Tani Motiki-taeka 18 - Kiribati New Version Bible

1A riki b'aai aikai i m'aain ae a tautaekana Iteraera taian uea.

Anaakin Ana Ibonga Ma Ana Bouananti Mika Iroun Te Baronga Are Taan

A tabe ni kakaaea aia tabo kaain te baronga are Taan are a na maeka iai. A reke abaia baronga ake tabeua, ma e tuai reke aban te baronga are Taan are a na atongnga b'a bon oin abaia.

2A rinei niiman taani buaka b'a taan tei i bukin aia kaainga kaain te baronga are Taan, ao a tuangiia ni kaangai, Kam na nako ni kakaaea abara ae ti na kona ni maeka iai.

Ao a kiitana aonon Tora ma Etitaora taani buaka akekei, ao a nakon aaba ake a tabukibuki ake i Eberaim. Ao a tiku n ana auti Mika n te tairiki teuana,

3b'a a ongo b'anaan rorobuakan te baronga are Rewi ngke e taetae, ao a kinaa man ana ee b'a bon kaain maiaki. Ao a titirakinna ao a taku, “Tera ae ko karaoia ikai? Ao antai ae karokoko ikai?”

4Ao e taku rorobuakan te baronga are Rewi, E kabooai Mika b'a N na riki b'a ana ibonga. Ao i mwiina, e a kaongoia aron akoana iroun Mika.

5Ao a taku m'aane akekei nakoina, Taiaoka, ma ko na taetae nakon te Atua i bukira. Titirakina te Atua b'a e na koro bukin te b'ai ae ti waakinna ke na aki?

6Ao e taku te ibonga arei, Kam na aki raraoma, E kukurei te UEA n te b'ai ae kam waakinna.

7Ao a nako m'aane akekei nakon te kaawa are Raiti, ake a roko kaaina mai Titon, ma a aki kona ni kamanoaki mai Titon b'a e rangi n raroa nako. E ngae ngke akea oon aia kaawa ao a bon taku naba kaaina b'a a rangi ni mano man taiani buaka. Ma ngaia are, a aki manga bubutiia te aomata temanna buokaia, are nanona b'a e na rangi ni beebete iroun te baronga are Taan ngkana e buakana Raiti.

8Ao a manga oki m'aane akekei nako Tora ao Etitaora, ike a manga titirakinaki irouia aia koraki ni kaangai, E a reke te aba?

9-10Ao a taku m'aane ake niman akekei, Ti a tia n noora te aba ae rangi n tamaroa ao e rangi n tau buburana i bukira. Ao iai b'aai aika ti rangi ni kainanoi. Tera ae ti na taningaia? Ti na riai ni buaka ma n taua b'a abara. Ane kam na nooria b'a a taku kaaina b'a a rangi ni mano, ma E a tia te UEA n anganiira b'a abara.

11A kabaei ni kamatoai aia b'ai ni buaka m'aanen te baronga are Taan aika 600 m'aitiia ao a kiitana Tora ma Etitaora ma aia utu.

12N te tai teuana ao a katei maeka i Kiriata Iearim i nanon te aba are Iuta, ao bon anne bukina ae aranaki iai te tabo are ti maeaon Kiriata Iearim ao e bon aranaki naba ngkai b'a Aia maeka kaain Taan.

13Ao i mwiina, a nakon te aba are tabukibuki i Eberaim.

Ao ngke a tabe ni kaaniia ana auti Mika,

14ao a titiraki nakoia taani buaka m'aane ake niiman ake a m'ananga ngkoa n tutuo ni karaba ni kaangai, Kam ataia ae iai n te kaawa aei te aomata ae iai ana bouananti tabeua, ao ana ebota ni ibonga? Tera ami iango i rouna?

15-18Ao a kiitana te kawai taani buaka ake 600 ao a nakon ana auti Mika ike e mena iai te rorobuaka are kanoan Rewi. A tei i mataroan te kawai n rin ao a kamaura te ibonga. Ao i mwiina, a m'ananga m'aane ake niiman ake a bon tia n roko ikekei mai m'aaina nakon ana auti Mika ao a anaa ana ebota te ibonga, ao taian bouananti.

Ao e takaarua te ibonga ni kaangai, Uaakekei, tera ae kam karaoia?

19Ao a taku m'aane akekei, Tai karongoa. Kaina wiim, ao kakaauongo. Nakomai b'a ko na iriira b'a ko na riki b'a ara ibonga, b'a ko aonga ni kona n tuangiira te b'ai ae tangiria te Atua b'a ti na karaoia. Ngkai ko kona n tiku ikai n riki b'a ibongan ana utu te m'aane ae ti temanna, ao ti taku b'a e na rangi n raoiroi riki ngkana ko a riki b'a te ibonga i bukin te kaainga ke bon barongan Iteraera ae b'anin.

20Ao e kukurei te ibonga n te iango arei. Ma ngaia are, e anaa te ebota ao taian bouananti ao e a iriia aomata ake man

21te baronga are Taan. Ao i mwiina, a kamenakiia natiia, ma aia nanai ni man, ao aia b'ai ni kabane i moaia, ao a karairaki rikaaki.

22Ao a bon maan teutana ni m'ananga, ao Mika e weteia kaain rarikina b'a a na buokiia ni kaoki ana b'ai. Ao a kauiaia m'aanen te baronga are Taan

23ao a takaarua nakoia b'a a na tei.

Ao a rairaki ni kaeka ao a taku, Tera ae riki? E aera ngkai ko a bon kairiia m'aane aikai?

24Ao e taku Mika, Kam bon ataa te b'ai ae riki. Kam iraei atuara ake I karaoi, ao kam uotaanako au ibonga. Ao bon akea nikiran au b'ai iroumi.

25Ao a taku kaain Taan akekei nakoina, Ti aki manga kan ongo riki taekan te b'ai anne, ao ngkana ko kamaraki nanora ao ti na ti tiringko ma am utu.

26Ao ngke a tia n taekin aikai, ao a rairaki ma n kiitaniia.

Ao e ataia Mika ae e aki kona n tokanikai i aoia ngkana e buakaniia, ma ngaia are, e a okira mwengana.

Tauan Te Kaawa Are Raiti Iroun Te baronga Are Taan

27-28Ao a anaa ana ibonga Mika kaain te baronga are Taan ma b'aai ake e karaoi Mika, ao a m'ananga ni kaaitaraa Raiti, are e mena n te m'arua are mena taekana n te kaawa are Beta Reoba. Bon akea matoatoan ninian Raiti b'a akea oona, ao e rangi n raroa mai Titon, n te aro are a aki kona n roko kaain Titon ni buokiia. Ao a tuai naba ni bubutiia kaawa ake i rarikiia taani kairiiri mai Raiti buokaia i bukin buakanakiia.

A karaoa te buaka ae karina ana taani buaka Taan nakon te kaawa are Raiti, ao a tiringiia aomata ni kabane, ma ni kabuokiia. Ao i mwiina, a manga karaoa te kaawa, ma ni maeka iai.

29Ma a arana te kaawa arei b'a Taan, are bon natin Iteraera temanna are bon aia bakatibu n aia baronga.

30-31E ngae ngke Titon te tabo n taromauri, ma a katei ana bouananti Mika ake karaoi kaain Taan. Ao a taromauria te bouananti, ao aia ibonga boni kanoan Rewi, are arana Ionatan, ao bon kanoan Kerition ngaia are natin Moote te m'aane. A m'akuri kanoana b'a ibongan te baronga are Taan, ni karokoa te tai are a uotaki nako iai Iteraera b'a taian taenikai.