Ieremia 5 - Kiribati New Version Bible

Iai ae Kokoaua ao ni kakaonimaki?E taku te UEA nako iu:

1Kakaaia aomata

aika a raoiroi i Ierutarem

aika a kataia ni kakaonimaki.

Ngkana e konaa n reke i roumi temanna,

ao N na kab'ara ana bure te kaawa ae e b'anin.

2A bane aomata ni kabane n urua aia berita

aika a karaoi n Arau.”

3Ao I kaeka ni kaangai, “I ataia

b'a ko kakaaea te koaua.

Ko katuaaia am aomata

i bukin aia kewe,

ma a aki ongea marakiia,

a karikirakea riki taningabonoia

ao a rawa n rairaki

nako im.”

4Ao i mwiina, I taku i bon i nanou,

“A karaoa te m'akuri ni baba

aomata aikai,

ao a aki konaa n ataa

te b'ai ae E tangiria Atuaia

b'a a na karaoia.

5N na nako n taetae ma taan kairiiri.

A na ataa te b'ai ae e tangiria te UEA.”

Ma a bon rawa naba

n ongotaeka i roun te UEA.

6A a tia aomata ni kakaitaraa

ma ni katinanikua te UEA

n taai aika a m'aiti.

Tabeman kairiribai a buaka

kaanga taian raian man te buakonikai

ke taian kameaanti man te rereua.

A na mamataukiroa kaawan

nako Iuta

ao a na raebitii konaiia

aika a otinako

kaanga taian reeb'ari.

Ana Katuaaea Iuta kairiribai.E taku te UEA:

7Kaain Iuta,

N na kangaa ni kab'ara ami bure?

I anganingkami b'aai nako,

ma kam kiitanai

ao kam taromauri bouannanti.

Ngkami aika mm'aane kam nako ni kawariia ainen matawa

ao kam aki kakaonimaki

nako ia buumi.

8Ti te bo ngkami ma taiani man,

kam tatangira te wenenibure n taai nako

ma buuia aomata tabem'aang.

9E aera ngkai N na aki katuaaia

kaain Iuta?

10N na tuangiia aia kairiribai ni kaangai,

“Naako riin n au nne n aroka ni kureebe.

Kam na aki urui taiani kureebe,

ma kam na ti koroi ni kanakoi taiani m'aanga,

i bukina b'a bon aomata ngaiia

aika tiaki au b'ai.”

11A a tia n aki kakaonimaki nako iu

kaain Iuta ma Iteraera n aaro aika a bati,

12A b'anganikewe aia burabeti ao a taku,

“E aki konaa ni katuaaira te UEA.

Ti na maeka ma te rau

ao a na m'aiti karara.”

13A taekin taiani kewe aikai n arau,

ma ngaia ae ngkai a na mate n te buaka

ke n te mate ni baki.

14Bon te UEA Ngai ae te Atua ae Moan te M'aaka.

Ieremia, I tuangko

raoi te b'ai ae ko riai n taekinna.

A na riki am taeka b'a taian ai;

ao a na riki Iteraera ao Iuta

b'a te b'a ni kauraura.

15Kaain Iteraera,

I a tia ni karaoa au babaaire.

E na buakaningkami te taanga ni buaka

man te aba ae e raroa nako.

I a tia n rinea te botannaomata nikawai

ae kam babanga

aia taetae.

16Bon taani buaka ngaiia ni kabane,

ao a uota te mate aia kanoanikatebe.

17A na kana uaan arokami ma ami nanai ni man

te botannaomata aei

A na bon aki katuka te uaa teuana

i aon ami kureebe ke arokami.

E ngae ngke kam mano i akuun

ami nono aika a matenten,

ma e na bon uruaki naba ami kaawa nako

ao a na bon tiringaki naba natimi.

E Rawa Iteraera N Taromauriia Te UEA

18E taku te UEA:

Ieremia, a na aki tiringiia ni kabane kaain Iuta kairiribai.

19Ao ane a na titiraki akana a riki b'a nikira ni maiu ni kaangai, “E aera ngkai E karaoa te b'ai ae e kakamaaku aei te UEA ae te Atua nakoira?” Ao kam na tuangiia ni kaangai:

Bon te UEA Ngai,

ma kam a tia ni kiitanai

n taromaurii anti tabem'aang

ni bon oin abami.

Ao ngkai kam na riki b'a tooro

i abaia ianena.

20Kaain Iuta,

ao kanoan Iakob'a

tuangiia aomata n tatabemaniia nako baikai.

21Taian nanobaba! E aera ngkai kam aki kakauongo

ngke I taetae?

Kam aki ataia b'a kam

22riai n taromauriai

ma te maaku ma n ruru?

Boni Ngai ae I karaoa te bike

are tokin te marawa.

A na b'aro nao i aon te bike,

ma bon ti tokiia anne.

23Kam a tia ni kaaitaraai ma n rairaki nako mairou

ngkami aika taian taningabono.

24Kam rawa ni kaangai,

“Ti a taromauria te UEA!

Boni Ngaia ae e karoorokoa te karau

n te aumeaang ma te aumaiaki.

ma n anganiira uaan te tai ae e tamaroa.”

25Ao bon anne bukina ngkai I aki konaa ni kakab'aiaingkami!

26E kam'aneia maan te tia kaeman

ao e kaaki i nanon ooia,

ma iai ake a kam'aneia aomata

ma ni karikiia b'a aia toro.

27Kam buakaka, ao kam b'anganikewe ao ni kam'aam'ane

i bukin karekean kaub'aimi i bon iroumi.

Kam korakora

28ao kam tetekeraoi,

ma kam rawa ni buobuoki nako ia aika a kainano

ni karekea nako ia te moti ae e raoiroi ni bon aron ae e riai n reke nako ia.

29Kam tangiria ni katuaaeaki,

ma ngaia are, N na karaoa te karekekai.

30Ani bon noori b'aai aika a kakamaaku

aika a riki i nanon te aba aei.

I tiaoki!

31A anga aia rongorongo taiani burabeti

n aran te anti ni kewe.

a aki tangiria au ibonga

ni m'akuri i buku

ma ngkami-Au aomata ni koaua

kam tangira te kawai aei!

Ma i nanon tain te kabuanib'ai anne,

kam na rairaki nakon antai i bukin buokami?