1Tai kabonoa nanom irouia taani bure;
Tai bakantang irouia akana karaoa ae buakaka.
2Ane a na waekoa ni mate n ai aron
te uteute ke te aroka ae aki tetebokaki.
3Onimakina te UEA, ao karaoa ae raoiroi;
Ko na maeka ma te rau raoi i aon te aba.
4Karaoa ae E tangiria te UEA,
Ao E na anganiko te b'ai
ae e tangiria nanom.
5Kaki taekam i nanoni bain te UEA;
Onimakinna ao E na buokiko.
6E na kaota raoi koauan ae akea am bure,
kanga ai aron itiakin
ootan taai n te tawanou.
7Taotaona nanom ao kaantaninga te UEA;
Tai kabonoa nanom irouia
akana rikirake kab'aiaia,
Ke irouia akana kokoro bukin aia iango nako aika bubuaka.
8Tai bono n nano ke n un;
B'a e kona ni kairiko nakon karaoan ae buakaka.
9A na abana te aba akana onimakina te UEA;
ma a na kakioaki nako akana buakaka.
10E na aki rangi ni maan ao a na mauna mataia akana buakaka;
ae ko na kakaeia ma ko na bon aki kona ni kuneia;
11ma a na abana te aba akana aki kainikatonga,
ao a na kim'areirei b'a a kab'aia ma n rau.
12E iangoaki kam'aruaan te aomata ae e raoiroi iroun ane buakaka;
ao e kangengei wina nakoina.
13Ma E ngareakiniia akana buakaka te UEA;
b'a E ataa ae a nang kamaunaki.
14A buuti aia kabaang aomata akana buakaka, ao a tauraoi ni kanakoi kanoan aia kainikatebe,
b'a a na kamateia akana akea aia b'ai ma akana a kai nanoia;
Ao a na tiringiia akana raraoi aroia
15Ma ane a na boni mate n oin aia kabaang;
Ao ane a na m'aototo aia kainikatebe.
16E raoiroi riki te b'ai ae ti teutana, ae ana b'ai te aomata ae e raoiroi,
nakon te kaub'ai ae bati, ae kaub'aia aomata aika buakaka.
17B'a ane e na anai korakoraia akana buakaka te UEA,
Ao E na buokiia akana raoiroi.
18E tabeakin aroia akana ongeaba nako Ina te UEA,
ao a na abana te aba n aki toki.
19A na aki bo ma te kaangaanga ngkana a bubuaka kanoani boong;
a na bati kanaia n tain te rongo.
20Ma a na mate akana buakaka;
ane a na mauna akana riba te UEA, n ai aroni maunan tamaroan ueeni kaai:
ane a na mauna n ai aroni bubun te ai.
21E tatangob'ai te aomata ae buakaka, ao e aki kakaoki;
ma e tituaraoi te aomata ae e raoiroi, ao akea tokin ana angaanga.
22A na abana te aba akana kakab'aiaki iroun te UEA;
ma a na kakioaki nako akana a reke kaiia i rouna.
23Ngkana e karaoa ae E tangiraki iroun te UEA te aomata,
ao E na anganna te kona ni waaki ni
maiuna ma te ninikoria.
24Ngkana e tata nako,
ao e na aki b'aka.
B'a E na taua baina te UEA.
25I a kara ngkai; I a tia ni maiu n te tai ae ananau,
Ma I tuai n nora te aomata ae e raoiroi ni kitanaki iroun te UEA,
Ke n noriia natina b'a a bubuti kanaia.
26Ti te anganga b'ai ma te nano n tituaraoi n taai nako,
Ao a kakab'aiaki natina.
27Kitana te buakaka, ao karaoa ae raoiroi,
ao a na mamaeka am kariki n taai nako n te aba ni berita.
28E tangira te kaetitaeka ae eti te UEA,
ao E aki kitaniia ana Aomata aika kakaonimaki:
E kakawakiniia n aki toki,
ma a na kakioaki nako aia kariki aomata aika buakaka.
29A na abana te aba akana raoiroi,
Ao a na maeka iai n aki toki.
30Iai te ataib'ai n ana taeka te aomata ae e raoiroi,
Ao akea te nanonano iai.
31E kawakina ana tua Atuana i nanona,
ao e aki raure ma ngaia.
32E tarataraa te aomata ae raoiroi te aomata ae buakaka,
ao e ukoukora kamateana.
33Ma E na aki kaaki taekana te UEA i nanoni bain te aomata anne,
ke ni kariaia motikan taekana b'a e bure ngkana e kabowiaki.
34Kaantaninga te UEA, ao ira nanona;
E na karineko n anganiko te aba,
ao ko na nora ane buakaka ni kakioaki nako.
35I a tia n nora te aomata ae
kakaiowawaea nakoia tem'angina ao n rikirake ni korakora,;
kanga ai aroni kain Reb'anon ae te tiira.
36Ma i mwina, ngke I rikekei, ao akea iai;
I kakaaea, ma e aki reke.
37Kam'ataua raoi taraan te aomata ae e raoiroi ae b'aina te eti:
b'a iai ana kariki te aomata ae rau maiuna;
38Ma a na bane ni kamaunaki taani bure,
ao ai aroia naba aia kariki.
39E kamaiuia akana raoiroi te UEA,
ao E kataniia n tain te kaangaanga.
40E buokiia ao E kamaiuia;
E kamaiuia mairouia akana buakaka,
b'a kioina ngkai a karabaia i rouna.
Who We AreWhat We EelieveWhat We Do
2025 by iamachristian.org,Inc All rights reserved.
