Iobi 22 - Kiribati New Version Bible

Ana katenua n taetae ni kawai Eribati.

1Ao e taku Eribati,

2“Tera boongara ngaira aika aomata,

nakon te Atua,

ao ngaira maibuakora ake kabanea ni wanawana?

3Ngkana bon akea am bure,

e na bon akea naba nanon aio

iroun te Atua ae moan te M'aaka?

4E koaua b'a E boaiko

i bukina ngkai ko tataromauria?

5Tiaki ngaia anne,

ma E karaoa anne i bukina ngke bon te tia bure ngkoe.

6I bukin kabaean tarim b'a e na kabooa mwiin te m'ane are e taarauia i roum,

ao ko anaa kunnikaina,

ao ko katikua ma akea kunnikaina.

7Ko rawa n anga te kariki ma te ran

nako ia aika baki mani kani mooi.

8Ko kamanena m'aakam ma nakoam

n taua aonteaba ni kabane.

9Ko aki ti rawa ni buokiia aine aika mate buia,

ma ko iraei naba aia b'ai ataei ake akea aia karo, ma ni karawawataia.

10Ao ngkai a otab'aniniiko taian rua,

ao ane ko na onrake n te maaku n te tai ae waekoa.

11E roko te rotongitong ae ko aki kona n noora iai te b'ai teuana,

ao e rabuniko te ieka.

12E koaua b'a E aki maeka te Atua i karawa are te kabanea n rietaata,

ao E baraaki n tarai aon taiani itoi, e ngae ngke a bon rietaata naba.

13Ma kam taku, “B'a tera ae na ataia te Atua?

E aki kona ni motika taekan temanna b'a a raba matana n taian nang aika rotongitong.

14Kam taku b'a e toki ana taratara n taian nang aika matenten

ngkana E tabe n nakonako i aon mronronin karawa.

15Ko tabe ni iangoa te toui

kawaia aomata aika buakaka?

16A uotaki nako n te ieka

e ngae ngke a tuai n roko aia tai.

17Aikai aomata aika rarawa nakon te Atua,

ake a taku b'a akea te b'ai ae E kona ni karaoia te Atua nako ia.

18Ma bon te Atua ae kabatiai aia b'ai

I aki kona n atai aia iango ni baba.

19A kukurei aomata aika raoiroi,

ao a ngarengare aika akea aia bure ngkana a nooria aomata aika buakaka ngkana a katuaaeaki.

20A bane ni kamaunaaki ana b'ai te aomata ae buakaka,

ao e kababanei ni kabuoki nikiran b'aai te ai.

21Iobi, Ko riai ngkai n ioki ma te Atua,

ma ni katoki arom nako Ina aika ai aron ana m'akuri te kairiribai;

b'a ngkana ko karaoa aei, ao E na kakab'aiako.

22Butim'aai reirei ngkana E anga;

kawakin Ana taeka i nanom.

23Okira te Atua ma te nanorinano,

ao katoki b'aai ni kabane aika buakaka ake a kakaraoaki i nanon am auti.

24Karenakoa am koora;

tewenakoi ake a rangi n raoiroi i buakon atiibun kabin te karaanga ae m'auteretere.

25Karika te Atua ae m'aaka b'a am koora,

ke te tirewa, ae uatao rake.

26Ao ane na kaoniko te Atua n te kukurei,

ao ko na tararake nako Ina ma te aki mamaa.

27E na kaeka am tataro ngkana ko tataro nako Ina,

ao ko na kaawakina am berita are ko karaoia nako Ina.

28A na kokororaoi bukin b'aai ni kabane aika ko karaoi;

ane na oota te oota i aon kawaim nako.

29E kab'akaia aika kainikatonga te Atua,

ao E kamaiuia aika nanorinano.

30E na boni kamaiuko ngkana akea am bure,

ngkana e bon eti te b'ai ae ko karaoia.