1E karaoaki ana bareti Toromon i nanon 13 te ririki.
2Te Ru are Buakonikai boni ngaia te kabanea ni buubura i nanon te bareti. Ab'akina bon 45 te miita, 23 te miita rababana, ao 14 te miita rietaatana.
3Ao e rabunaki n tiiran Reb'anon. Bon iai bouana aika tiira, aika aua rinaniia: 15 te boua n teuana te rinan, ao a taui 45 taiani waannano aika tiira. E tiiringinaki naba n te tiira.
4Tenrinan taiani winto aika a kakaitara n iterana nako,
5ao iai naba tenua mataroana i aon iterana ake uoua i rarikin matan te ru are e buubura.
6Ao te ru are e buubura are e aranaki b'a Boua bon 23 te miita ab'akina ao 14 te miita rababana. A tei i matan te bareti taiani boua ake a taua raun te kaman.
7E mena ana kaintokanuea Toromon n te ru ae e buubura are e aranaki b'a Motikitaeka. E buta nanon te ru aei n taian tiira.
8E mena m'akoron te bareti are e maeka iai Toromon i akuun te ru are e buubura are Motikitaeka, ao ti te arona ma ngaia. E karaoaki naba ana tabo buuna are natin uean Aikubita te aine ae bon ti te bo ma ngaia.
9E karaoaki te kateitei ma ruuna nako aika a buubura ni moa man aana ni karokoa taubukina, man atiibu aika a rangi n tamaroa, aika a karauaki ni koreaki nakon buburaia ae e tangiraki, ao a karauaki ni kamaranaki n taian tao.
10A rangi ni buubura atiibun aana, ao a rangi n tamaroa. Iai tabeua mai iai aika 5 te miita ab'akiia ao tabeua 4 te miita ab'akiia.
11A kaweneaki taiani waannano aika taian tiira, ma atiibu ake a tia ni koreaki i aon taian atiibu ake taian aana.
12A karaoaki oon nako nanoaan te bareti man atiibu aika tennatao, ao teataona te kai ae e ab'ab'aki ae te tiira, kaanga ai aron taiani kaman ake mai moa, ao nanon te oo are i nanon te Tembora.
Te Karaob'ai Man te Buraonti Iroun Ira(2 Rongo 3.15-17; 4.1-10)13Te tia m'akuri n te buraonti te m'aane are Iram are kaain te kaawa are Turo. E a tia ngkai ni mate tamana are bon te tia m'akuri naba ma te buraonti, ao tinana boni kaain te baronga are Nabetari.
14Ao Toromon e butia Iram b'a e na nako Ierutarem ni karaoi b'aai man te buraonti i bukin b'ai n taromauri n Ana Tembora te UEA, ao e kariaia ni karaoi.
15Ao e karaoi uoua te boua Iram man te buraonti aika m'aane te miita ab'akiia ao e kaaniia uoua te miita buburaia.
16Ao e karaoi b'aran tabon taiani boua ake mai eta aika uoua te miita rietaataia aika taiani buraonti.
17Ao a katamaroaaki tabon boua akekei n itirinanin bannan taian tiein,
18ma uoua bannan taiani bamkuranete.
19Rietaatan b'aran tabon bouan taiani kaman bon 2 te miita ao kaanga taraan taiani kiebu.
20A mena bannan taian tiein ake i aon b'arani boua i tabon raoi mronronin tabon taiani boua ake uoua, ao 200 m'aitin taiani bamkuranete aika a rinan raoi i aon tabon b'aran te boua.
21Ao e karaoi uoua te boua Iram b'a teaina n iteran mataroan te Tembora are teuana, ao teaina n iterana are teuana. E aranaki te boua are n iterana mai maiaki b'a Iakin, ao aran are teuana n iterana are mai meang boni Boaati.
22Ao i tabon taiani boua boni b'araia aika ai aroni kiebu. Ao ikai are e a bane iai m'akurian taiani boua.
23E boni karaoa naba te boora ae e buubura Iram, ao e aranaki te boora arei b'a Taari. Boni uoua te miita rietana mai kabina nako mataniwiina i eta, ao e kaaniia 5 te miita rababana, ao 15 te miita mronronna.
24Uoua rinanin taiani katamaroa aika buraonti ni katobibia mataniwiin te boora, ao tebwina taiani katamaroa ni katoa 45 te tientemiita.
25E toka te boora arei i aon 12 katotongan taian kaom'aane. Ao a kaaitaraa mainiku, maiaki, meang, ao maeao kakateniman mai buakoia.
26Matenin te boora bon 10 te tientemiita, ao mataniwiina kaanga baan te uee aika a b'aoua nako tinaniku. M'aitin kanoan te boora bon 50,000 te riita.
27Ao e karaoi taian nangoa aika a konaa ni kabuubutaki Iram aika taiani buraonti aika uoua te miita rietaataia, uoua te miita ab'akiia, ao uoua te miita rababaia.
