Warekaia Iteraera 14 - Kiribati New Version Bible

Ekakinakoan Moote Irouia Iteraera

1Ao ngke a tia n ongora te ribooti Iteraera irouia mm'aane ake tengaun ma uoman ake a nako n tuoa aon Kanaan, ao a tang ni karokoa te ngaina

2ao a ngurengure nakon Moote ma Aaron ao a taku, “E raoiroi riki ngke ti mate i Aikubita, ke n te tabo teuana i nanon te rereua!

3E boni kairiira n nako Kanaan te UEA b'a ti na bane n tiringaki ma n tauaki ara aine ma ataei b'a taenikai? E raoiroi riki ngke ti mena i Aikubita.”

4Ao a i taetae i bon i rouia, ao a taku, “Ti na karekea ara tia kairiri temanna, ao ti na okira Aikubita.”

5Ao e bobaraaki Moote n tataro i mataia aomata.

6Ao a raeuai kunnikaia Iotua ma Kareb'a i bukin rawawatan nanoia

7ao a taku:

Ti bon noora raoi te tabo arei i matara, ao e bon rangi n raoiroi.

8Ngkana ti ongotaeka iroun te UEA, ao E na bon anganiira te aba are kaub'ai n te miriki, ao a na karewe te manibeeru.

9Ma ngaia are, kam na aki rarawa nakon te UEA. Bon akea bukina b'a ti na maakuia aomata ake a maeka ikekei. E tei te UEA i bukira, ao a na bon aki kona ni kataenikaira!

10Ao a bane aomata ni bononnanoa karebanaia Moote ma Aaron n taian atiibu ni ua mateia. Ma E karina ni kaoti te UEA n te nang i nanon te Um'antabunrianna.

Ana Tataro Moote I bukiia Aomata

11Ao E taetae te UEA nakoni Moote ni kaangai, “I a tia ni karaoi b'aai aika a ab'ab'aki i bukiia aomata aikai, ao a rawa i Rou ngke a aki onimakina m'aakau.

12Ma ngaia are, a na aki atongaki b'a Au aomata, N na tiringiia, ao N na karikiko b'a aia bakatibu botannaomata aika korakora riki nako ia.

13Ao e kaeka Moote: Ko kamaiuia aomata aikai mai Aikubita ni m'aakam ae korakora, ao ana bon ongo kain Aikubita baike ko a tia ni karaoi nako ia am aomata aikai,

14ma ngaia are, ti butiiko b'a Ko na aki tiringiira i nanon te rereua ikai.

15B'a ngkana Ko tiringiira, ao ane a na ongo kaain Aikubita, ao a na tuangiia kaain Kanaan.

16A kaman ataia kaain Kanaan b'a bon Am aomata ngaira, ao ti aki toki n itaramata ma Ngkoe. A tia naba n ongo arom ni kairiira n te nang ae matenten n te ngaina, ao te ai n te tairiki.

Ma ngkana Ko tiringiira, ao ane a na taku b'a e aki tau korakorani m'aakam ni kairiira nako Kanaan n aron Am berita.”

17Ko na kaota m'aakam ae korakora nako ira te UEA. Ko berita ngkoa

18b'a Ko tangiria ni kaota te akoi ma te nanoanga. Ao Ko taku naba b'a Ko rangi n taotaonakinano, ma Ko bon katuaaia naba aika a tia n karaoa te m'akuri ae bure, tiaki ti ngaia ma Ko katuaaia naba natiia, ao natin natiia.

19Ko rangi n akoi, ao Ko karaoa ae raoiroi riki nakon are e bon riai n reke nakoia. Ma ngaia are, ti butiiko b'a Ko na kab'arai aia bure aomata aikai n ai arom naba ngkoa ngke Ko kab'arai aia bure ngke ti kiitana Aikubita ni karokoa te tai aei.

20Ao E taku te UEA nakoni Moote:

I kab'arai aia bure i bukin kaekaan am tataro.

21Ma ngkai I boni maiu, ao bon akea tokin m'aakau,

22ao I tuea b'a akea mai buakoia koraki aikai ae na noora te aba are I berita iai nakoia aia bakatibu b'a N na anganiia.

