Itaia 37 - Kiribati New Version Bible

Buubutian Itaia Iroun Etekia Ana Iango(2 Uea 19.1-13)

1Ao ngke e ongo naba te rongorongo arei Etekia, ao e raeuai kunnikaina i bukin rawaawatan nanona, ao e karin kunnikai aika a mangaingai. Ao i mwiina, e nako n rin n ana Tembora te UEA.

2E tuanga te Buraiminitita are Eriakim, te kauoman ni buraiminitita are Tebena, ao te ibonga b'a a na kunnikaiia ni kunnikai aika a mangaingai ao a na kaangai nakon Itaia:

3Itaia, bon taai aika a matoatoa ma ni bubuaka taai aikai. Ti te bo ara botannaomata ma te aine ae akea korakorana ni bungiia natina, ngke e a bon roko ana tai ni bungiia natina.

4Ti butiiko b'a ko na tataro i bukiia aika a tiku ni maiu. E kanakoa ana mataniwi ni buaka uean Aturia ni kakaewenakoa te Atua. Tao e bon ongo te UEA te b'ai are e taekinna ao E na karaoa te b'ai teuana, ngkana ko tataro.

5Ngke a roko taani kairiiri aikai nako iu,

6ao I tuangiia ana rongorongo te UEA nakon Etekia ae e kaangai:

Bon te UEA Ngai. Ko na aki tabe ma taeka aika a buakaka aika e a tia n taekinna ibuku akana e taekin ana tia uarongorongo uean Aturia.

7N na kab'araa nanona n taian maningongoo i bukin b'aai aika a riki i mwiina i abana. Ane e na oki, ao N na karaoia b'a e na mate n te mate ae e kakamaaku.

8Ao i nanon te tai arei, ao e ongo mataniwin te taanga ni buaka n Aturia b'a e a tia n nako ana uea ni kiitana te kaawa are Rakiti ao ngkai e a buakana Ribena. Ma ngaia are, e a manga nako ikekei.

9Ni bon te tai anne, e a ataia uean Aturia b'a i aoni kawaina uean Itiobia are Terata ni buakanna. Ao i mwiina, e kanakoa ana tia uarongorongo ma taeka aika a kaangai nakon Etekia:

10Ko na aki onimakina Atuam ke ni kaburababaaki n ana berita i bukin kaawakinan Ierutarem mai rou.

11Ko bon ongo taekara ngaira aika uean Aturia ngke ti kamaunaia botannaomata ake tabeua. Ao tera ngkanne ae ko taku b'a ko rangi ni mano iai.

12Uean Aturia are i m'aaiu e kamaunaa kaawan nako Kotan, Aran, Reteba, ao kaain Eten ni kabane ake a maeka i Terata. Tera ae e karaoia aia anti nakoia?

13A tia naba ni mauna Amata, Arebata, Tebarewaim, Ena, ao Iwa.

Ana Tataro Etekia(2 Uea 19.14-19)

14Ngke e tia Etekia ni wareka te rongorongo mai roun uean Aturia, ao e uotia nakon te Tembora ao e taakinna b'a E na nooria te UEA.

15Ao e tataro:

16Te UEA ae Atuaia Iteraera ae Moan te M'aaka, e mena am kaintokanuea i aon baika a maiu aika iai baiia ni kiba. Ko karaoa karawa ma aonnaba, ao bon ti Ngkoe n tautaekan taian abanuea n te aonnaba.

17Ko na bon noora ana m'akuri Tennakeriba ni kabuakakako, ngkoe te Atua ae e maiu.

18E boni koaua Atuara, ae a tia uean Aturia n onikia botannaomata nakon taian rereua.

19A tia n urui taian bouannanti aika taiani kai ma atiibu ake a tia ni karaoi ao n tataromauri iai botannaomata aikai.

20Ma bon ara UEA ao Atuara! Ti butiiko b'a ko na kamaiura mai roun uean Aturia. Ao ane a na ataiko iai aomata ni kabane n taian botannaomata b'a bon ti Ngkoe te UEA.

