Etekiera 23 - Kiribati New Version Bible

Taari Aine Aika Taani Bure Aika Uoman

1E taku te UEA:

2Etekiera ae natin te aomata, ko na ongora karakinaia taari aine aika uoman.

3Ngke a uarereke ngke a maeka i Aikubita, a riki b'a ainen mataawa.

4Aran are te ikawai bon Nei Oora, are e bon tei i bukin Tamaria; ao are te ataei arana bon Nei Oorib'a, are e tei i bukin Ierutarem. A manga riki b'a buu ao a bungia natiu.

5E ngae ngke e riki b'a buu Nei Oora, ma e bon waaki naba arona n aine ni mataawa ma n riri mwiin ana tangira are Aturia.

6E anga rab'atana nakoia tautia ake a beboo aia kaboraoi, ao nakoia naba aika a botonim'aane, ao aobitia aika rietaata, ao tautia ake taan buaka mai aoia aoti.

7E wene ni bure ma mataniwiin Aturia aika a kakannato ao a taromauri aia bouannanti aika a bati n ribaaki.

8N te tai are e karaoi iai baikai i Aikubita, e aki manga konaa ni katokia. A wene m'aane ma ngaia, ao e a bon tatauraoi naba nakon te wene ni bure.

9Ma ngaia are, I anga Nei Oora nakoia ana tangira ake kaain Aturia ake e rangi n baba n tangiriia.

10A buutii ana kunnikai, ao a raweia natina nako ao a tiringa neierei. A taetaekina Nei Oora aine n taabo nako i bukin te b'ai are e riki nakoina.

11E noori baikai ni kabane Nei Oorib'a, ma e riki rake riki maiuakinan te wene ni bure i rouna nakon are e a tia ni karaoia tarina are Nei Oora.

12E aki toki naba Nei Oorib'a ni kakaaia aobitian Aturia ake a botonim'aane, ma tautia ake a kaboraoi ao taan buaka mai aoia aoti.

13E karaoi b'aai aika a kammaira.

14Ma e rangi ni buakaka riki katein Nei Oorib'a nakon tarina. E noori taiani banna ake a karaoi m'anen B'aburon ake a karaoaki i aon te oo ao a karanaki n te uraura.

15Iai rooia i aon koreaia ao taian m'aita i aon atuuia, ao a kauringnga taian aobitia irouia taani buaka mai aoia aoti i B'aburon.

16Ao n te tai are e bon taraia naba iai, e a tangiria naba ni wene ni bure ma ngaiia. Ngaia are, e kanakoa ana tia uarongorongo b'a a na kairaki nakoina.

17A m'aiti aia tai m'anen B'aburon n roko ni wene ni bure ao e a kam'araa irouia.

18E kariaia aomata nako b'a a na nooria ni bebeekan ao e aki tabe ngkana e riki b'a ainen mataawa. Ao bon anne bukina ngkai I tannako mai rouna, n aron are I karaoia nakon tarina.

19E aki toki ikanne Nei Oorib'a ma e riki rake kammairana ao e karaoa are e karaoia ngkoa i Aikubita.

20E rangi n tangiria b'a e na nako ni wene ma m'anen Aikubita, ake a rangi n ataaki ni korakoran kani m'aaniia.

21Ao e rangi n tangiri boong ngkoa ake e riki iai b'a ainen mataawa ngaia ngke e uarereke, are te tai are a rangi ni kan wene ni bure iai m'aane ma ngaia.

E Na Katuaaea Oorib'a Te UEA

22E taku te UEA ae te Atua:

Oorib'a, e ngae ngke ko a aki tangiria ni mena i rarikiia am tangira, ma a na bon katobibiiko kaanga kairiribai, ngkana I eekiko nako.

23N na bootia ni kabane mataniwi aika a uarereke aika a botonim'aane ao aia aobitia aika a rietaata taani buaka mai aoia aoti mai B'aburon ao Aturia, ao ai uana naba man barongan Kareria i Bekota, Tioa ao Koa.

24A na roko aia taanga ni buaka ae e korakora mai meaang ma kaa ni buaka ao kaa ni m'am'ananga aika a uoti b'ai ni buaka. A na karin taian otanga ao taiani b'ara ni buaka ao a na katobibiko ao N na karaoia b'a a na motikii taekam ao a na katuaaeako ni kaineti ma oin aia tua nako.

25E maraki nanou iroum, ma ngaia ae, N na karaoia b'a a na iowawa. A korei ni kanakoi b'airim ao taningam; a na tiringiia natim ao a na tiringiia ni kabane am utu ake a tiku ni maiu.

26A na raeraeaki am kunnikai ao am b'ai ni katamaroa.

