1Ao e a matoa ana tautaeka n abanueana ni kabutaa ngkai te uea are Toromon are natin Tawita, i bukina b'a e a tia te UEA ae te Atua ni kakab'aia ma ni karikia b'a te uea ae korakora.
2N te tai anne, ao e bon kaawakinaki naba i Kibeon te Um'antabunrianna are e a tia ni karaoia ana toro te UEA are Moote i nanon te rereua,
3ao e mena i matan te Um'antabunrianna te baonikarea are te buraati are e karaoia Betarera.
4N te bong teuana, ao e taku Toromon nakoia Iteraera, ma ana mataniwi n te taanga ni buaka, ao ana mataniwi, ao tani kairiiri n taian utu b'a a na nako ma ngaia nakon te tabo n taromauri i Kibeon,
5e ngae ngke e a kaman kam'ainga te Atiniberita tamana are Tawita mai Kirataim-Iearim nakon te auti n rianna are e a tia ni kateia i Ierutarem.
Ao a m'ananga Toromon ma te korakina nako Kibeon b'a a na taromauriia te UEA,
6ao e anga ana karea Toromon aika te ngaa taiani man b'a kakukureian te UEA i aon te baonikarea ae te buraati.
7E kaoti te Atua nakon Toromon n te tairiki anne n te mii ao e taku, “Toromon, bubuti i bukin b'aai ni kabane akana ko tangiri, ao N na anganiko.”
8Ao e taku Toromon: Te UEA ae te Atua, ko boni kakaonimaki nakon tamau are Tawita, ao ngkai ko a manga karikai b'a te uea i aon Iteraera.
9I kaantaningaaki b'a n na tautaekaniia aomata aikai ma a bon rangi ni m'aiti kurikuri m'aitin tanon aontano. Ma ngaia ae ko na kaawakina am berita are ko karaoia nakon
10tamau, ao ko na anganai te wanawana. Anganai te rabakau ae I kainanoia i bukin nakoau ni uea i aon am botannaomata ae korakora aei.
11Ao E kaeka te Atua:
Toromon, I taku b'a ko na bubutiai b'a n na karikiko b'a te kaub'ai ae e kakannato, ke n na kanaanaua maium. Ke ko na butiai b'a n na kamaunaiia am kairiribai, ma ko aki b'a ko butiai b'a n na anganiko te wanawana ma te rabakau n tautaekaniia au aomata.
12Ma ngaia ae, N na kawanawanako man anganiko te ataib'ai. Ma N na bon karikiko naba b'a te aomata ae moan te kaub'ai mani kakannato riki nakoia uea ake mai m'aaim ao akana i mwiim.
13Ao e kiitana Kibeon Toromon ao e okira Ierutarem, are kaawan te tautaeka n Iteraera.
Kaub'ain Toromon(1 Uea 10.26-29)14Bon iai ana taanga ni buaka Toromon ae m'aitina bon teuana te ngaa abubua ana ka ni buaka, tebwi ma uoua te ngaa ana aoti ake e kaawakiniia i Ierutarem ao kaawa ake tabeua.
15I nanon ana tai ni uea Toromon i aon Iteraera, ao moan te bati taiani koora ao taian tirewa ni kabutaa aon Ierutarem, ao a m'aiti taiani kai aika tiira kaanga taian kai tukomorea i oin taian tabuki.
16A kabooi taian aoti ma kaanibuaka ana taani bob'ai Toromon man aonon Mutiri ao Kue.
17A kabooa onobubua te m'akoro n tirewa i bukin te kaanibuaka ao tebubua nimabwi te m'akoro n tirewa i bukin te aoti. A boni kaboonako nako taian aoti ma kaanibuaka nakoia kaain Eta ao uean Tiria.
Who We AreWhat We EelieveWhat We Do
2025 by iamachristian.org,Inc All rights reserved.
