Nakoaia Ibonga 17 - Kiribati New Version Bible

Kakaawakin te Raraa

1E tua te UEA nakoni Moote

2b'a e na angan Aaron ma natina ao aomatan Iteraera ni kabane tuua aikai.

3Ngkana iai te Iteraera ae e tiringa ana karea n aron te kao, ke te tiibu, ke te kooti b'a te karea nakon te UEA, ao ngkana e tiringnga i nanon ke i tinanikun te Um'antabunrianna,

4e na atongaki b'a e bure ni katutuua te raraa, ao e na kararoaaki mai buakoia ana aomata, ao n aki aranaki b'a ana Aomata te Atua b'a kioina ngke e aki tiringa ana karea i mataroan te Um'antabunrianna.

5Nanon te karea aei b'a kaain Iteraera ngkai a nangi toki man tiringakin aia karea n taabo ake i tinanikun mataroan te Um'antabunrianna. A nang uoti nakon te ibonga i mataroan te Um'antabunrianna, ao a na tiring b'a te naan karea n raoi.

6Te ibonga e na anaa raraan te karea, ao e na tatauriia rarikin nako te baonikarea are i mataroan te Um'antabunrianna, ao e na kabuoki kiriitina iai b'a e aonga n arokaki te boi ae e boiarara iroun te UEA.

7E riai ni kakaonimaki te I-Iteraera n toki man titiringan ana karea are e kaakarean nakon antin te kooti. E na kawakina te tua aei te I-Iteraera ni karokoa taai aika a na roko.

8Ngkana iai te I-Iteraera ke te iruwa i nanon te maeka ae e anga ana karea ni kabuokaki, ke te aeka ni karea riki teuana

9nakon te UEA, ao e aki anga i mataroan te Um'antabunrianna, e na aki aranaki b'a ana aomata te Atua.

10Ngkana iai Iteraera ke iruwa i nanon te maeka aika kana te iriko ma raraana. E na katannakoa matana te UEA mai rouia, ao E na aki araniia b'a ana aomata.

11A mena maiuia baika a maiu n te raraa. Ma ngaia are, E tua te UEA b'a a na kab'aroaki raraaia man aika kawakawa i aon te baonikarea b'a a na uotinako aia bure aomata. Te raraa bon te maiu, ao e uotinako aia bure aomata.

12Ma ngaia are, E tua te UEA b'a akea te I-Iteraera ke te iruwa ae e na kana te iriko ma raraana.

13Ngkana iai te Iteraera ke te iruwa n te maeka ae e kaeman, ke e tau mannikiba, ao ngkana e reke i rouna te man ane e itiaki, ao e na katiinakoa raraana nako aontano ao n taunna n te tano.

14E mena maiuia b'aai ni kabane n te raraa. Ma ngaia are, te UEA E a tuangiia Iteraera b'a a na aki kana irikon te man, ngkana a tuai moa ni kaaki raraana. Ane karaoa aei, ao e na aki atongaki b'a ana aomata te Atua.

15Ngkana iai aomata n aki akaaka, te Iteraera ke te iruwa ae kana irikon te man ae e boni mate i rouna, ke ni mate iroun raona ni man, e riai n teboki moa kunnikaina, e na tebotebo, ao n tataningaa te tairiki ike e a itiaki iai.

16Ngkana a aki karaoa aei, ao a na kana uaan aia m'akuri.