Nakoaia Ibonga 5 - Kiribati New Version Bible

Buure Aika A Tangira Te Angab'ai I bukin Te Bure

1Aikai buure ake a tangira te Angab'ai I bukin te Bure.

Ngkana iai ae e tangiraki b'a e na anga te kakoaua n te bowi, ao e aki anga te rongorongo n te b'ai are e nooria ke e ongo raoi, e na riai n okiria mwiina.

2Ngkana iai ane e riinga te b'ai ae kam'araa n tuan te taromauri, n aron te man ae e mate, e na kam'araa iai ao e bure iai n te tai naba are e namakina te b'ai are e a tia ni karaoia.

3Ngkana iai ae e riinga te nakotaari ae e kam'araa ae nakotarin te aomata n tiaki nanona, ke tao tera riki ae e kam'araa, e na bure iai ngkana e a ataa te b'ai are e a tia ni karaoia.

4Ngkana iai te aomata ae e karaoa te taeka ni bau n aki akaaka, e na kaboaki ana bure iai n te tai naba are e ataa iai te b'ai are e a tia ni karaoia.

5Ngkana e reke n te bure te aomata, e na riai ni kaota ana bure,

6ao tuaana i bukin ana bure e na uota te tiibu te aine, ke te kooti b'a ana karea nakon te UEA. Ao a na anga te karea anne ibonga i bukin ana bure te m'aane anne.

7Ngkana arona b'a e aki konaa te aomata ni karekea te tiibu ke te kooti, ao e na uoti nakon te UEA b'a boon ana bure uoman te taobe ke uoman te bitin. Temanna i bukin te karea ni kab'arabure, ao are temanna i bukin te karea ni kabuokaki.

8E na uoti nakon te ibonga, are e na moan anga te mannikiba i bukin te karea ni kab'arabure. E na otea roroana, ma e na aki buuta roroana

9ao e na tatauriia rarikin nako te baonikarea n raraana. Nikiran te raraa e na kab'aroaki i oin te baonikarea. Bon aei te karea i bukin kab'araan buure.

10Ao i mwiina, e na anga te kateniman ni mannikiba b'a te karea ni kabuokaki, ni kaineti ma taiani kaetieti. E na anga te karea te ibonga n te aro aei i bukin ana bure te m'aane anne, ao a na kab'araaki ana bure.

11Ngkana arona b'a e aki konaa te aomata ni karekei uoman taian taobe ke uoman taian bitin, ao e na riai ni uota teuana te kirokuraem te buraawa b'a te karea ni kab'ara bure. E na aki riai ni kaaki b'aan te oriwa teutana i aon te baonikarea ke teutana naba te b'ai ni kaboiarara are e kaakabubuaki, i bukina b'a te karea ni kab'arabure, ao tiaki te karea are te uita.

12E na riai ni uoti nakon te ibonga, are e na anaa te abutana mai iai b'a te b'aintangira are kaanga arina ae e na anganaki te UEA, ao e na kabuokia i aon te baonikarea b'a te karea are te am'arake. Bon te karea i bukin kab'araan buure.

13E na anga te karea te ibonga n aron aei i bukin ana bure te m'aane arei, ao e na kab'araaki ana bure. Ao nikiran te buraawa e na b'ainna te ibonga, n aron are karaoaki naba n te anga karea are te uita.

Te Angab'ai Ni Kabomwi

14E angan Moote tuua aikai te UEA.

15Ngkana iai ane e bure n tiaki nanona b'a e aki kab'aka boon te b'ai are tabu i bukin te UEA, ao e na riai ni uota ana karea are te kabomwi nakon te UEA ae te tiibu m'aane, ke kooti aika akea toabuakan rab'ataia. E na baaireaki kanoana ni kaineti ma te baaire ae e b'ainaki n te Tembora.

16E na riai n anga ana kabomwi ake e aki konaa ngkoa, ao e riai b'a e na raonna n te bakao ae uabwi te katebubua. E na anga nakon te ibonga, ao e na anga te man te ibonga b'a te karea i bukin ana bure te tia bure arei, ao e na kab'araaki ana bure iai.

17Ngkana iai ae e bure n tiaki nanona b'a e urui ana Tua te UEA, ao e bure iai ao e na riai ni kab'aka tuaana.

18E na riai ni uoti tiibu m'aane ke kooti aika akea toabuakan rab'ataia nakon te ibonga b'a ana karea are te kabomwi. E na katautauaki m'aitin boona ni kaineti ma te babaaire ae e b'ainaki n te Tembora. E na riai te ibonga n anga te karea i bukin te bure are e karaoia te m'aane arei n tiaki nanona, ao e na kab'araaki ana bure iai.

19Bon te karea ni kabomwi i bukin ana bure are e a tia ni karaoia nakon te UEA.