2.Uea 23 - Kiribati New Version Bible

Warekan Ana Boki N Tua te Atua Iroun Iotia(2 Rongo 34.29-33)

1Ao e botiia taani kairiiri ake a unim'aane Iotia mai Iuta ao Ierutarem.

2Ao i mwiina, e nako Iotia ma kaain Iuta ma Ierutarem, ma ibonga, ao taiani burabeti nakon ana Tembora te UEA. Ao ngke a bane aomata ikekei ao e a wareka Ana Boki n Tua te Atua are e kuneaki i nanon te Tembora ni kaooa b'anaana.

3Ao ngke e a bane a na wareware Iotia, ao e tei i rarikin te boua teaina. Ao e tuangiia aomata b'a a na berita n aran te UEA b'a a na kakaonimaki nakon te UEA ma ni irii nanon ana kaetieti. Ao a kariaia aomata b'a a na karaoi b'aai ni kabane ake a koreaki i nanon te boki.

Irakin Taeka N Reirei Man Ana Tua Te Atua Iroun Iotia(2 Rongo 34.3-7)

4Ao Iotia e tuangiia Irekia are te ibonga ma taiani kauoman ni ibonga, ao taan tei ni mataroan te Tembora b'a a na rin i nanon te Tembora ma ni kaotinakoi b'aai ake a kabonganaaki i bukin taromaurian B'aara, ma Nei Aatera, ao taiani itoi. E kabuoki b'aai aikai Iotia ni M'aruan Kiteron n are i tinanikun Ierutarem, ao e anai mannangiia ni uoti nakon te kaawa are Betaera.

5E boni kanakoia man te aba naba aia ibonga beekan ni baangotan te aba are i nanon Iuta ao i rarikin nako Ierutarem. Aikai m'aane ake e rineia uean Iuta b'a a na anga taiani karea nakon B'aara ao nakon taai, nam'akaina, ao taiani itoi.

6E kaotinakoa te boua are e tabu i bukin taromaurian Nei Aatera te uea are Iotia man te Tembora ao e uotia nakon te M'arua are Kiteron, ike e a kabuokaki iai. E kamantinta mannangina ni karikia b'a te bubu ao e karenakoa i aon ruanimaten te botannaomata ikekei.

7E urua ni kab'aka te auti ae e korakora are e tena ma te Tembora are a maeka iai ainen matawa aika m'aane, ike a kakaraoaki iai kunnikai aika a tabu i bukin te anti are Nei Aatera.

8E bon kani bane kaawan nako Iuta ni karaoaki iai taian angakarea irouia ibonga nakon te UEA ni bangotan te aba. E kairiia ibonga aikai Iotia nako Ierutarem ao e kam'araai aia baangota b'a a na aki kamanenaaki i bukin te taromauri. Ni kabane taiani baangota ake mai Keeb'a are i meangin Ierutarem nako Beerateb'a i maiaki. E bon kamaunaa naba te baangota are i Beerateb'a are e mena i maingin te mataroa are Iotua, are e ingoanaki n aran te kabanea n rietaata ni mataniwi n te kaawa ae e buubura anne.

9A aki tau ibongan aba aikai ni m'akuri n ana Baonikarea te UEA are i nanon Ierutarem, ma a ti kariaiakaki n am'arake n te kariki are tabu, n ai aroia ibonga mai Ierutarem.

10E kanakoia tabeman m'aane Iotia nakon te M'arua are Innom are i tinanikun Ierutarem ma ana taeka ae a na aki kariaiakaki baonikarea ikekei b'a b'aai n taromauri. N te aro anne, are a aki konaa iai aomata ni manga kamanenai i bukin kareanakin aia ataei nakon Moreka.

11E kanakoi naba taian aoti ake a kamanenaaki iroun uean Iuta n tain aia bootaki n taromauriia taai, ao e kamaunai naba taiani kaanibuaka ma ngaiia. A kaawakinaki ngkoa taiani aoti aikekei i rarikin mataroan te tembora, i nanon oon te Tembora, n uakaan ma ana tabo ni maeka te mataniwi are Natan Mereka.

12Tabeman uean Iuta, ma ai moaraara riki Manate, e a tia ni karaoi taiani baonikarea i nanon oon te Tembora ake uoua, ao n te tabo naba are e karaoia Aati i aon taubukin te bareti. E uruia taiani baonikarea aikai Iotia ao e kamaerikirikii, ao e karenakoi m'akorokoroia i nanon te M'arua are Kiteron, i tinanikun Ierutarem.

13I mwiin anne, e kaini taiani baangota ake e karaoia ngkoa Toromon i mainikun Ierutarem ao i meangin te Tabuki are Mate i bukin karinean Nei Atiterota are antiia kaain Titon ae e rangi n ribaaki, ao Kemoti are antiia kaain Moaaba ae e rangi n ribaaki, ao Mirekom are antiia kaain Ammon ae e rangi n ribaaki.

14E urui bannaia antiia Ianena aika atiibu ao e korouaa te boua are e tabu i bukin taromaurian Nei Aatera. Ao e kaona te tabo arei n riia aomata.

15Ma e bon aki toki ikanne ana m'akuri Iotia. E urua naba te baangota ao te baonikarea ake e kateia Ieroboam are natin Nabata te m'aane are a riki ni bure iai Iteraera. E kabuoka baangotan ao bouan Nei Aatera, ao e kamantinti ni kabubui.

