Maraki Taekan te boki aei - Kiribati New Version Bible

Taekan te boki aeiE reke te boki ae Maraki tabeua te tai i nanon te Kanimaua n tienture i mwiin katean te Tembora i Ierutarem (515 i m'ain Iesu). Te tai are a m'aiti iai aomatan Iuta ake a oki mai B'aburon, i boni m'aain naba okiia Etira ma Neemia. E a tia ni manga moanaki karaoan te Tembora, ao a manga moana karaoan aia m'akuri ibonga n anga aia karea aomata nakon te UEA. Ma iai matoatoan aei irouia aomata i bukina ngke e a mauna irouia kantaningaan boong aika a na roko aika a kakukurei i bukin Iuta. Kaanga akea karinean te UEA ke ana Tembora irouia aomata ma ibonga. A bon karaoi naba taian angakarea aika a bure ao a aki ongotaeka nakon ana tua nako te Atua. A karaoa ae e aki riai nakoia aika a maiu ni kainano ao aika akea korakoraia, ao a manga raure ma buuia aika m'aane.E kakaewenakoia aomata Maraki ao ai moa ra riki ibonga b'a a na kakaonimaki nakon te boraraoi are E a tia ni karaoia te UEA ma Iteraera. A na riai ni karinea te UEA n aia m'akuri n anga te karea ae eti raoi ao n aroia n anga kabwianib'ain aia tai nakoina. Ao e na kakab'aiaia iai te UEA.Oi n iango i aon te boki aei1. Ana tangira te UEA nakon Iteraera (1.1-5)

2. Ekakinakoaia ibonga (1.6—2.9)

3. Te boraraoi ae uruaki (2.10-17)

4. E na manga roko te UEA (3.1-4)

5. Tai kewe nakon te Atua (3.5-15)

6. E na anga te kaniwanga te UEA nakoia aika a kakaonimaki ao e na katuaaia aika a buakaka (3.16—4.6)