Etita 1 - Kiribati New Version Bible

Rawan te ueanaine n ira nanon Keatiti are te uea.

1Aio te bae e riki n ana tai Keatiti, te Keatiti are e tautaeka i aon 127 te aono i aon Inria n toki i Kuuti:

2Uean Botia are Keatiti e maeka n atuun kaawan ana tautaeka are Tutian, ao e tautaekan burawinti aika 127 mai Inria ni karokoa Itiobia.

3Ao n ana katenua n ririkin tautaeka, e karaoa ana baka n ana am'arake ae e ab'ab'aki i bukiia ana aobitia ma ana taani kairiiri. Ao a roko naba taan kairiiri man te taanga ni buaka mai botia ma Miria, n reitaki naba ma taian kowana ma aomata aika kakannato man aaba nako mai nanon abanueana.

4Ao e kaoti kaub'aina ma kakannatona i nanon te maan ae e nakon tebubua waningaun te bong.

5Ao i mwiin anne, ao e a karaoa ana baka n am'arake te uea ni kaawan ana tautaeka are Tutian, i bukiia aika a kaub'ai ma aika a kainano n akea kakaokoroaia. Bon teuana wiikina, ao e karaoaki i nanon onarokan ana bareti te uea.

6E katamaroaaki ana bareti te uea n taiani keeten aika a buruu ma ni mainaina, ao a kabaeaki ni karain rinen aika a taim'anuokai aika a raraoi, aika a bae nakon taian m'am'a aika tirewa aika a mena i aon taiani maabora aika a tei ni rinan. Ao a kaotinakoaki taiani kainiwene aika koora ma tirewa nako nanoni m'aneaban te bareti, are e katamaroaaki nanona n taian maabora aika a kiriin ao a mainaina, ma atiibu aika a tamaroa, ma taiani b'aeao aika a raneanea. Ao a rabunaki kaintekateka aika a ab'ab'aki ni kunnikai aika a maraurau aika a bati mataia, ao a mena taian rooti i mataniwiia.

7A kabutaki taiani mooi n taiani m'angko koora, aika a bane ni kakaokoro aekakiia, ao e kukurei te uea n anga te wain are bon ti niman te uea.

8Bon akea tian te mooi arei, b'a e a tia te uea n tuangiia taani m'akuri n te bareti, b'a a na bane ni mooi aomata ni bon tokin nanoia.

9Ao i mwiin tabeua te tai, ao e a manga karaoa ana baka n am'arake te ueanaine are Nei Watiti i bukiia aine.

10Ao n te kaitiua ni bong, ao e a manging te uea, ao e a kukurei, ma ngaia are e a kawaekoaia ana iunaki ake itiman ake; Meuman, Bitita, Arebona, Bikete, Abaketa, Tetara ao Karekati.

11E tuangiia b'a a na kaira te ueanaine are Watiti nakoina, ao e na katokaa ana baunuea. Bon te aine ae e rangi ni botonaine te ueanaine arei, ma ngaia are, e tangiria te uea b'a e na kaota botonainena nakoia ana aobitia ma ana iruwa ni kabane.

12Ma ngke a tuanga te ueanaine taani m'akuri ana taeka te uea, ao e rawa n roko. Ao e rangi n un te uea n te b'ai aei.

13Ao n te tai aei, ao e tataneiai te uea n titirakiniia ana taan iango i bukin tuua ma babaire. Ma ngaia are, e kanaanako weteaia taan iango, ake boni ngaiia aika a ataa te b'ai ae e riai ni karaoaki.

14Ao ana aomata ake e aki toki n rarairakiia i bukin te iango bon Karetena, Tetara, Atemata, Taretiti, Mereti, Maretena, ao Memukan, ake bon aobitian Botia ma Miria ake itiman ake a taui nakoa aika a rietaata n te tautaeka.

15Ao e taku nakoia m'aane akekei, Boni ngai ae te uea ae Keatiti, ae I kanakoa au toro ma au taeka, b'a e na kawaekoa te ueanaine are Nei Watiti, ao e aki kan ongo n au taeka. Tera te kaetieti ae e riai ni karaoaki nanona nakon neiei?

16Ao e taetae Memukan nakon te uea ma ana aobitia ni kaangai: E aki ti karaoa ae e buakaka nakon te uea te ueanaine ae Nei Watiti, ma e boni karaoa naba ae e buakaka nakoia ana aobitia te uea, ao ni koauana, e boni karaoa ae e buakaka nakoia kaain te tautaeka ni kabane.

17Ao ane a na bane naba ainen te tautaeka ni katotonga te ueanaine n aki karineia buuia ngkana a ongo te rongorongo aei. Ane a na kaangai, E kawaekoa te ueanaine are Nei Watiti te uea b'a e na kawaria, ao e rawa.

18Ao ngkana a ongo n te tai aei aron te ueanaine aei buuia aobitian Botia ma Miria, ao ane a na bane naba n aki karineia buuia ni bon te bong naba aei, ao ane a na un buia irouia.

19Ao ngkana ngaia anne te uea ae ko karineaki, ao ko na katanoata b'a e na aki manga roko Nei Watiti i matam. Ao ko na koroia n aia tua I-Botia ma I-Miria b'a e aonga n aki kona ni manga bitaki. Ao anaa tib'angana n ueanaine n anganiia aine tabeman aika a raoiroi riki.

20Ngkana e tanoata anne ni kabutaa te tautaeka ae buubura aei ni kabane, ao ane a na bane aine ni karaoa ae e raoiroi nakoia buuia, e ngae ngkana a kaub'ai ke a aki kaub'ai buuia.

21Ao e kukurei te uea ma ana aobitia n te iango arei, ao e karaoa ana iango Memukan.

22Ao e bane ni kanakoi ana rongorongo te uea nako aban ana tautaeka ni kabane, n taian taetae ma koroboki ake a b'ainaki n te aba teuana ma te aba teuana, b'a a na bane m'aane n tautaekana oin aia auti, ao boni ngaiia naba aika a na angaanga te babaaire.