16Ao ngke e taratara nako ao e noori taian ruanimate i aon te tabuki. E anai tain ri mai iai ao e kabuoki i aon te baonikarea, b'a e aonga n aki manga konaa ni kamanenaaki. E riki aei n aron are e a tia n taekinna ana burabeti te Atua ngke e teitei Ieroboam i rarikin te baonikarea, i nanon tain te bootaki i bukin te toa.

Ao e noora ruanimaten te burabeti Iotia are e taekinna b'a a na koro bukin baikai.

17Ao e titiraki ao e taku, Antai ruanimatena arei?

A kaeka aomata ake a maeka i rarikin te tabo arei ao a taku, Bon ruanimaten burabetin Iuta are e taekin b'aai aika a na riki nakon te baonikarea aei,

18ao e kaeka Iotia ao e taku, Ao katikua. Tai kena riina. Ma ngaia are, a aki kumei riina ke riin te burabeti nikawai mai Iteraera are e taunaki naba ikekei.

19A kauna te UEA tabeman uean Iteraera tabeman ngke a karaoi baangotaia beekan i aon Iteraera ni kabutaa. Ma ngaia are, e kanakoia ana taanga ni buaka Iotia b'a a na kamaunai taian baangota aikai n aron are e karaoia i Betaera.

20E tiringiia ibonga ake a m'akuri iai ao e kabuoki riia i aon taiani baonikarea.

I mwiin baikai ni kabane, ao e a okira Ierutarem Iotia.

Karaoan te Riao Iroun Iotia ma Kaain Iuta (2 Rongorongo 35.1-19)

21E taetae Iotia nakoia kaain Iuta ni kaangai, Kam na kauringa te Riao b'a karinean te UEA ae Atuami n aron are e taekinaki ni Bokin Ana Tua te Atua.

22E bon tuai man kakaraoaki te Riao man te tai are a tautaekanaki iai Iteraera ma Iuta irouia taiani uea.

23Ma n ana ka 18 n ririki ni uea Iotia i aon Iuta, ao a bane n roko aomata nako Ierutarem ni kauringa te Riao.

E Teimatoa Naba Unin Te UEA Irouia Kaain Iuta

24E bane ni kamaunaiia aomata ma b'aai aika a rangi n ribaaki Iotia mai aon Iuta ma Iteraera, n ikotaki naba ma taan tabunea, taani kaiwa ao taian bouananti. E kabanea ana konaa ni karaoi b'aai ni kabane ake a koreaki i nanon te boki are e kunea Irekia i nanon ana Tembora te UEA.

25Bon akea te uea mai m'aaina ao i mwiina ae e kabanea korakorana n irii nanon ana tua Moote.

26Ma E bon teimatoa naba te UEA ni maraki nanona irouia kaain Iuta i bukin b'aai aika a bati ake e a tia Manate ni karaoi are E un iai.

27Ao E taku te UEA, N na kamaunanakoia kaain Iuta, n aron kamaunanakoaia Iteraera naba irou. N na aki manga kubara Ierutarem, e aoria ngke I a tia n rineia b'a au B'ai. N na kitana te Tembora aei ae e karaoaki i buku.

Maten Iotia n Te Buaka (2 Rongo 35.20—36.1)

28A tauaki rongorongon b'aai ni kabane ake e karaoi Iotia i nanon ana tai ni uea n te boki are Rongorongoia Uean Iuta.

29E kam'anangaa ana taanga ni buaka Neko are uean Aikubita nako meangin te Karaanga are Iuberetiti i nanon ana tai ni uea Iotia b'a e na buoka uean Aturia. E kairiia ana taanga ni buaka Iotia nako meang b'a a na buakana Neko ma ngke a kaaitibo ni buaka i Mekito, ao e a mate Iotia.

30A anaa rab'atana tabeman ana tautia ni katokaa i aon te kaanibuaka ma ni uotia rikaaki nako Ierutarem, ike a taunna iai ni bon ana ruanimate. I mwiina, a kunea natina te m'aane kaain Iuta ao a kab'aroa te b'aa i aon atuuna ni kaotia b'a te uea ae e boou.

Uean Iuta are Ieoaati (2 Rongo 36.2-4)

31Bon 23 ana ririki ni maiu Ieoaati ngke e riki b'a te uea i aon Iuta, ao e tautaeka mai Ierutarem i nanon 3 te nam'akaina. Tinana bon Nei Amutara are natin Ieremia are kaain Ribena.

32E aki ongotaeka Ieoaati iroun te UEA, n aron are a tia ni karaoia tabeman ana bakatibu.

33E katika Ieoaati uean Aikubita are Neko ao e karabutinna i Ribera i rarikin Amata. I mwiina, e kairoroia aomatan Iuta b'a a na kab'aka nako ina e kaaniia aua te tan te tirewa ao e kaaniia 35 te kirokuraem te koora b'a te taekiti.

34E rinea natin Iotia are Eriakim te uea are Neko b'a e na uea i aon Iuta, ao e bita arana nakon Ieoiakim. E kaira nako Ieoaati b'a te taenikai nako Aikubita, ike e a mate iai.

35E kairoroia naba kaain Iuta Ieoiakim b'a a na kab'aka te roonrab'ata ae e buubura, b'a e aonga ni konaa n angan Neko te m'aiti n tirewa ao ni koora are e tangiria.

Uean Iuta are Ieoiakim (2 Rongorongo 36.5-8)

36Ai tib'a 25 ana ririki ni maiu Ieoiakim ngke e rineaki b'a te uea, ao e tautaeka i nanon 11 te ririki mai Ierutarem. Tinana bon Nei Tebita are natin Betaia te aine are kaain Ruma.

37E bure Ieoiakim nakon te UEA ngke e katotongiia aroia ana bakatibu.