2.Uea 21 - Kiribati New Version Bible

Uean Iuta are Manate(2 Rongo 33.1-20)

1Ai tib'a uabwi ana ririki ni maiu Manate ngke e a uea i aon Iuta, ao e tautaeka i nanon 55 te ririki mai Ierutarem. Tinana bon Nei Ebetiba.

2E aki ongotaeka Manate iroun te UEA ngke e katotongi katei aika buakaka ake kateia te botannaomata ake a kanakoaki iroun te UEA mai Iteraera.

3E a manga katei taian bouananti ake e a tia tamana are Etekia n urui. E a manga karaoa te baonikarea i bukini Baara ao e katea naba te boua ae e tabu i bukin taromaurian te anti are Nei Aatera, n aron are e a tia ni karaoia ngkoa uean Iteraera are Aaba. Ao e kakaonimaki n taromauria itoini karawa.

4I nanon te Tembora ike E riai n taromauriaki iai ti te UEA, ao e katea naba iai taiani baonikarean i bukiia antiia beekan,

5ao i bukin taian itoi te uea are Manate. E kamenaki taian baonikarea aikai i nanon m'aaken te Tembora,

6ao e boni katea naba te boua ae Nei Aatera ikekei. E kakaraoa te m'akuri n tabunea, ma ni kan riki b'a te tia tabunea;

7e titirakiniia taani kaiwa arona ae e na karaoia ao e anga natina te m'aane b'a ana karea. E karaoi b'aai aika a rangi ni kam'araa, are e a rangi ni kauna iai te UEA.

N ririki ake ngkoa ao E taku te UEA nakon Tawita ma natina te m'aane are Toromon I tangira riki Ierutarem nakon taabo ni bane i aon Iteraera. Bon Au b'ai, ao N na riai n taromauriaki iai n taai nako.

8Ngkana a na ongotaeka ma te kakaonimaki au Aomata nakon kaetieti ni kabane ake n ana tua au toro are Moote, ao N na bon aki kanakoia man te aba are I anganiia aia bakatibu.

9Ma a aki ongotaeka kaain Iuta nakon te UEA. A ongo iroun Manate, ao a karaoi riki b'aai aika a kam'araa nakoia botannaomata ake E a tia te UEA ni kanakoia.

10E taku te UEA n te bong teuana nakoia ana burabeti:

11E a tia te uea are Manate ni karaoi riki b'aai aika a kam'araa riki nakoia kaain Amora, ao e a tia ni karekeia au Aomata n te bure ngke e kairoroia b'a a na taromauria ana bouananti.

12Ma ngaia ae ngkai, N nang kamaunaa Ierutarem ma Iuta Ngaia ae te UEA ae Atuan Iteraera. A na ongo rongorongona aomata ao a na aki kakoaua.

13E a rangi buakaka Ierutarem n aron Aaba ma kaain Taamaria. Ma ngaia are, N na kamaunaa Ierutarem ma ni katiaa taekana, n ai aron temanna ae e taea nako te ran mai nanon te raurau b'a e na m'au.

14Ao N na bon kamaunaiia naba au Aomata ake nikira ni maiu. A na konaaki ma ni iraeaki irouia aia kairiribai.

15A tia ni karaoi b'aai aika I ribai au Aomata ao a bon teimatoa naba ni kamaraka nanou ni moa man te tai are a kiitana iai Aikubita aia bakatibu.

16E bure Manate ngkai e karekeia kaain Iuta n te bure ao te aki ongotaeka nakon te UEA. E rawa naba ni kamaiuia aomata aika akea aia bure. A m'aiti aika bon akea aia bure ake e kariaia naba tiringakiia, ao e a on kawain nanon Ierutarem raraaia.

17A tauaki rongorongon b'aai ni kabane ake e karaoi Manate i nanon ana tai ni uea n ikotaki ma ana bure aika a rangi korakora n te boki are Rongorongoia Uean Iuta.

18E mate ao e taunaki n te Nnenaroka i Iuta i rarikin ana bareti, ao e a manga uea natina te m'aane are Amon.

Uean Iuta are Amon

19Ai tib'a 22 ana ririki ni maiu Amon ngke e uea i aon Iuta, ao e tautaeka mai Ierutarem i nanon uoua te ririki. Tinana bon Nei Meturemeta are natin Aruti te aine are kaain Iotiba.

20E aki ongotaeka Amon nakon te UEA n aron are e a tia ni karaoia tamana are Manate.

21E tataromauri taian bouananti Amon ake e katei ngkoa tamana are Manate ao

22e aki kani kakaonimaki nakon te UEA, te Atua are a tataromauria ana bakatibu.

23E kam'aneaki irouia ana mataniwi tabeman, ao a tiringnga n ana bareti.

24E taunaki n te Nnenaroka i Uta.

25E aki maan i mwiin anne, ao a manga tiringaki koraki ake a tiringa Amon irouia kaain Iuta, ao a manga kauea natina te m'aane are Iotia.

26A tauaki rongorongon b'aai ni kabane ake e karaoi Amon i nanon ana tai ni uea n te boki are Rongorongoia Uean Iuta.