaboob'ai.

16Etom e iokinib'aia te b'ai ni katamaroa te atibu ae kiriin, te kunnikai ae e beebo, te kunnikai ae e manimaniaki, te rinen ae e tamaroa, te ane, ao taian ruube.

17E anganiko Iuta ma Iteraera aia kabanea n raoiroi n uita, ao kabanean raoiroin aia biiku, ana karewe te manibeeru, b'aan te oriwa, ao kaboiararaan te am'arake b'a boon am b'ai ni kaboob'ai.

18A noora te b'ai ae ko ana anga kaain Tamateko ao n uoti nakoim wain mai Erebon ao buraen te tiibu ma Taara.

19A iokinib'aia te biti ma kaboiararaan te am'arake I-Wetan ao I-Iawan ake i rarikin Utara.

20A kaakanakoi nakoim te kaintekateka i aon te aoti aika taiani burangketi kaain Tetan,

21ao kaain Arabia ao taan tautaeka i Keta a iokinib'aia taian tiibuteteei, taian tiibu, ao taiani kooti.

22A kaakanakoi nakoim b'aini kaboiararaan te am'arake aika a tamaroa, atiibu aika a kakaawaki, ao taiani koora b'a boon am b'ai ni kaboob'ai.

23Ko bon karikirake naba ma taan kabob'ai man kaawa aika Aran, Kanne, Eten, Tieba, Atura, ao Kiremata,

24ao a anganiko kunnikai aika a boobuaka, kunnikai aika a manimaniaki aika a beebo, b'ai n taewae, ao te roobu ae e matoatoa.

25A uotaki aia b'ai ni kaboob'ai n taian kaibuke aika korakora nakon taabo nako akana a kan nako iai.

Ti te bo ngkoe ma te kaibuke

ae e onrake n taiani kaakoo aika a rawaawata

26ao e borau i nanoni marawa,

ma ko taerake

n te angmainiku ae e nene.

27A bane ni bua b'aai ni kabane ake a toka iai

am kaako aika a kakaawaki,

am kaimoa ma am taani kateitei,

taan iokinib'ai ao tautia.

28E na ongo te aba takaaruaia am kaimoa aika a b'ab'a

mai aon mataniwiin taari.

29A na bane ni kiitanaki taiani kaibuke;

a na tei i mataniwiin taari

taan bwenarina ao kaimoa ao taiani kaaben,

30ma n tang n nanoangaiko.

A na kaoti nanokawaakiia n taun atuiia n te baareka

ao n rabinobino i nanon taiani mannang;

31a koromaraia

ao a kunnikainiia n te kunnikai ae e mangaingai

ngke a tabe n tang ni korakai.

32A anenea te kuna ni mate ae e kaangai

i nanon aia tai n rawaawata:

“Turo, ko korakora riki nakon

taiani kaawa nako.

Ma ko a wene ngkai n aki kakarongoa

i kabin marawa.

33“A kukurei botannaomata ake a reke irouia

am b'ai ni kaboob'ai;

a rikirake ni kaub'ai taiani uea

n taabo nako n am b'ai ni kaboob'ai aika a kakaawaki.

34Ma ko a inako

i kabin marawa,

ma am kaako ao am kaimoa

aika a uamaaenako.

35A bane ni miimi aomata nako

ake a maeka i mataniwiin taari

n te rongorongo aei.

A maaku aia taan tautaeka,

ao e korobokiaki te maaku

i aon ubuia.

36A aki konaa ni kakoauaa taan iokinib'ai nako n te aonnaba

n te b'ai ae a tia n riki.

E kakamaaku matem,

ao ko a nako n aki manga oki.”