Neemia 1 - Kiribati New Version Bible

Ana Tataro Neemia

1Bon Neemia ngai ae natin Akaria te m'aane, ao I koroi ni kabane taekan b'aai ake I a tia ni karaoi n te boki aei.

Inanon te nam'akaina are Kitirewi n ana kauabwi n ririki Atatokititi n tautaekana Botia, I maeka n ana kaawa ae e buubura are e nonoaki are Tuta.

2Ao ngke e roko tariu are Anani ma tabeman m'aane mai Iuta, ao I titirakinna taekaia Iutaia ake a birinako man te kataenikaiaki i B'aburon. Ao I titirakiniia naba i bukin te kaawa ae e buubura are Ierutarem.

3Ao a taku nako iu, “Bon iai aia kangaanga aika a m'aiti taenikai aika a okirikaaki. A bon rangi ni b'ainrang ngkai e a uruaki oon Ierutarem, ao a tia naba ni kabuokaki mataroana.”

4Ao ngke I ongo arei, ao I tekateka ao I tang. Ao I tang i nanon tabeua te bong, ao I aki am'arake ni kaotia ae I rangi n nanokawaki, ao I tataro:

5Te UEA ae Atuan karawa, Ko kakannato ao Ko maakaki. Ao Ko bon kaakakoroa bukin am berita nakoia aomata ni kabane akana a tangiriko ma n ongotaeka n am babaaire.

6Bon am toro ngai, ma ngaia ae, I butiiko b'a ko na nanoangaai ao kaekaa au tataro ae I tataro iai ni bong ao ni ngaina i bukiia Iteraera aika a beku i bukim. I a bon tia ni bure ma au utu ao aomata ni kabaneia

7ngke I rineia b'a n na aki ongotaeka iroum ao n aki iri nanon am tua ma am reirei ake ko angan Moote are am toro.

8I butiiko b'a Ko na uringa te berita are Ko karaoia ngkoa nakon Moote. Ko tuangnga ngkoa b'a ngkana ti aki kakaonimaki, ao Ko na kamaenikuniira i buakoia botannaomata ake ianena.

9Ma ko bon taku naba b'a e ngae ngkana ti a rangi n raroa nako ma ngkana ti tanrikaaki nakoim ma ni manga moana ongotaekara n am tua, Ko na kaokiira rikaaki nakon ara tabo are Ko a bon tia n rineia b'a Ko na taromauriaki iai.

10Ara UEA, I tataro i bukiia am toro, koraki ake Ko a tia ni kamaiuia ni korakoram ao m'aakam ae e korakora.

11I butiiko b'a Ko na kaekaa au tataro ao aia tataro am taani m'akuri ake tekorakina aika a kukurei naba ni karinea aram. Ngkana I uota ana wain te uea n te bong aei, ao karaoia b'a e na kukurei irou, ma ni karaoa te b'ai ae n na buubutiia.