Itaia 62 - Kiribati New Version Bible

E Na Kamaiuaki Ierutarem

1Ierutarem, e na aki konaa n toki

au taetae nikawai i bukim.

N na aki kainab'aabu

ni karokoa ko maiu raoi ma ni manoraoi,

ao ni kiakia kaanga te ura.

2E na nooraki am tokanikai ae e korakora

irouia botannaomata ao uea;

e na anganiko

aram ae e boou te UEA.

3Ko na riki b'a te baunuea ae e mimitong,

kabaean atuuia uea,

nakon te UEA ae Atuami.

4E na aki manga atongaki aram b'a

“Kiitanaki ao Kanoabo,”

ma e na atongaki b'a “Mare Ma Te Kukurei.”

Ko na kukurei iroun te UEA;

e na riki abami

b'a ana kainrou te aine.

5A na abana te aba ami aomata,

kaanga te rorobuaka n ataei

ngkana e anaa te kainrou.

E na kukurei te UEA

iroumi,

kaanga te bu te m'aane

ngkana e kukurei iroun ana kainrou.

6Ierutarem, I a tia ni kaaki

i aon ami oo nako taan tei,

ake tabeia n te bong ma te ngaina

te taetae

n taai nako.

A na kakauringa te UEA.

7ao a na aki motirawa

ni karokoa e matoatoa raoi Ierutarem

ma n tanoata taekana n taabo nako.

8E a tia n anga ana taeka te UEA

ao e karaoa te berita aei:

N na aki manga anga riki

nakoia ami kairiribai

taian uita ao taiani kureebe

aika kam bon bekutata ni karaoia.

9Ngkai kam bon taiia

ami uita ma te kureebe,

ao kam na boni kana naba te kariki

ma te nano ni kaaitau,

ao kam na nima ami wain

n au Tembora.”

10Kaain Ierutarem,

kauki mataroan ami kaawa nako!

Manga karaoa te kawai nakon te kaawa

ao kaitiakia ni kanakoi taian atiibu;

irakea te man ni buokiia

botannaomata b'a a aonga n noora kawaia.

11Ao aei te b'ai ae e taekinna te UEA

i bukin te aonnaba ni kabane b'a a na ongo:

“N na roko te tai ae e aki maan b'a N na kamaiua

te kaawa are Tion,

ao n anganiko kaniwangam.

12Ao i mwiina, ane ko na weweteaki,

‘Ana Aomata Ni Koaua Te UEA,

Ake E Bon Kamaiuia!’

E na ataaki ami kaawa

b'a te tabo ni maeka ae e raoiroi

ao te kaawa ae e onrake n taian aomata.”