Ana Kaeka Itaia Nakon Etekia(2 Uea 19.20-34)

21I nakon Etekia ao I tuangnga b'aai ni kabane ake e taekin te UEA ae Atuan Iteraera nakoina:

22Etekia, ko tataro nako iu i bukin Uean Aturia are Tennakeriba. Ao ngkai, aio te b'ai ae I taekinna nakon te uea anne:

Aomatan Ierutarem

a ribaiko mani kakanikoko;

ao a ngareakiniko mai akuum.

23Tennakeriba, ko a kamaraiaaki,

ko takaarua, ao ko ngare ni kakaniko nako iu,

Ngai ae Atuan Iteraera ae e tabu.

24Ko karaoia am mataniwi

b'a a na kabuakakaai, Ngai ae te UEA.

Ao aei te b'ai are ko taekinna bon i bukim,

“I kairiia au kaanibuaka

nako aon te kabanea n rietaata ni

maungan nako Reb'anon.

I rinnako i buakon buakonikaina,

ma ni koroi tiirana ao m'aiangona

aika taiani kabanea n raoiroi.

25I kam'autakatakai karaanga ni kabane

ake n te aba are Aikubita,

ao I mooi n taian m'anib'a

ake I a tia ni keni.”

26Ko na ongora, ngkai Tennakeriba

Irou, Ngai ae te UEA.

I baairea te b'ai aei man taai aika a nako.

Ao ko tuai man ataia

ae bon ti Ngai

ni baaireia b'a ngkoe ae ko na

karaoi b'aai aikai.

I karaoiko b'a ko na urui

kaawa aika a buubura.

27A riki ni mamaara aia aomata,

ma ni mangaongao.

Kaanga ai aron taian uteute aika a riki n aki akaaka

ke taian uteute aika a tib'a bwebwe

i aon taubukin te auti

ke kaanga ai aron te tawaana ni uita

i m'aain ae a tai.

28I a kaman ataiko

e ngae ngkana ko a rangi ni un

irou.

29I a tia n noora kainikatongam

ao unim ae e rangi ni korakora

irou.

Ao ngkai N na kaaki te matau

i b'airim,

ao te b'ai ni bwe i nanoni wiim,

ao i mwiina, N na kaokingkami.

nakon te tabo are kam nako mai iai.

30Etekia, N na tuangko te b'ai ae e nang riki. N te ririki aei ko na am'arake man taian uita aika a maiu i bon irouia, ao n te ririki ae e na roko ko nang kang taian uita aika a maiu i mwiin taiani uita aikai. Ma n te katenua n ririki, ao ane ko nang unika te kureebe ao ane ko nang kana ae ko taia.

31Koraki aika a tiku ni maiu i Iuta bon te koraki aika ai aron taian kureebe ake a kanene wakaaia rikaaki ao a kariki ua.

32Ngai ae te UEA ae Moan te M'aaka, N na bon kakoauaa anne b'a a na tiku ni maiu aika a maiu i Ierutarem.

33I berita b'a e na bon aki roko i nanon Ierutarem uean Aturia, ke ni katebea te kanoanikatebe nako nanon te kaawa are e buubura, ke ni katobibia ma ni katauraoia ni buakani ngkami.

34I bon koaua ngkai bon te UEA Ngai, ao e na boni manga okira te kawai are e nako mai iai ao n aki manga okira Ierutarem.

35N na bon kaawakinna i bukin karineau ao i bukin naba te berita are I a tia ni karaoia nakon au tia m'akuri are Tawita.

Maten Te Uea are Tennakeriba(2 Uea 19.35-37)

36E kanakoa te anera te UEA nakon aia kaemb'a kaain Aturia, ao e tiringiia tebubua waningaun ma niman tengaa te aomata n teuana te tairiki. N te bong are i mwiina, ao e a onrake te maeka arei n taiani mate.

37Ao i mwiin anne, ao e a oki te uea are Tennakeriba nako Aturia ao e maeka n te kaawa are e buubura are Ninewe.

38Ao n te bong teuana e tabe n taromauri n ana tembora antina are Nitiroka, ao a roko naba natina m'aane ake uoman ake Aterammereka ao Tiaretera n tiringnga n aia kabaang. A biri nako nakon te aba are Ararata, ao e a manga uea natina te m'aane are Etaraaton.