Te Minita 5 - Kiribati New Version Bible

Taratara Raoi Ngkana Ko Taromauri

1Taratara raoi n te b'ai ae ko karaoia ngkana ko rin n ana Tembora te Atua. Iai tabeman aomata aika a nanobaba aika a nako ikekei n angakarea, e ngae ngkana bon akea aia bure. Ma e raoiroi riki ngkana ko ti kakauongo ngkana ko nako n taromauri.

2Ko na iango i m'aain ae ko taetae ke karaua raoi ni iangoia i m'aain ae ko karaoi am berita nakon te Atua. E mena te Atua i karawa, ao ngkoe ko mena i aon te aonnaba, ma ngaia ae, tai rangi ni b'arantiko.

3Ngkana ko kateimatoa iangoan te b'ai teuana, ao ane ko na miiakinna. Ngkana ko rangi ni b'arantiko ao ane e na bure te b'ai ae ko taekinna.

4Te Atua e aki tangiriia aomata aika a nanobaba. Ma ngaia ae, ko na aki waeremwe ni kakoroa bukin am taeka ni berita nakon te Atua.

5E raoiroi riki ngkana ko bon aki karaoa te berita, nakon ae ko karaoa te berita teuana ao ko aki kakoroa bukina.

6Ke e tai karekeko wiim n te kaangaanga! Ao ko na aki kaangai nakon te tia kaira te taromauri, “Kai I bon taetae ni manikangare.” E konaa te Atua ni kamaunai am b'ai ni kabane aika ko a tia ni karekei n am m'akuri, ma ngaia ae, ko na aki taekina te b'ai teuana ae e na un iai te Atua.

7Karinea ao ongotaeka iroun te Atua! E na kairiko te iango ni mii nakon taetae aika akea nanoia.

8Ko na aki kubanako ngkana a kabuakakaaki aomata aika a maiu ni kainano i aon abam, ao e na oneaki mwiin te eti n te kaairua. A na riai ni karaoa te b'ai are a tuangaki mataniwi aika a rinano irouia ake a rietaata.

9I bukina ngke te kabanea n rietaata ni mataniwi te uea, ao e m'aiti riki tib'angana man te taekiti are e kab'akaaki man te aba.

10Ngkana ko tangira te m'ane ma te kaub'ai, ao ko na bon aki konaa n rauaki ni b'aai akana iroum. Bon akea naba nanon aei.

11M'aitin am b'ai, boni m'aitin naba ae a kaantaningaia aomata nako mairoum. Bon akea te b'ai ae e raoiroi ae e na anganiko am m'ane—ane a na kabanea tem'angina i bukim.

12Ngkana ko m'akuri korakora i bukin maium, ao ko na boni motirawa raoi n te tairiki, e ngae ngke e aki rangi n tau m'aitin kanam. Ma ngkana ko kaub'ai, ao ane ko na aki konaa ni matu raoi.

13I a tia n noora te b'ai ae e rangi ni kaairua. A kaub'ai aomata, ma bon akea raoiroina nakoia.

14Ao ane a na karina ni bua b'aai ni kabane ake a karekei man te anga n iokinib'ai ae e buakaka, ao ane e na akea ae e na tiku i bukiia natiia.

15A roko nakon te aonnaba ni bebeekan, a na mate, ao a na bebeekan naba. Bon akea te b'ai ae a konaa ni uotia nako, ao akea naba te b'ai ae a na konaa ni kaotia i bukin aia m'akuri ni kabane.

16Anne bon te b'ai ae e rangi ni kaairua. A kiitana te aonnaba n aron are a moan roko naba iai. Bon akea te b'ai ae a karekea i mwiin kakiokioan te ang.

17I rarikin aikai, ao a aki toki n am'aam'arake n te roo, a aki rau, a aoraki ao a un.

18Tera te b'ai ae e rangi ni kakaawaki ae e riai ni karaoaki n te maiu ae e rangi ni uarereke ae e anganiira te Atua? I taku b'a ti riai ni kukurei n te am'aam'arake, te momooi, ao te m'akuri korakora.

19Iangoia b'a aongkoa ko a rangi ni kaub'ai, ao ko a kukurei n am b'ai nako. I mwiina, waakinako ao kakukureiko n te m'akuri ae e rawaawata-bon aei ana b'aintangira te Atua nakoim.

20E na kateimatoa kukureim ae moan te bati te Atua, n te aro are ko na m'aninga iai raraoman nanom ni boong nako.