23A tia n noora m'aakau koraki aikai i Aikubita, ao n te rereua, ma a na bon aki noora Kanaan. A m'aiti aia tai n aki ongeaba nako Iu, ao ni kataai.

24Ma e bon rangi ni kaokoro au toro are Kareb'a ma ngaiia i bukin ana kakaonimaki nako Iu, ao N na boni kariaia riaoakin te Ioretan nako Kanaan irouna, ao a na maeka kanoana ikekei.

25Kakauongo ngkai Moote! A maeka kaain Amareka, ao kaain Kanaan n taian m'arua ake i Kanaan. Ao nakon te ingabong ko na manga rairaki n okira nanon te rereua n kaineta Taari are Uraura. Katuaeakiia Iteraera I bukin Ngurengureia

26Ao te UEA, E tuanga Moote ma Aaron

27b'a a na anga ana rongorongo nakoia Iteraera ae kaangai:

28A m'aiti ami tai ni ngurengure nako Iu ngkami aika aomata aika taani bure! Ao ngkai I berita i boni i Rou b'a N na anganingkami te b'ai are kam bon tangiria.

29Kam na boni mate i nanon te rereua aei, ao a na raea rab'atami i aon te tano. Kam a tia ni kamatauningaai, ao bon akea mairoumi ngkami mm'aane aika ai 20 ami ririki ni maiu,

30ae na rin n te aba are I a tia ni berita iai b'a N na anganingkami b'a abami ni koaua; a na ti rin iai Kareb'a ma Iotua.

31Kam raraoma ngkoa i bukiia natimi b'a a kaawa ni manga tauaki b'a taian taenikai. Ma boni Ngai ae te UEA, ae N na bon karokoia n te aba are kam ribaia.

32Kam na mate i nanon te rereua ikai!

33A na tiotio nako natimi i nanon te rereua aei i nanon abwi te ririki, n rawawata i bukin ami bure n karokoa te tai are kam bane ni mate iai ngkami aikai.

34N na boni karawawata tuaami ni katoabong i nanon abwi te ririki. Teuana te ririki i bukin teuana bongin tuoan ngkoa te aba arei.

35Kam na boni mate i nanon te rereua aei ngkami aika taani bure ake kam a tia ni bobotakiia kaaitaraau.

36A tia n uota rongorongon te aba arei ae buakaka mm'aane ake tengaun ake a nako ngkoa n tuoa te aba arei, ao a kangurengurei nanoia aomata nakon te UEA.

37Ma ngaia are, E kanakoa te aoraki ae kamamate are tiringiia mm'aane akekei,

38ma E kamaiuia Iotua ma Kareb'a.

Kab'akaia Iteraera n Niniia Kanaan(Te Tua 1.41-45)

39Ao a rangi n nanokawaki aomata i mwiin anganakiia Ana rongorongo te UEA irouni Moote.

40Ma ngaia are, a utim'aaka n te bong are i mwiina, ao a katauraoia ni m'ananga nakon te aba are tabukibuki are i Kanaan. Ao a taku, “Ti boni bure ngke ti ngurengure iroun te UEA. Ti a nako nakon te aba are E a tia ni berita iai nako ira.”

41Ma e kaeka Moote ni kaangai, “Kam a tia n aki ongeaba nakon te UEA, e na bon aki koro bukin ami iango,

42ma ngaia are, kam na bon riai n aki manga kataia ni karaoia. E aki kani manga buokingkami te UEA, i bukina ngke kam a tia n tannako mai Rouna.

43A na buakaningkami ami kairiribai ake kaain Amareka, ao kaain Kanaan, ao a na tokanikai i aomi.”

44Ma a aki kani kubara Moote Iteraera, ao a bon m'ananga naba nakon aaba ake a tabukibuki, e ngae ngke e tiku Moote ma te Atiniberita.

45Ao a ruorikaaki kaain Amareka ma kaain Kanaan man te aba are tabukibuki, ao a kataenikaiia Iteraera, ma ni kakioia nako ni karokoa te kaawa ae buubura are Oma.