Ieremia 42 - Kiribati New Version Bible

1Ao a bane n roko nako iu Ioanan, Ietania, aobitian te taanga ni buaka ake tekorakina, ao aomata ni kabane ake n te m'akoro.

2ao a taku, “Ti butiiko b'a ko na tataro i bukira nakon te UEA ae Atuam. A rangi ni m'aiti ngkoa kaain Iuta, ma n aron ae ko konaa n nooria ngkai ai ti tabeman ngkai nikirara.

3Buubutia te UEA b'a E na tuangiira b'a ia ae E tangirira b'a ti na nako iai ao tera te b'ai ae E tangiria b'a ti na karaoia.”

4Ao I taku, “E tamaroa, N na tataro nakon te UEA ae Atuami, ao N na manga tuangkami te b'ai are E taekinna.”

5Ao a bane ni kaeka ni kaangai, “E na bon riki te UEA b'a ara tia kakoaua b'a ti a tia ni berita b'a ti na karaoi b'aai ni kabane ake E taekinna,

6e ngae ngkana te b'ai ae ti aki tangiria ni karaoia. Ti na ongotaeka i roun te UEA b'a a aonga n nakoraoi b'aai ni kabane nakoira.”

7Tebwiina te bong i mwiina, ao E anganai te kaeka te UEA i bukin

8Ioanan, aobitia, ao aomata ake tabeman. Ma ngaia are, I weteia ni bootia

9ao I tuangiia te b'ai are E taekinna te UEA ae Atuaia Iteraera ae e kaangai:

Kam buubutia Ieremia ao e reke iroumi te b'ai ae kam riai ni karaoia.

10I kab'araa Au bure ngke I a tia ni katuaaingkami, ma ngaia are, I tuangkami ngkai b'a kam na tiku ikai i Iuta, ike N na unikingkami ma ni karikirakeingkami iai, n onea mwiin are N na bwenauaingkami ni kab'akaingkami ao n na kouwakaaingkami.

11Kam na aki maaka Uean B'aburon. N na kamanoingkami mai rouna,

12N na kairoroa b'a e na nanoangaingkami ma ni kaoki ami tabo n ununiki.

13Ma ane kam na teimatoa n atonga ae e kaangai, “Ti na aki tiku i Iuta ikai, ao ti na aki ongotaeka nakon te UEA ae Atuara.

14Ti na nako Aikubita, ike e m'aiti iai te am'arake ao akea naba te bubuaka iai.”

15Kaain Iuta, kam maiu ngke e buakaningkami ana taanga ni buaka B'aburon. ‘Ao ngkai kam a manga iangoia b'a kam na m'aing nako Aikubita, ao ngkana kam nako, ao bon aei te b'ai ae na riki.

16Ane e na roko iroumi maakan te buaka, ao e na iriiringkami maakakin te mate ni baki, ao kam na mate i Aikubita.

17A na bane ni mate n te buaka ke te baki ke te aoraki koraki akana a iangoa te nako Aikubita ni maeka iai. Bon akea nikiraia ae e na tiku ni maiu, ao akea naba ae e na reke birinakona man te kabuanib'ai are N nang karokoa i aoia.’

18I un Ngai ae te UEA irouia kaain Ierutarem ao I katuaaia. Ngkana kam nako Aikubita, ao N na bon un ao N na katuaaingkami n te aro naba anne. Kam na bon aki manga noora abami. Ane a na maaku aomata n te b'ai ae N nang karaoia nako imi, ao ane a na kabonganaa aran ami kaawa ae e buubura aei b'a te taeka ni kamaraia.

Ana Taeka Ni Kauring Ieremia

19Ao I tuangiia aomata ni kaangai:

E reke birinakomi man te kabuanib'ai are e oreaki iai Iuta, ma n te tai aei, E kauringkami te UEA b'a kam na kararoaingkami mai Aikubita.

20Kam buubutiai b'a N na tataro ma ni karekea nanon te UEA ae Atuara b'a tera ae e tangiria b'a ti na karaoia, ao kam berita b'a kam na ongotaeka i Rouna. Ma bon te bure ae e moan te kakamaaku te b'ai anne,

21i bukina b'a I a tia n anganingkami Ana kaeka te UEA, ao kam rawa n ongo i Rouna.

22Ma ngaia ae, kam na mate i Aikubita n te buaka, te baki, ke te aoraki.