1Kam na neboa te UEA!
Kam na neboa arana, ngkami akana ana toro te UEA,
2Akana kam tei n ana auti te UEA,
n ana Tembora Atuara.
3Kam na neboa te UEA, b'a E raoiroi;
anene n neboa arana, b'a E akoi.
4E rinea Iakob'a bon i bukina,
te botannaomata ae Iteraera b'a oin ana b'ai.
5I ataia b'a E kakannato te UEA,
E kakannato riki nakoia anti ni kabaneia.
6E karaoa are kukurei iai
i karawa ao i aon te aba,
i marawa ao n taabo aika nano i kabini marawa.
7E karoko nangini karau mai tabon aonnaba;
E karaoa te iti b'a raon te karau,
Ao E kaotinakoa te ang mani nen ana b'ai.
8E tiringiia karimoa ake natiia aomata
ma maan i Aikubita.
9E karaoi taiani kakai ma baika kamimii
b'a b'aini karekeani kain aia uea ma raona ake a buokia n ana tautaeka.
10E tiringiia botannaomata aika bati,
ao E kamateia uea aika korakora:
11Are Taion, are aia uea taian Amoraite,
ma Oka are ueani Batian,
ma uea ni kabane ake ueani Kanaan.
12E anga nako abaia nakoia ana botannaomata
ao n anganiia Iteraera.
13Te UEA, e na tai toki tataekinam b'a te Atua Ngkoe;
A na bane rooro nako n ururingko.
14E na kaeti taekaia ana botannaomata te UEA;
E na nanoangaiia ana toro.
15A karaoaki atuaia botannaomata n taian tirewa ma koora;
A karaoaki ni baiia aomata.
16Iai wiia, ma a aki kona n taetae;
ao iai mataia, ma a aki noraba.
17Iai taningaia, ma a aki kona n ongo;
a aki kona naba n ikeike.
18A bia riki n ai aroia bouananti aomata akana
karaoi bouananti akanne ma n onimakin.
19Ngkami te botannaomata ae Iteraera, kam na neboa te UEA;
Kam na neboia, ngkami akana ana ibonga te Atua!
20Ngkami te bootaki n aomata ae Rewi, kam na neboa te UEA;
Kam na neboia, ngkami akana taan taromauriia ni kabane!
21Kam na neboa te UEA i Tion,
i Ierutarem are mwengana.
Kam na neboa te UEA!
Who We AreWhat We EelieveWhat We Do
2025 by iamachristian.org,Inc All rights reserved.
