Iotua 15 - Kiribati New Version Bible

Anganakiia te baronga are Iuta abaia

1Aikai aaba ake a anganaki utuun te baronga are Iuta b'a abaia; ake aaba ake a nako aiaki ake i rarikin tian Etom, ao e roota te rereua are Tin tokina mai maiaki.

2E moa tian abaia mai maiaki man tokin taari are mate mai maiaki,

3ao e a manga biri nako aiaki man kawain Akerabim ni karokoa Tin. E biri ri maiakin Kateti-B'anea ri rarikin Etiron n tam'arake nako Ata, ao e a manga rairaki nako Kareka,

4ni manga biri nako Atimon n iranako te karaanga are tian Aikubita, ao e toki n taari are te Mereterenian. Ao anne tian Iuta mai maiaki.

5Tian abaia mai mainiku bon man tabon taari are mate ni karokoa tabona, ao tian abaia mai meang bon tabon taari are mate mai meang.

6E a manga wairio te tia mai tabon taari are mate mai meang nako Beta-Okera, ao e a manga biri rimeangini Beta-Araba, ao e aerake nako atiibun Boan are natin Reuben.

7Ao maikanne e a manga birirake nako m'aruan te kangaanga nako Tebira, ao e manga nako iang ni kaitaraa Kirekara, are kaaitaraa kawain Arummim are i maiakin te m'arua, ao e a manga waaki nakon te koburake n ran are i Entemeti, ao e a manga otinako nako Enrokera.

8Ao e a manga tam'arake nakon te m'arua are Innom, are i maiakin te tabuki are mena iai aia kaawa I-Iebuti are Ierutarem. Ao e a manga ri aon te tabuki are i maeaon te m'arua are Innom are i meangin m'aruan Rebaim mai meang.

9Ao e a manga biri nakon koburake n ranni Nebetoa, ni manga otinako nakon kaawa ake i rarikin te maunga are Ebiron. Ao mai ikanne e a manga b'aoua ni kaitaraa B'araa (are arana ngkai Kiriata-Iearim).

10Ao e a manga b'aoua i maeaon B'araa ni kaineta te aba are tabukibuki are I-Etom, ao e a manga biri rimeangin te maunga are Iearim (ke Ketaron), ao e a manga biri rikaaki nako Beta-Temeti, ao e a manga waaki ri rarikin Timna.

11E a manga birinako te tia nakoni maunga ake i meangin Ekiron, ao e a manga b'aoua ni kaitaraa Tikeron, ri rarikin te maunga are B'aara, ni manga biri nako Timna ao e toki n taari are te Mereterenian,

12are bon te tia mai maeao. Ao anne ngkanne tian abaia utuun te baronga are Iuta.

Tauan aaba aika Eberon, Tebira iroun Kareb'a

13E anganaki Kareb'a are natin Iebunne m'akoron aban te baronga are Iuta, n aron Ana mwioko te UEA nakon Iotua. Ma ngaia are e a anganaki Eberon are ana kaawa Areb'a are taman Anaka, i bukina b'a Areb'a aia kaawa tibun Anakim.

14Ao Kareb'a e buakana Eberon mani kakioia nako kanoan Anakim aika Tetiai, Aiman, ao Taremai ma aia baronga nako.

15Ao i mwiina, e a manga buakaniia aomata Kareb'a ake a maeka i Tebira, are e aranaki ngkoa te kaawa aei b'a Kiriata-tebera.

16Ao e taku Kareb'a, “te m'aane ane e kataenikaia te kaawa are Kiriata-Tebera e na iein ma Nei Aketa ae natiu te aine.”

17Ai natin Kareb'a ae Oteniera E kataenikai Kiriata-Tebera, ao Kareb'a e anga natina are Nei Aketa b'a e na iein ma Oteniera.

18Ao ngke e a boo te mare ao e a tuanga buuna Oteniera are Nei Aketa b'a e na bubutiia tamana te tawaana. Ngke e ruo mai aon te aoti, ao e butim'aia tamana n tuangnga b'a tera ae tangiria.

19Ao e kaeka Aketa, “I tangira te tabo ae iai te koburake n ran iai, b'a a rangi ni m'auteretere abau ake ko a tia n anganai ake i maiaki.” Ma ngaia are e a anganna taian koburake-n-ran n taabo aika a rietaata, ao n taabo naba aika a rinano.

Aia kaawa te baronga are Iuta

20Aikai kaawan te moan m'akoro n aba are a anganaki utuun te baronga are Iuta b'a abaia,

21ake kaawa ake i maiaki ake i rarikin tian Etom aika: Kabeteera, Etera, Iakura,

22Kina, Rimona, Atata,

23Keteti, Atora, Itenan,

24Tiba, Terem, Bearota,

25Atora-atata, Keriota-etiron (Ke Atora),

26Amam, Tema, Morata,

27Ata-Kata, Etimon, Beta-bereta,

28Ata-tuara, Beera-teba, Bitiotia,

29Baara, Iim, Etem,

30Eretorata, Ketira, Orema,

31Tikeraka, Matemanna, Tantanna,

32Rebaota, Tirim, Ain, ao Rimmon. Uabwi ma ruaiwa bootan kaawa aikai ni kabane ni ikotaki naba ma kaawa aika a uarereke i rarikiia.

