1.Uea 4 - Kiribati New Version Bible

Ana Aobitia Toromon

1Ao e riki Toromon b'a te uea i aon Iteraera ni kabutaa,

2ao aikai tauani mwiin araia ana aobitia Toromon aika taiani kabanea n rietaata: Ataria are natin Tatoka are te ibonga;

3Erioreb'a ao Aiia are natin Titia te m'aane ake taani koroboki; Ieotiab'ata are natin Airuta are e kakaawakini rongorongon te tautaeka;

4Benaia are natin Ieoiata are te kam'anta n te taanga ni buaka; Tatoka ao Abiata ake ibonga;

5Ataria are natin Natan are e tararuaia aobitia; Tabuta are natin Natan are te ibonga ao raoraon te uea.;

6Aitia are tararua te bareti; ao Atoniram are natin Abeta are e tararuaia taani m'akuri.

7Ao Toromon, e rineia tengaun ma uoman aobitia n aono aika a na uateia te uea ni uouoti kanana ma kaain ana auti ni bane. Temanna te aobitia e na katauraoa kanan aia uea man aia aono ni katoa teuana te nam'akaina ni katoa ririki.

8Ao aikai aobitia ake tengaun ma uoman n aono akekei:

Natin Ura te m'aane are e tararuai aaba ake a tabukibuki i Eberaim.

9Natin Tekera te m'aane are e tararuai kaawa ake i Makati, Tiaarebim, Beta-Temeti, ao Eron-Beta-Anan.

10Natin Eteta te m'aane are e tararuai kaawa ake i Arubota, Tokota, ao aonon Ebera.

11Natin Abinataba te m'aane e tararua Nabata-Tora, ao e mare ma natin Toromon te aine are Nei Tabata.

12Baana are natin Airuta te m'aane are e tararuai kaawa ake i Taanaka ao Mekito. E tararua naba te aba are i Beta-Tean ni bane are i rarikin te kaawa are Taretan, are i meangin Ietireera, mai Beta-Tean nako Abera-Meora nakon iteran Iokemeam are teuana.

13Natin Kebera te m'aane are e tararua te kaawa are Ramota i Kireata ao kaawa naba aika a uarereke i Kireata ake aia b'ai te utu are Iaira are kanoan Manate. E tararua naba aonon te aba are Arekoba i Batian, are iai kaawana aika onobwi aika iai ooia aika taiani buraonti bitin mataroana.

14Ainataba are natin Ito te m'aane, boni ngaia are e tararua te aba are Manaim.

15Aimaati boni ngaia are e tararua te aba are Nabetari ao e mare ma natin Toromon te aine are Nei Batemata.

16Baana are natin Utiai te m'aane, boni ngaia are e tararua te aba are Atera ao te kaawa are Bearota.

17Ieotiab'ata are natin Barua te m'aane, boni ngaia are e tararua te aba are Itaakara.

18Timei are natin Era te m'aane, boni ngaia are e tararua te aba are Beniamin.

19Kebera are natin Uri te m'aane, boni ngaia are e tararua Kireata ike a maeka iai uean Amora are Taion ao uean Batian are Oka.

Ao temanna te aobitia e tararua te aba are Iuta.

20A bon rangi ni m'aiti aomata aika a maeka i Iuta ao Iteraera ngke e uea Toromon n te aro are kaanga ai aron tanon aon te bike. A bane ni ngae n am'arake mani mooi aomata ao a kukurei.

21E bane n tautaekan aaba nako Toromon ake a mena i marenan te karaanga are Iuberetiti ao abaia kaain Biritia rikaaki ni karokoa Aikubita. A bane abanuea aikai ni kaakab'aka te taekiti ni kabane i nanon ana bongi ni maiu Toromon.

22E katoa bong Toromon n tangira teuana te tan te buraawa ae e a tia ni kamateaki, ao uoua ma te itera te tan te buraawa ae aki mantiraoi,

23Tengaun taiani kao aika a kaam'arakeaki n uita, Uangaun taiani kao aika a kaam'arakeaki n te uteute, 100 te tiibu, ao ai arona naba ma te ria, te ria are te ketere, ao te kuuti.

24E tautaekana te aono are i maeaon te karaanga are te Iuberetiti te uea are Toromon, ni moa mai Tibeta nako Kaata, ao e raoi ma aaba ni kabane.

25I nanon ana tai ni maiu Toromon ao a bane n rau aomata ake a maeka i aon Iteraera, ni moa man te kaawa are Taan i meang, ao n toki i Beerateb'a i maiaki. A tekateka ma te rau n aki kakiriweaki utu nako i aan arokaia te kureebe, ao arokaia te biiku.

26Iai 40,000 ana oonaoti i bukiia ana aoti ake a katikitika te ka ni buaka Toromon, ao 12,000 ana tautia ake taan toka i aoni kaanibuaka ake a katikitikaki rouia aoti.

27A uouoti kanan Toromon ma kaain ana auti aobitia n aono n tatabemaniia teuana te nam'akaina n te ririki. A katauraoi b'aai ni kabane ake e taekin,

28ai uana naba ma te b'aare ma uteute i bukin kanaia aoti.

29E wanawana Toromon. E kakab'aia te Atua n anganna te rabakau ma te ataib'ai.

Rabakaun Toromon

30E wanawana riki Toromon nakoia aomata nako n te aonnaba, ao nakoia naba taan rabakau ake i mainiku ao ake i Aikubita.

31E wanawana riki nakon Etan are kanoan Etira, ao natin Maora m'aane aika teniman ake Eman, Karekora, ao Tareta. E rikirake n tanoata taekan Toromon n aaba ni kabane ake i rarikin Iuta ao Iteraera.

32E koroi 3,000 taeka n rabakau Toromon, ao e otoi e raka i aon 1,000 taian anene.

33E kona ni kab'arab'arai aekakin aroka ni kabane, ni moa man aroka aika a buubura nakon aroka aika a buakoako aika a uarereke, ao e kab'arab'arai naba taiani man aika a kawakawa, mannikiba, maan ake a nakonako ni waeia aika uaai, ao taian ika.

34A ongo taekan rabakaun Toromon taiani uea n te aonnaba ao a kanakoi aia aomata b'a a na ongora n ana taeka n reirei.