28Ao e karaoi rarikiia aika buraonti aika a raababa aika a kai mataniwiiaki, ao a katamaroaaki ni bannan taiani uee.
29A katamaroaaki taiani buraonti ake a raababa akekei ni bannaia raian, kaom'aane, ao b'aai ake iai baiia ni kiba.
30Iai wiran nangoa akekei aika kakaaeai n tatabeua nako ao kakateuana naba kanoaia ni katoai wiirana, ao a minomino naba i aona, ao teina ae e mronron ae 65 te tientemiita buburana ae e kamatoaaki ni buraonti aika aua aika kaka 45 te tientemiita rietaataia.
31Ao iai te boora ae e uarereke ae e toka i aona i nanon te mataniwi. A katamaroaaki n tamnein taiani uee, ao e katamaroaaki mataniwiina n tamnei aika taiani katoto. A tikuea taiani buraonti ake a raababa ake i rarikina,
32ao a mena i aana taiani wiira ma taiani kanoa. Rietan taiani wiira bon 65 te tientemiita
33ao kaanga ai aron taraan wiirani kaanibuaka ake a katikitikaki irouia taian aoti. A karaoaki bitiia are e tomai wiira ma nainaiia, ma waitekeia, ma kanoaia n taiani buraonti.
34Ao iai te b'ai ni katamaroa i aon mronronin taubukin taian nangoa akekei ae 20 te tientemiita terenakona ni katobibia, ao iai aua taiani b'ai n tautau.
35Ao a nim buraonti ake a raababa ma kainikamatoa ma taian nangoa,
36ao a katamaroaaki n tamnein taiani uee, ao bannan taian raian, baam, ao mannikiba.
37Ao e karaoi tebwina nangoa n te b'ainikab'aro ae ti teuana Iram n te aro are ti te arona buuburaia ma teia.
38Ao e karaoi naba tebwina boora aika a uarereke riki nakon are e buubura Iram, teuana i bukin teuana te nangoa. Bon uoua te miita buburan boora akekei n tatabeua nako, ao a konaa ni kanoaaki n te m'aiti ae 100 te riita.
39E katikui nangoa ake nimaua ni iteran te Tembora are maiaki, ao nimaua n iterana are meang, ao te boora are e buubura ni koonan te Tembora are maiaki mainiku.
40Ao e karaoi naba taian baan Iram i bukin mannang aika a kabuebue, ao e karaoa naba te tiabora ao taiani boora ni katimtim.
Tauani Mwiin B'aai Ni Kabane Inanon Te Tembora(2 Rongo 4.11—5.1)Aikai b'aai aika buraonti ake e karaoi Iram i bukin Ana Tembora te UEA:
41Uaai boua, uoua b'aran taboni boua aika tein te boora; uoua bannan taian tiein i aon taiani b'ara;
42400 bannan taiani bamkuranete i bukin bannan te tiein. Ao iai te b'ai ni katamaroa i aon mronronin taubukin taian nangoa akekei ae 20 te tientemiita terenakona ni katobibia, ao iai aua taiani b'ai n tautau.
43Tebwina taian nangoa aika a konaa ni kabuubutaki; tebwina boora aika a uarereke nakon ake a buubura ake b'ain taian nangoa;
44teuana te boora ae e buubura; tengaun ma uoman katotongan taiani kaom'aane aika e toka te boora i aoia;
45baanin taiani mannang, ao taian tiabora, ao boora ni katimtim.
E karaoi b'aai aika buraonti Iram i bukin Toromon
46i rarikin te karaanga are te Ioretan i marenan Tukota ma Taretan. E karaoi ni kab'aroa te buraonti ae kararaki nako nanon te b'ai ni kab'aro ae e karaoaki man te tano ae e ibe.
47A bon rangi n rawata b'aai aika buraonti aika e aki tabeakin Toromon n tau mwiin rawawataia, ao bon akea ae e roko n te ataia b'a iraua te buraonti aika a tia ni kamanenaaki.
48Ao aikai b'ain nanon te Tembora ake e tuatua Toromon b'a a na karaoaki man te koora: te baonikarea; te taibora are e totoka i aona te kariki are e tabu;
49Tebwina kaintein te taura ake a katukaki i matan te tabo are Moan te Tabu; katotongan taiani uee, ao taian taura ma m'anai aika koorai;
50m'angko; b'ain tiringan te taura; ao boora ni katimtim aika a uarereke; rauraun te b'ai ni kaboiarara; baanin te ai; ao ai intitin mataroan te tabo are Moan te Tabu ao te ru are te kabanea ni buubura n te Tembora.
51Ao ngke e a bane karaoan ana Tembora te UEA, ao e a kaaki i nanona b'aai ni kabane Toromon ake e a tia ni katabui tamana are Tawita i bukin te UEA, n ikotaki ma te koora ao te tirewa i nanon te ruunib'ai.
Who We AreWhat We EelieveWhat We Do
2025 by iamachristian.org,Inc All rights reserved.