27N na katoka bebeekanim ao ainen matawaam are ko moana karaoana mai Aikubita. Ko na aki manga oki n iangoi boong aikai.

28Boni Ngai ae te UEA ae te Atua ae I tauraoi n anga ngkoe nakoia kairiribai aika a rangi ni buakaka are ko na nooriia b'a a rangi n ribaaki.

29A na uoti b'aai nako n te aro ae e aki raoiroi ake ko bon karekei n am m'akuri korakora ao a na buuti kunnikaim ni kabebeekaniko. Ao a na bane aomata n nooriko b'a bon ainen mataawa ngkoe. A kairiko oin am bure

30aika a kam'araa nakon aei. Boni ngkoe are ko kaantaningaaki b'a ko na wene ni bure ma m'anen botannaomata ake tekorakina ma n taromauri aia bouannanti.

31Ko a tia n riki ni buakaka riki nakon tarim are te ikawai, ao ko na riai ni mooi man te m'angko are e kanoaaki n uniu.

32Boni Ngai ae te UEA ae te Atua ae I angan tarim are te ikawai te m'angko ae e buubura ae e kaakanoa, ae e on n uniu. Ao ngkana ko mooi man te m'angko anne, ko na b'ainingareaki ma ni kamaamaaeaki.

33N tokina ko na manging ao a na akea raoraom, i bukina b'a e on te m'angko anne n te kakamaaku ao te urub'ai.

34Ma ko na nima kanoana ni kabane! Ao i mwiina, ko na kamaerikirika te m'angko ao ko na kamanenaa maibiibina ni korekorea iai b'aab'aam i bukin rawaawatan nanom. Bon aei au taeka Ngai ae te UEA ae te Atua.

35Ko a tia ni katinanikuai raoi, ma ngaia ae, I berita b'a ko na katuaaeaki i bukin b'aai aika a rangi n ribaaki aika ko karaoi ngkai ainen mataawa ngkoe.

Kabuakakaia Taari Aika Uoman

36E taku te UEA:

Etekiera, ae natin te aomata, e a roko te tai are ko a riai n tuanga iai Nei Oora ao Nei Oorib'a b'a a bure. Ko na kauringiia i bukin maiuia aika a buakaka!

37E a tia n aki kakaonimaki ngke a taromauri taiani bouannanti, ao a tia ni karaoa te bure n tiritiri ngke a karean oin natiia b'a aia angab'ai nakon taian bouannanti.

38Ao tiaki ti anne te b'ai ae a karaoia. A kabuakaka au Tembora ao a aki karinea te Taabati.

39A kabuakaka au Tembora ni bon te bong are a anga iai natiu b'a aia karea nakon taiani bouannanti!

40A kanakoia aia tia uarongorongo n anai nanoia m'aane man taabo aika a raroa. Ao taari aika uoman aikai ngkana a roko m'aane aikai, a tebotebo ao a katokai karan mataia ao b'aai ni katamaroaa.

41A tekateka i aon kaintekateka aika maraurau, ao te taibora i mataia i bukin b'aan te oriwa ao te b'ai ni kaboiarara are Au b'ai.

42E aki toki ni kakarongoa aia ruu ni b'anaaia te koraki ni manging aika a roko man te rereua. Mm'ane aikai, a anganganiia aine taian m'ae n roroa ao baunuea aika a tamaroa,

43ao I namakinna b'a a rangi n tangiria ni kani wene ni bure m'aane aikai ma aine aikai, e ngae ngke a kua n aroia n riki b'a aineni mataawa.

44Ni bon koauana, a ngae n okioki m'aane aikai ni wene ni bure ma Nei Oora ao Nei Oorib'a, taari ake uoman aika taani bure.

45Ma n te bong teuana ane a na bukiniia aine aika uoman aikai n te tiritiri ao te aki kakaonimaki, i bukina ngke a bon reke n te bure.

46Ma ngaia ae bon Ngai ae te UEA ae te Atua ae I taetae nakoia taari aika uoman aikai ni kaangai:

N na ikotiia te koraki ni kakiriwe ae a na kabuakakaingkami ma ni kimoaingkami.

47A na karebanaingkami n atiibu ni karokoa matemi ma ni korobitingkami; a na tiringiia natimi ao a na kabuoki ami auti nako.

48N na kataraoa baangin te bure n aine ni mataawa mai aon te aba aei, b'a a aonga ni kauringaki aine n taabo nako b'a a na aki karaoa aron ae kam a tia ni karaoia.

49Kam na katuaaeaki ngkai kam a tia n riki b'a aineni mataawa ao i bukin taromauriaia bouannanti, ao kam na ataia iai b'a bon te UEA Ngai ae te Atua.