Itaia 10 - Kiribati New Version Bible

1Kam a reke n te kangaanga aomata! Kam a tia ni karaoa te tua ni iowawa ae aki eti

2are kam na karaoa iai ae e aki raoiroi nakoia aomata aika a maiu ni kainano aika a tangira buokaia ao aine aika a tia ni mate buuia ao ataei aika akea aia karo.

3Ma tera ae kam nang karaoia ngkana kam buakanaki man katuaaeaki irouia ianena? Kam na biri ni kakaaea buokami ia? Kam na karabai ami b'ai aika a kakaawaki ia?

4Kam na kangaa ni biri nako man te tauaki ke n te tiringaki? E bon teimatoa naba n un te UEA, ao e tuai man kab'ara nanona mairoumi! Ana Kaantaninga Te UEA Ao Uean Aturia

5E taku te UEA:

I a rangi n un! Ao N na kamanenaa uean Aturia b'a kaanga te ambo

6n oreia ni kab'akaia ngkami aomata aika taan onimakiniia anti. I un iroumi, ao N na kanakoia b'a a na buakaningkami. E na anai b'aai aika e tangiri ao e na toubekaingkami kaanga taiani bokaboka ake i nanon kawain nukan te kaawa.

7A na bon m'aiti riki ana iango i nanona, i bukina ngke e tangiria ni kamaunai botannaomata aika a bati.

8E taku Uean Aturia:

Bon taiani uea au mataniwi n te taanga ni buaka!

9A tia ni konaaki kaawan nako Kareno, Karekemiti, Amata, Arebata, Taamaria, ao Tamateko.

10A mamaara riki antiia kaain Ierutarem ao Tamaria nakoia antiia botannaomata aikai.

11Ao N na kamaunaa Ierutarem, n ikotaki ma antina nako ao ana bouannanti nako n aron are I a tia ni karaoia nakon Tamaria.

12E na karaoa te b'ai are e a tia ni baaireia te UEA nakon Ierutarem ao te Maunga are Tion. Ao i mwiina, e na katuaaia uean Turia aika kainikatonga mani kamoamoa,

13ake a kaangai:

I karaoi b'aai aikai ni bon oin m'aakau i bukina b'a I wanawana ao I rabakau. I buakaniia uea kaanga te kao ae e aki manana, ao I anai kaub'aia botannaomata nako.

14I a tia ni kataenikaia te aonnaba ae e b'anin! E rangi ni beebete anaakin te bunimoa n te ngao ae akea ae e teiakinna. Akea ae e na uboi baina ni kiba ke ni katanga te bu ni katounakoai.

15Uean Turia, e konaa te tanai ke te tao ni karanganakoa teuare e b'ainna? E konaa te boora te kai n tabeka te aomata are e tabekia?

16E na kanakoa te aoraki ae moan te kamaamate te UEA ae Moan te M'aaka n oroia am taanga ni buaka ao ko na ura n te aoraki ae te kabuebue i aan niiniirana ni uea.

17E na onikaki te Atua ae e tabu, are ootan Iteraera, ao ko na urarake n te bong teuana kaanga te buakonikai ae e kateketeke.

18E na karaoai am buakonikai aika a tamaroa ao am tawaana aika a maiu reirei te UEA b'a a na karaurau ni mka nako.

19E na rangi ni uarereke m'aitin taian aroka n te aro are e na konaa ni warekaki iroun te teei ae moan te uarereke.

Ana Ti Tabeman N Okirikaaki

20E na roko te tai are a na ti onimakina UEAN Iteraera ae e tabu nikira ni maiu ake a roko mai Iteraera ao Iuta, n onea mwiin onimakinaia botannaomata ake a konaaki irouia.

21A na rangi n rawata aomata kaanga m'aitin taian tano i mataniwiin taari, ma a na bon ti tabeman aika a na tiku ni maiu ma n okira Atuaia Iteraera ae e m'aaka.

22E riki aei i bukina ngke e a tia ni kamaunai aia botannaomata, n aron are e bon riai ni karaoaki nakoia.

23E a tia ni berita te UEA are Moan te M'aaka b'a a na bane kaain aonnaba ni katuaaeaki.

24E taku ngkai te UEA ae te Atua ae Moan te M'aaka nakoia ana Aomata i Ierutarem:

A oroingkami kaain Aturia n taiani kai ma ni kabuakakaingkami, n aron are a karaoia kaain Aikubita. Ma kam na aki maakuia.

25N na katoka marakin nanou iroumi n te tai ae e waekoa ao N na katuaaia i bukin aia bure nako.

26N na kataereia kaain Aturia n taiani kainikataere, n aron are I a tia ni karaoia nakoia kaain Miria i rarikin te b'a are Orebi. Ao N na kaota nakoia te m'aaka naba are I kamanenaa ngkoa ni karaoa iai te kawai i nuukan taarin Aikubita.

27Ao ane a na aki manga tautaekana ami botannaomata. A na bane n nakoraoi b'aai nako nakoimi, ao a na bane n tabekaki rake uotami.

28A tia n roko taian taanga ni buaka n te kaawa are Aiata. A tia n ri nanon Mikeron, ao a kaawakin aia b'ai i Mikemati,

29i m'aain m'anangaia i nanon te m'arua ma tikuia n te tairiki ni kangainaa i Keeb'a. A maaku kaain Rama, ao aomata ni kabane i Kireata, are ana kaawa Tauro, ao a biri nako.

30E ongo te aba te tang ae e korakora mani kaawan nako Karim, Raitia, ao te kananoanga are Anatota.

31Bon akea nikiran aomatan Matemena ke Kebim.

32A na kaemb'a n te bong aei kairiribai i Nobi ao a ioioi aia timoi n oro nakon te Maunga are Tion i nanon Ierutarem.

33Ma e na kabonganaa korakorana ae e kakamaaku

te UEA ae Moan te M'aaka

ni kab'akai taian aroka aika a rangi n rietaata

mani koroi m'aanga ni kabane.

34E na tiring taian aroka ni kabane n te tanai

te UEA ae e mimitong

i buakonikain Reb'anon.