Mika 1 - Kiribati New Version Bible

1E roko Ana taeka te UEA aika taekan kaawa aika Tamaria ao Ierutarem iroun Mika, are kaain te kaawa are Moroteta i nanon aia tai ni uea Iotam, Aati, ma Etekia i aon Iuta.

Te Tanginiwenei i bukin Tamaria ma Ierutarem.

2Ongora ngkami aika botannaomata nako;

kakauongo ngkami aika kam maeka n te aonnaba;

e na kaoti arom nako aika a buakaka te UEA.

Kakauongo! E taetae man ana Tembora are i karawa.

3Nooria, E a roko Te UEA man Ana tabo are e tabu;

E na ruorikaaki n nakonako i aon taubukin maunga.

4A na rannako maunga i aani waena

n ai aron te nenea n te ai;

a na raanga rikaaki nako nanon m'arua,

n ai aron raan aika a raanga i raabeen tabuki.

5A riki baikai i bukina ngkai a tia ni bure, ao n aki ongotaeka Iteraera nakon te Atua. Tiaki bon Tamaria ae e riai ni bukinaki i bukin ana aki ongeaba Iteraera, ngkai boni ngaia te kaawa ae atuun Iteraera? Antai ae e na bukinaki n ana bure Ierutarem ngkai boni ngaia te kaawa ae atuun Iuta?

6Ma ngaia are, e taku Te UEA, “N na karika Tamaria b'a te tabo ae e uruaki ae akea kaaina, ao e na riki b'a te tabo ae a unikaki iai aroka aika kureebe. N na karenakoi m'akorokoron atiibuna nako nanon te m'arua. Ao N na uruaki naba aana.

7A na bane ana bouannanti aika a boobuaka ni maerikiriki. A na bane ni bue n te ai b'aai ni kabane ake a anganaki ainen matawaan te tembora. Ao a na riki aia bouannanti b'a b'ariko ni maange. E karaoi baikai b'a kanoan waakin ana taromauri. E karekei baika a tamaroa man te wenenibure n te tembora n ana taromauri. Ma ngkai, a na manga roko ana kairiribai n uotii nako baikai, b'a aia b'ai ni wenenibure n te tembora i bukin kanoan waakin aia taromauri.

8E taku Mika, “N na tanginiwenei ma ni b'aeb'aeti i bukin aei. N na nakonako n aki kaunai, ao N na aki kunnikainai b'a kaotan rawawatan nanou. N na tang n nanokawaki n ai aron te tanguoua.

9Akea te b'ainaoraki i bukin ikoakin Tamaria, ao e nangi manga riki naba ae ai aron aei nakoim Iuta. E a roko te urub'ai ae e korakora ni mataroan Ierutarem are atuun kaawan te tautaeka irouia au aomata.”

A Roko Kairiribai i Ierutarem.

10Tai kaongoia ara kairiribai ake i Kaata konaakira, ao tai tanginiwenei i mataia. Kam na kaoti nanokawakimi n takaerere n tang i aon tano ngkami aika aomatan Beta Reabera,

11Kam na b'aib'ainrang ngkami aika kaain Tabira, b'a kam na kairaki nako b'a taenikai, ao akea karabaami. Kam na aki kataia n otinako man nonon ami kaawa kaain Taanan. Ngkana kam ongo tanginiweneia kaain Beta-Etera, ao kam na ataia iai b'a akea te tabo ae kam na mauri iai.

12A ingainga n tataningaa kamaiuaia kaain Marota, i bukina b'a E a tia te UEA ni karokoia kairiribai ni kaania mataroan nonon Ierutarem.

13Kabaei ami kaa ma ami aoti ao tauraoi ni birinako ngkami ake kam maeka i Rakiti. Kam na manga karaoa naba te bure are e boni karaoia naba ngkoa Iteraera, ao e a iraraang nako Ierutarem iroum.

14Ao ngkai kam nang atonga tia boo nakon te kaawa ae Moroteta Kate ngkami aika kaain Iuta, ao ane e na bon aki reke buokaia uean Iteraera man te kaawa ae Aketib'a.

15E na karokoia kairiribai te UEA iroumi b'a a na taua ami kaawa ngkami aika kaain Maretia. A na nako ni karabaia taani kairiiri aika a kakannato mai Iteraera n te nangananga ni b'aa are i Aruram.

16A nang uotaki nako am ataei aika ko tangiriia ngkoe ae Iuta, b'a taenikai nakon aaba ianena. Ma ngaia are, ko na korea iran atuum ni kamaraa b'a kaotan rawawatam.