Iobi 42 - Kiribati New Version Bible

Ana Kaeka Iobi nakon te UEA.Bon Akea ae Kona ni Kaitarako

1Ao e kaeka Iobi nakon te UEA,

2I ataia te UEA b'a Ko bon rangi ni m'aaka

n te aro are Ko boni karaoi b'aai ni kabane ake Ko tangiri ni kan karaoi.

3Ko titiraki b'a I kangaa n aki onimakina rabakaum

ngke bon te nanobaba Ngai.

I taekini b'aai aika I aki atai aroia,

b'aai aika a rangi ni kamimii i Rou, aika I aki kona n atai aroia.

4Ko tuangai b'a N na kakauongo ngke Ko tabe n taetae

ao N na kataia ni kaekai am titiraki.

5Ngkoa, I ti atai baika I kaongoaki mai rouia aomata tabem'aang i bukim,

ma ngkai, I a tia n nooriko ni matau.

6Ma ngaia are, I mamaa ni b'aai ake I a tia n taekin,

ao I raira nanou ma te rawawatau ao te nanomaraki ae korakora.

E kaeti Aroia Raoraon Iobi te UEA

7Ao i mwiin banen Ana taetae te Atua nakon Iobi, ao E taku nakon Eribati, “E maraki nanou i roum ma raoraom ake uoman, i bukina b'a kam aki taekina te koaua i buku n aron are e karaoia naba Iobi.

8Anai itiman te kaom'aane ngkai, ao itiman naba te tiibu m'aane nakon Iobi, ao anga b'a te karea bon i bukimi, ao N na kaeka ana tataro, b'a I aonga n aki butim'aei ngkami n te b'ai ae kam a tia ni karaoi. Kam aki taekina te koaua i buku n aron are e a tia ni karaoia.”

9Ao Eribati, Biretata, ao Toob'a, a karaoa te b'ai are E tuangiia te UEA, ao E kaeka ana tataro Iobi te UEA.

10Ao i mwiin ana tataro Iobi i bukiia raoraona ake teniman, ao E a manga kakab'aia Iobi te UEA, ao E a manga anganna uoua te tai okiokin ana b'ai ake mai m'aaina.

11Ao a bane n roko tarin Iobi ma m'anena ni kawaria n am'arake ni kukurei ma ngaia n ana auti. A kaota reitakiia n te rawawata, ma ni kabebetea i bukin taiani kangaanga ake E karokoi te UEA i aona. Ao Ngaiia n tatabemaniia nako, a anganna tabeua te m'ane, ao te m'am'a te koora.

12Ao E kakab'aia nikirani maiun Iobi te UEA nakon bongin maiuna are rimoa. Ao E b'aini 10,000 te tiibu Iobi, ma 6,000 te kamero, ma 2,000 te kao, ao 1,000 te aati.

13Ao e a manga reke natina aika itiman m'aane, ao teniman aine.

14E arana natina te aine are te karimoa b'a, Iemim'a, te kauoman b'a Ketia, ao te bina b'a Kirenabuka.

15Ao bon akea te aine temanna n te aonnaba ae botonaine riki nako ia natin Iobi. Ao Iobi e karikiia b'a taan b'aib'ai n ana b'ai i rarikiia m'aneia.

16Ao e maiu Iobi 140 te ririki i mwiin aei. E kauiaia tibuna Iobi, ma tibutoruna

17ao i mwiina, e a mate ngke e a bon rangi ni kara.