2.Tamuera 22 - Kiribati New Version Bible

Ana Anene Tawita Nakon Te UEA

(Areru 18.1-50)

1Ao e anene Tawita nakon te UEA i mwiin kamaiuana mairouia ana kairiribai, ai moara ra riki Tauro. Aikai taekan ana anene:

2Ara UEA ao Atuara,

bon te b'a Ngkoe ae Ko korakora,

au nono, ao te tia kaawakinai.

3Bon te b'a Ngkoe

ae kamaiuau.

Bon otangau Ngkoe,

au b'ai ni buaka ae e korakora,

au tabo ni katantan.

Ko kamaiuai ao Ko kaawakinai

b'a N na aki ikoaki.

4I neboiko, au UEA!

I tataro nakoim,

ao Ko kamaiuai

mairouia au kairiribai nako.

5E otab'aniniai kaanga marawa

te mate,

ao I kurimaraa ni kab'autaki

n te ieka.

6E niroaai

te roobu man

abaia maate,

ao e kawenea te b'ainikam'ane

i m'aain kawaiu te mate.

7I a reke n te kangaanga ae e kakamaaku

ngke I weewete nakoim,

ma Ko ongo b'anaau

man am tembora

ao Ko kaekaa au tataro.

8E m'aiei te aonnaba ao I ruru!

A ioioaki n aki akaaka

bouani karawa.

Ko un ngkoa

9ao Ko katinakoa te bubu mai nanom.

E oti nako mai wiim

te kabuebue ae e korakora ao te ai ae e urarake.

10Ko kauki taiani karawa

kaanga taian roki,

ao Ko ruorikaaki

ma taian nang ni buakani karawa

i aani waem.

11Ko toka i aon boraueaia maan aika a maiu.

Ko kaoti

ma baim ni kiba aika taian ang.

12Am autinrianna bon te rootongitong!

E kaonaki karawa n nangin tabuariki,

are e karabako b'a Ko na aki nooraki.

13E kaura karawa te kooro ae e uraurake

i matam.

14Te UEA ae Moan te M'aaka, e rurunga b'anaam

man taian karawa.

15Ko kamaenakoia am kairiribai

n te kanoanikatebe are iti ni karawa.

16Ko rurunga i marawa,

ao a nooraki

karawarawan nanoni marawa aika a rangi n nano.

Ko ringongo,

ao e ioioaki te aonnaba

ma aana nako.

17Ko kaaenakoa baim mai ieta

ao Ko tabekai rake

mai kabin marawa.

18Ko kamaiuai mairouia au kairiribai nako

ake a rangi n riribaai

ao a I aki konai moaia.

19A roko ni buaka,

i nanon tain rokon te kabuanib'ai

ma Ko kamanoai

20Ngke I a niniaki nako,

Ko kainaomataai ao Ko kamaiuai

i bukina ngke Ko tangirai.

21Ko karaoa ae e raoiroi nako iu, te UEA

i bukina ngke I karaoa ae raoiroi,

Ko anganai kaniwangau

i bukina ngke bon akea au bure.

22I karaoa te b'ai are Ko tangiria

ao I aki roko n te rairaki nakon karaoan te buakaka.

23I kaawakin Am tua inanou

ao I aki roko n te rairaki nako

man Am taeka n reirei nako.

24I ongo taeka raoi Iroum

ao I kaawakinai man te bure.

25Ko a tia ni karaoa ae e raoiroi nako iu

i bukina ngke I karaoa te raoiroi;

Ko anganai kaniwangau

i bukina ngke akea au bure

ni kaineti ma Am kainibaaire nako.

26Ko aki toki ni kakaonimaki

nakoia Am aomata aika a kakaonimaki,

ao Ko onimakinaki

irouia aika a onimakinaki.

27Ko taua ma nanom nakoia

ni kabane aika a taua naba ma nanoia,

ma nakoia aika a aki kakaonimaki

Ko karaoa are e bon riai n reke nakoia ni mwiin aia m'akuri.

28Ko kamaiuia aika a nimaamannei,

ma Ko iaiangoa kab'akaan

te aomata ae e kainikatonga.

29Te UEA ae te Atua,

bon au taura Ngkoe.

Ko onika te rootongitong nakon te oota.

30Ko buaka ni kataenikaiia au kairiribai

ma n taui aia kaawa nako.

31A tamaroa kawaim, te UEA

ao a eti raoi am taeka.

Bon te otanga Ngkoe nakoia

aika a biri nakoim ni kakaaea buokaia.

32Bon ti Ngkoe te Atua!

Bon ti ngkoe te b'a ae e korakora.

33Bon au nono Ngkoe ae e korakora,

ao ko kainaomataai.

34Ko kabirim'akai waeu

kaanga waen te ria,

ao Ko buokai ni kateirakeai

i aon taiani maunga.

35Ko reireia baiu aron te buaka

ao a taneiai anganibaiu ni kamanenaa

te kainikatebe te buraati.

36Bon ti Ngkoe otangau,

ao e riki n tanoata taekau,

man rokom ni buokai.

37Ko kaitiaka te kawai ibuku,

ao ngkai e a aki baebae waeu.

38I teimatoa ni kakiokioia au kairiribai

ni karokoa a reke irou

ao I uruan aroia.

39I uruan aroia!

I kanim'a au kabaang inanoia au kairiribai,

ao a manatua

i aan waeu.

40Ko buokai ni katokanikaiai

ao ni kairoroia taani buakaniira

b'a a na riki b'a konau.

41Ko kabiri nakoia au kairiribai,

ao I tiringiia.

42A tangira buokaia

ma bon akea temanna ae kamaiuia;

a weeweteiko,

ma bon akea te kaeka.

43I taobekaiia i buakon te tano,

ao I kamanatuaia

kaanga te bokaboka i nanon kawain nako nuukan te kaawa.

44Ko kamaiuai

mairouia au aomata aika a taningamatoa

ao Ko karaoai b'a te tia kairiiri

irouia botannaomata ianena,

aika a riki ngkai b'a au tia m'akuri.

45A ongotaeka ao a kawakawa n roko nako iu.

46E a tia ni mauna nako korakoran nanoia

ao a roko ma te ruru

man aia nono nako.

47Ko boni maiu te UEA!

N na neboiko!

Bon au b'a Ngkoe ae e korakora.

N na neboiko

i bukin am m'akuri ni kamaiuai.

48Ko ira taangau,

ao ko kaaki botannaomata nako

i aani m'aakau.

49Ko kaawakinai

man aia tiritiri au kairiribai,

ao Ko karaoai b'a N na korakora

riki nakoia ni kabane.

50N na neboiko, te UEA,

ao N na neboiko

i buakoia botannaomata nako.

51Ko anga taian tokanikai aika a mimitong

nakon am uea ae e rineaki.

Bon akea tokin am kakaonimaki nakon Tawita

ao i bukiia ana kariki

n aki toki.