Ieremia 31 - Kiribati New Version Bible

E Na Okira Te Atua Iteraera

1E taku te UEA:

Iteraera, I berita

b'a n te bong teuana a na manga moan riki naba

ami baronga nako b'a Au aomata,

ao Ngai N na riki b'a Atuami.

2I akoia aika a biri nako i nanon te rereua

b'a a na rawei maiuia man te mate.

I anganiia te rau,

ao ngkana e roko raoi te tai,

N na karaoa naba aei nako imi.

Bon aei Au taeka Ngai ae te UEA.

E Na Manga Kaoka Aron Iteraera Te UEA

3Tabeua boong aika a nako, E kaoti te UEA nako iu ao E taku:

Iteraera, N na tangiriko n taai nako;

bon anne bukina ngkai I aki toki n taotaona nanou

ma n akoi.

4Kam rangi ni kakaawaki irou,

ai ngaia are, N na manga katea

ami botannaomata.

Kam na manga b'ab'atere ni kukurei

ma ni katangitang n taian timbere.

5Kam na uniki taiani kureebe

i aon maungan Tamaria

ao kam na kukurei n taiani kureebe.

6N te bong teuana ane a na takaarua

koraki akana tararuaa maungan Tamaria

ni kaangai, “Ti a nako Tion

n taromauria te UEA ae Atuara.”

E Na Okirikaaki Iteraera Nakon Oin Abana.

7E taku te UEA:

Karaoa ami bootaki ni kukurei ao anene i bukin Iteraera,

te botannaomata ae te kabanea ni korakora.

Anga ami nebonebo ao takaarua,

“Nakomai, Kamaiuia

Am aomata, te UEA!

Kamaiuia nikiraia Iteraera.”

8Boni Ngai ae te UEA, ae N na kairiia

Au aomata b'a a na oki mai B'aburon

ao man taabo nako n te aonnaba.

A na mena ikekei

te mataki ma te m'auku.

Aine aika i aon kawaia n riki b'a tiina

ao aine aika a na bung

a na roko naba ma n riki

b'a kaain te koraki n aomata ae e korakora.

9Ane a na tang ma n tataro

ngkana I a kaokiia nakon mwengaia.

N na kairiia

i nanon raanga n ran.

A na nakonako i aon te kawai ae e booraoi

ao a na aki reke waeia.

Boni Ngai tamaia Iteraera,

natiu ae I rangi n tangiriia.

10Ongo irou, ngkami aika botannaomata

aika kam kaan ma akana kam mena n taabo aika a raroa i taari.

I kamaaeia nako ia Iteraera,

ma N na manga ikotiia riki.

N na kaawakiniia kaanga te tia kaawakintiibu

ngkana e tararuaia ana nanai ni man;

11N na kamaiuia mairouia aia kairiribai

ake a na konaa ni kab'akaia.

12A na roko Au aomata

n te Maunga are Tion

ma ni karaoa aia bootaki ni kukurei;

a na oota moaia

i bukin Au kakab'aia.

N na anganiia te uita, te kureebe,

ao b'aan te oriwa,

ao ai uana naba ma taian tiibu ao taiani kao.

A na teetekeraoi Iteraera

ao a na rikirake kaanga te nne n aroka

ae e m'aiti te ran iai.

13A na bootaki ni kukurei ma n ruruoia,

ateiaine ao rorobuaka,

n ikotaki naba ma ami kara,

i bukina b'a N na anganiia te raunnano

ao N na onika rawawataia

nakon te kukurei.

14N na kakab'aiaia Au aomata

n te am'arake ae e raka

riki nakon are a kainanoia,

ao a na kukurei ibonga

n anaa kanaia te iriko ni man are a bon taku.

Bon aio Au taeka Ngai ae te UEA.

E Anga Te Kaantaninga te UEA

15E ongo te aba te tang ae e korakora

mai Ram'a

Tangin Nei Rakera i bukiia natina,

ao e rawa ni karauaki nanona,

i bukina ngke a mate.

16Katoka tangim

ao kaoi rannimatam.

A na bane ni kabooaki mwiin

b'aai ni kabane ake ko a tia ni karaoi i bukiia natim;

ane a na oki man abaia kairiribai.

17Bon iai te kaantaninga i bukin am bong aika a na roko.

Ane a na okira mwengaia natim.

Bon aei Au taeka Ngai ae te UEA.

18A tangi nako iu Iteraera ao a taku,

“Ti te bo ngaira ma taiani kao,

ma Ko uruira Ngkoe ae te UEA,

ao reireiniira aron te ongotaeka.

Bon Atuara Ngkoe

taiaoka kaokiira nakon mwengara.

19Ngke ti uarereke ngkoa,

ti m'aninga nako ao ti bure,

ma i mwiina ti uringaaba

n te b'ai ae ti a tia ni karaoia.

Ti mamaa ao ti b'ainrang.

ao ti tangiria n okiriko.”