33Te kauoua ni m'akoro are a anganaki naba utuun te baronga are Iuta b'a abaia, ake kaawa ake n taabo ake a rinano; Etitaora, Tora, Atina,

34Tanoa, En-kannim, Tabua, Enam,

35Iaremuta, Aruram, Toko, Ateka,

36Tiaaraim, Aritaim, Ketere, ao Keterotaim. Bon tebwi ma aua bootan kaawa ni ikotaki ma kaawa aika a uarereke i rarikiia nako.

37Aikai kaawan te katenua ni m'akoro are a anganaki naba utuun te baronga are Iuta b'a abaia. Aika taian kaawa naba n taabo ake a rinano ake: Tenan, Atatia, Miketarakata,

38Riran, Mitibe, Ioketeera,

39Rakiti, Botikata, Ekeron,

40Kabon, Ramam, Kiteriti,

41Keterota, Beta-takon, Naama, ao Maketa. Bon tebwi ma onoua bootan kaawa aikai, ni ikotaki naba ma kaawa aika a uarereke ake i rarikiia.

42Aikai kaawan te kaaua ni m'akoro are a anganaki naba utuun te baronga are Iuta b'a abaia, ake taian kaawa ake n taabo ake rinano i nukan te aba: Ribena, Etera, Atian,

43Ibeta, Atina, Netib'a,

44Keira, Aketib'a, ao Maretia. Bon ruaiwa kaawa aikai ni ikotaki ma kaawa aika a uarereke ake i rarikiia.

45Aikai kaawan te kanimaua ni m'akoro are a anganaki naba utuun te baronga are Iuta b'a abaia, ake taian kaawa ake n abaia I-Biritia are i mataniwiin taari, aika; Ekiron ma kaawana aika a uarereke, ao taian maeka nako i rarikina,

46ao taian kaawa ma kaawa naba aika a uarereke i rarikin Atitota, mai Ekiron ni karokoa taari are te Mereterenian.

47Ao taian kaawa naba ake Atitota ma Kata ma kaawaia nako aika a uarereke, ma taian maeka i rarikina nako ni karokoa te karaanga are tian Aikubita ao taian kaawa ake i mataniwiin taari are te Mereterenian.

48Aikai kaawan te kaonoua ni m'akoro are a anganaki naba utuun te baronga are Iuta b'a abaia, ake kaawa ake n taabo ake a tabukibuki aika: Tiamira, Iatira, Toko,

49Tanna, Kiriata-tanna (ae Tebira),

50Anaba, Etitemo, Anim,

51Koten, Oron, ao Kiro. Bon tebwi ma teuana bootan kaawa aikai, ni ikotaki naba ma kaawa aika a uarereke i rarikiia.

52Aikai kaawan te kaitiua ni m'akoro are a anganaki naba utuun te baronga are Iuta b'a abaia, ake kaawa ake n taabo aika rietaata aika: Arabia, Ruma, Etian,

53Ianim, Beta-tabua, Abeke,

54Umta, Eberon, ao Tiora. Bon ruaiwa m'aitin kaawa aikai, ni ikotaki naba ma kaawa aika a uarereke i rarikiia.

55Aikai kaawan te kawanua ni m'akoro are e anganaki naba te baronga are Iuta b'a abaia; kaawa ake n taabo ake a rietaata i mainiku i maiakin aaba ake a tabukibuki aika kaawa aika:

Maon, Karemera, Tiba, Iuteta, Ietireera, Tanoa, Kain, Kibea,

56Ietireera, Ioketeam, Tanoa,

57Kain, Kibea, ao Timna. Bon tebwiina bootan kaawa aikai n ikotaki ma kaawa aika a uarereke i rarikiia.

58Aikai kaawan te karuaiwa ni m'akoro are a anganaki naba te baronga are Iuta b'a abaia, aika kaawa ake n taabo naba ake a rietaata i meangin aaba ake a tabukibuki aika kaawa aika: Areura, Beta-tura, Ketora,

59Maarata, Beta-anota, ao Eretekon. Onoua bootan kaawa aikai, n ikotaki naba ma kaawa aika uarereke i rarikiia.

60Aikai kaawan te katebwina ni m'akoro are a anganaki naba te baronga are Iuta b'a abaia, aika kaawa aika: Kiriata-B'aara (ke Kiriata-Iearim), ao Raba. Ti uoua kaawan te m'akoro aei, n ikotaki naba ma kaawa aika uarereke i rarikiia.

61Aikai kaawan te katebwi ma teuana ni m'akoro are a anganaki naba te baronga are Iuta b'a abaia, ake n taabo ake a karabee ake i mainiku, nakon m'aruan te Ioretan, aika kaawa aika: Beta-araba, Mirin, Tekaka,

62Nibetian, Te Kaawa n taoro, ao Enkeri. Bon onoua bootan kaawa aikai, n ikotaki naba ma kaawa aika a uarereke i rarikiia.

63Ao a uaia ni maeka aomatan Iuta ma I-Iebuti Ierutarem, ao n aki kona ni kakionakoia I-Iebuti mai Ierutarem. Ao anne bukina ae I-Iebuti a teimatoa ni maeka Ierutarem n reitaki ma aomatan Iuta.