Tani Motiki-taeka 17 - Kiribati New Version Bible

Karaoan Taian Bouannanti Iroun Mika Ao Kaboaia Taiani Ibonga

1Ao Mika are kaain te baronga are Eberaim ake a maeka n aaba ake a tabukibuki.

2E tuanga tinana ni kaangai n te tai teuana, “Ko uring taian m'akoro n tirewa ake 11,000 ake a kimoaaki mai roum? I boni mena ikekei ngke ko kamaraia are e kimoai. Ao boni ngai are I kimoaia.”

I tataro b'a, “E na kakab'aiako te UEA natiu.”

3-4Ao e kaoki taian tirewa Mika nakon tinana, ao e taku tinana, N na anga taian tirewa aikai nakon te UEA b'a e aonga ni kamanena natiu ni karaoa te bouananti mai iai. Ao e rairaki neierei nakon natina ao e taku, Mika, anai tirewa aikai b'a am b'ai.

Ma e a manga kaokia Mika nakon tinana. Ao neierei, e anai 200 m'akoro n tirewa ao e angan te tia m'akuri n te tirewa, are e a manga karaoi b'a te bouananti. Ao a kaawakina te bouananti n ana auti Mika.

5E a reke ana baangota ni mwengana ike e na taromauria iai te Atua, ao e karaoi taian bouananti tabeua ao te ebota. Ao e rinea temanna natina te m'aane Mika b'a te ibonga i bukin ana baangota.

6E riki aei i m'aain tautaekanakin Iteraera irouia uea, ma ngaia are, a bane ni karaoi b'aai ni kabane Iteraera ake a bon taku b'a a raoiroi.

7-8Ao n te tai teuana, ao e a roko temanna te rorobuaka n ataei man te baronga are Rewi nakon ana auti Mika n aaba ake a tabukibuki i abaia kaain Eberaim. E a bon tia n tiku iroun temanna kaain te kaainga are Iuta i Betereem, ma e a manga kiitana Betereem ni kakaaea te tabo ae boou are na maeka iai.

9Ao e titiraki Mika ni kaangai, Ko nako man te baronga ra?

Ao e taku te m'aane arei, I nako man te baronga are Rewi man te kaawa are Betereem i Iuta, ao I tabe ngkai ni kakaaea nneu ae boou ae N na maeka iai.

10Ao e taku Mika, Ao ko kukurei n tiku i rarikiu? Ko na riki b'a au ibonga b'a ko na tuangai te b'ai ae tangiria te Atua b'a N na karaoia. N na anganganiko ni katoa ririki 19 m'akoro n tirewa, ao teuana te maati ni kunnikai, ao N na karerekea naba kanam.

Ao e nako te aomata arei n nanakonako teutana ni karekea ana iango,

11-12ao e a kukurei n tiku i rarikin Mika b'a e na riki b'a ana ibonga. Ao e maeka ma Mika, ao Mika e karaoia b'a kaanga natina te m'aane temanna.

13Ao e taku Mika, E a reke au ibonga ae kaain te baronga are Rewi. I ataia ngkai b'a E nang bon akoai te UEA.