20Kaain Iteraera,

bon natiu ngkami aika kam rangi n tangiraki.

E koaua b'a I aki tangiringkami nakon b'aai nako?

Ngke I aki toki ni karawaawataingkami,

ma I tangiringkami b'a kam na meemena i rarikiu,

b'a I aonga nanoangaingkami.

Bon aio Au taeka Ngai ae te UEA.

21Au aomata aika kam tangiraki,

kam na kanikinaea kawaimi n okira mwengami

n taiani b'ariko n atiibu ma boua aika kanikina.

Bon te kawai naba

are kam kiitana naba iai mwengami.

22Tera ngke kam teimatoa

ni kakaonimaki?

N na bon kakoauaa b'a n te tai teuana

ao a na manga kaokoro b'aai nako,

kaanga kaokoron te aine

ae e kaawakina te mm'aane.

E Na Manga Kaoka Iuta Nakon Mwengana Te UEA

23E taku te UEA ae Moan te M'aaka ae Atuaia Iteraera:

I berita b'a N na kainaomataia kaain Iuta ma ni kairiia rikaaki nakon aia kaawa ni koaua. Ao ngkana I karaoa aei, a na manga taetae riki ni kaangai,

“Ti tataro b'a E na

kakab'aia mwengana te UEA,

te maunga ae e tabu i Ierutarem

ike e tei iai ana Tembora.”

24A na maeka aomata i Ierutarem ao ni kaawan nako Iuta. A na riki tabeman b'a taan ununiki ao tabeman a na riki b'a taani kaawakin tiibu.

25A na manga reke maiuia ma korakoraia koraki akana a kua ma ni kainano,

26ao a na marurung raoi ngkana a tia n uti ni matu.

27N te bong teuana, a na riki Iteraera ma Iuta b'a Au tawaana ike a na rikirake iai Au aomata ma Au man.

28Ni boong ake ngkoa, I baairea kouwaakaeaia, ma kab'akaia, ma uruanan aroia. Ma ngkana e roko te bong anne, ao N na manga baairea aron unikaia ao buokaia b'a a na rikirake.

29Akea ae e na manga nakonako ni kaangai,

“A kanaki kureebe aika a mao irouia kaaro

katuka te b'ai ae e mao i nanon wiia

natiia.”

30N te bong arei, a na bane aika a kana te kureebe ae e mao n namakina maona, ao akana a bure a na motikaki taekaia nakon te mate.

31E taku te UEA:

E na roko te tai are N na karaoa iai te boraraoi ma Iteraera ao Iuta.

32E na bon kaokoro ma te boraraoi are I karaoia ngkoa ma ami bakatibu ngke I kaotinako ia mai Aikubita. E ngae ngke Atuaia Ngai, ma a bon urua naba te boraraoi anne.

33Bon aei te boraraoi ae e boou ae I a manga karaoia Ngai ae te UEA ma ngkami Iteraera:

“N na korea Au tua

i nanoia ma aia iango.

N na riki b'a Atuaia,

ao a na riki b'a Au aomata.

34“A na aki manga reireina temanna i bon irouia aron te ongotaeka i Rou. I berita Ngai ae te UEA nako ia ni kabane b'a a na ongotaeka irou, ti te bo aomata nako ma taan tautaeka. N na kab'arai aia bure, N na m'aninga taekan aia m'akuri aika a buakaka aika a tia ni karaoi.”

35Bon te UEA Ngai ae Moan te M'aaka.

I tuanga taai

b'a e na anga te oota ni katoa bong,

nam'akaina ao itoi

b'a a na oota n te tairiki,

ao naao b'a a na rurunga.

36N na aki konaa ni m'aninga

n anga taian tua aikai,

ao N na bon aki manga oki

n totokoa rikiraken a na botannaomata Iteraera.

Bon aei Au taeka Ngai ae te UEA.

37Kam konaa ni baairei taiani karawa?

Kam konaa n neweaba

kabin te aonnaba?

Ao anne bukina irou ngkai e kangaanga b'a N katinanikuia Iteraera n taai nako,

e ngae ngkana a a tia ni bure.

Bon aei Au taeka Ngai ae te UEA.

E Na Manga Kateaki Ierutarem

38E taku te UEA:

N te bong teuana, e na manga riki b'a Au b'ai Ierutarem. E na manga kateaki ma tiana ake a biri man te Taua are Ananera nakon te Mataroa are Koona.

39E na waakinako te tia mai ikanne ni kaineta te Maunga are Kareb'a. ao i mwiina, e manga b'aoua nako Koa.

40E na katabuaki naba te M'arua are Innom are e rangi n ribaaki b'a e na riki b'a Au b'ai, ao ai uana naba ma taiani karaabee ake i mainiku ake a ruorikaaki nakon te Mataroa are Aoti nako nanon te M'arua are Kiteron. E na aki manga oki n uruakaki Ierutarem.