1E taku te UEA nakon Moote n te bong teuana, “Korei atiibu aika uoua aika a rabaaba n aron are te moan are I a tia ni karaoia, ao N na korei i aona taian tua aika ti te bo ma ake n te moan atibu, ake a tia n uruaki.
2Katauraoiko nakon te ingabong n te moaningabong b'a ko na tam'arakea te Maunga are Tinai ni kawarai i taubukina.
3Bon akea ae e na iriko ke n toka naba i aon te maunga. Bon akea naba ae e na kaam'arakea ana tiibu ke ana nanai ni kao i oin te maunga.”
4Ma ngaia are, e korei atiibu aika a rabaaba Moote n aron ake taian moa n atiibu, ao n te moaningabong are i mwiina e uoti nako taubukin te Maunga are Tinai, n aron are E a tia ni mwiokoia te UEA iai.
5E ruorikaaki te UEA ae te Atua i aon te nang ao E tei i rarikin Moote ikekei i aon te maunga. Ao E taekina arana ae e tabu te Atua, “ae te UEA”.
6Ao i mwiina, e ri matan Moote ao e weewete ni kaangai, “Bon te UEA Ngai ae te Atua. I nanoanga ao I taotaonaki n nano nakoia au aomata. I kaota nakoim te tangira ae e korakora, ao te kakaonimaki.
7I kakaawakina au berita nakoia au aomata n aki toki, ma I katuaaia aomata nako aika a bure. Ngkana a bure aomata, I katuaaia ma natiia, ao tibuia naba ma tibutoruia, ao tibutarataraia.”
8Ao e kawaekoaa ni boobaraaki Moote nako aontano ao e taromauriia te UEA.
9Ao e tataro ni kaangai, “Te UEA, ngkana arona b'a Ko bon kukurei irou, ao I tataro b'a Ko na iriira. E bon koaua ae bon taani bure aomata aikai ao taani kamangao, ma Ko na kab'arai ara bure ao karikiira b'a am aomata.”
Te Berita Ma Te B'ai Ae E Tangiria(Te Oti 23.14-19; Te Tua 7.1-5; 16.1-17)10E taku te UEA:
I berita b'a N na karaoa te kakai i bukimi ae kam tuai man noonoria n taabo tabeua n te aonnaba aei. A na tei ni maaku botannaomata aika i rarikira ma n ataia b'a bon Ngai ae I karaoi b'aai aika kakai aikai.
11N na kairoroia ni kanakoia kaain Amora, kaain Kanaan, kaain Eta, kaain Beriti, kaain Iwa, ao kaain Iebuti, ao kam riai ni karaoa te b'ai ae I mwiokoingkami iai n te bong aei.
12Kam na aki karaoa te iraorao ma temanna mai buakoia aomata aikai. Ngkana kam karaoa anne, ao e na riki b'a te m'aruarua ni kam'ane.
13Kam na onea mwiin anne n urua aia baonikarea ma ni kamaeei taian boua ake a tabu
14I rangi ni kainanoa ami kakaonimaki ni kabane--kam riai n aki taromauri anti tabem'aang!
15Kam na aki raorao ma aomata ake ikekei, b'a kam kaawa ni manga taromauri anti ma n iri buakon aia am'arake n angakarea.
16Ane a na mare ami mm'aane ma aia aine ma ni kakairi n taromauriaia antiia.
17Kam na aki karaoi bannan antiia man taian biti.
18Kam na aki m'am'aninga ni karaoa te Toa are te Kariki are Aki Karikaki n te nam'akaina are Abibi.
19Au b'ai karimoa mm'aane man ami utu nako ao ami nanai n tiibu ao ami nanai ni kao.
20Kam konaa ni katokaa kain te aati ni kareana te tiibuteteei; ao ngkana kam aki, ao kam riai n otea roroan te aati. Kam riai ni kamaiuia karimoa mm'aane ni kabane.
21Kam na karaoa ami m'akuri i nanon onobong ao kam na motirawa n te kaitiua ni bong, e aoria naba ngkana e b'akara nanon bongin te ununiki ma te tai.
22Kam na bukamarua te Toa ae M'anganikaai ni karokoa tokin te aumeaang ngkana kam taiia uaan te uita, ao ni bukamarua te Toa ae M'anganikaai ni katoa tokin te aumaiaki ngkana kam kiniki uaa.
23A na riai n roko ami mm'aane n taromauriai tenua te tai n te ririki, i bukina b'a bon te UEA Ngai ae Atuan Iteraera.
24N na kanakoia botannaomata ake i abami, ao N na kabuubura tian abami. Ao e na bon akea temanna ae e na konaa n anaa ami b'ai ngkana kam roko n taromauriai tenua te tai ni katoa ririki.
25Kam na aki anga te kariki ae e itinaki ngkana kam kareana te man i aon te baonikarea. Ao kam na aki katuka nikiran te man anne n te Riao nakon te bong are i mwiina.
26Bon te UEA Ngai ae Atuami, ma ngaia are, kam riai ni uoti moan uaan ami tai nakon te tabo n taromauri.
Kam na aki kaburoa te kooti ae e uarereke i nanon mirikin tinana.
27E tuanga Moote te UEA b'a e na koroi taian tua n taian koroboki, b'a kanoan te boraraoi ma Iteraera.
28E tiku Moote ma te UEA i aon te maunga i nanon abwi te ngaina ao abwi te tairiki, n aki am'aam'arake ke ni mooi. Ao e koroi Tuua ake tebwiina, ake m'akoron te boraraoi aika a rangi ni kakaawaki i marenan te Atua ma ana aomata.
E Ruorikaaki Moote Mai aon te Maunga are Tinai29E ruorikaaki Moote mai aon te Maunga are Tinai, ao e uoti Tuua ake Tebwiina. E oota moana n oota nako i bukina ngke E a tia n taetae te UEA ma ngaia. Ma e aki ataia n te moan tai Moote ae e oota nako moana.
30Ao ngke a taraa Moote teuare Aaron ma raona ake tabeman, a nooria b'a e oota nako moana, ao a maakua ni kaaniia.
31Ao e weewetea Aaron teuare Moote ma taani kairiiri b'a a na kawaria, ao e taetae ma ngaiia.
32Ao a ikotaki ni katobibia Moote nikiraia Iteraera, ao e anganiia taian tua ake e anganna te UEA i aon te Maunga are Tinai.
33Ao e bon teimatoa naba n oota nako moan Moote, ao ngke e tia n taetae ma aomata, e a rabuna moana n te rabuna ni mata.
34E aki toki ni kaakanakoa te rabuna ni mata Moote ngkana e rin n te Um'antabunrianna n taetae ma te UEA. Ao ngkana e oti nako, e na tuangiia aomata nako b'aai ni kabane ake e a tia n tuangnga te UEA.
35Ao a nonoora moana b'a e bon teimatoa naba n oota nako. Ma ngaia are, ngkana e tia n taetae ma ngaiia, e na rabuna matana n te rabuna ni mata ma ni katikua i matana ni karokoa manga rokona are i mwiina n taetae ma te UEA n te bong are i mwiina.
Who We AreWhat We EelieveWhat We Do
2025 by iamachristian.org,Inc All rights reserved.
