1Ao e weteia baronga ake Reuben ma Kata ao Manate mainiku Iotua
2ao e kaangai nakoia, “Kam a tia ni karaoi b'aai ni kabane ake e a tia n tuangngkami Moote are ana toro te UEA, ao kam karaoi naba ni kabane au taeka ake I tuangngkami.
3Kam a tia ni buokiia tarimi, ao kam a tia n ongotaeka i roun te UEA ae Atuami i nanon taai aika a nako ni karokoa ngkai.
4Ao ngkai E bon teimatoa te UEA ae Atuami ni kaawakin ana berita i bukin te rau, n ai aron are e taekinna naba ngkoa nakoia raomi ake baronga ake tabem'aang. Ma ngaia ae kam na nako n okiri abami are kam abanna are i mainikun te Ioretan are e a tia n anganingkami Moote are Ana toro te UEA.
5Kam na riai ni kaawakin ana tua Moote ake e anganingkami are kaangai, Tangira te UEA ae Atuam, karaoa nanona, ongotaeka nakon ana mwioko, kakaonimaki nakoina, ao m'akuri i rouna ma nanom ao tamneim ni kabane.”
6E kaokiia Iotua nako abaia ma taeka ni kakab'aia aika a kaangai, “Kam nang okiri abami ma kaub'aimi aika ami nanai ni man ma ami tirewa ma ami koora,
7ma ami buraonti ma ami m'akoro ni biti, ma ami kunnikai aika a bati, aike kam anai mai i rouia ami kairiribai. Kam na tib'atib'ai raoi baikanne i aomi ma raomi.” Ao a okiri abaia.
8E a tia Moote n anganiia iteran te baronga are Manate abaia i mainikun te Ioretan, ao Iotua e a manga anganiia iteran te baronga are Manate are teuana abaia i maeaon te Ioretan, ni ikotaki naba ma baronga ake tabeua.
9Ma ngaia are a teirake n nako baronga ake Reuben ma Kata ao Manate mainiku mai i buakoia aomatan Iteraera ngke a mena i Tiro n te aba are Kanaan, b'a a nang okiri abaia are n te aba are Kireata are e anganiia Iotua n ai aron Ana mwioko te UEA nakoia i roun Moote.
Te baonikarea i rarikin te Ioretan10Ao ngke a roko i Kirerota baronga ake Reuben, ma Kata, ao Manate mainiku, ao a katea te baonikarea ae buubura i mataniwiin te karaanga; bon i maeaon naba te Ioretan.
11Ao a kaongoraeaki aomatan Iteraera ni kabane taekaia baronga ake Reuben, Kata, ao Manate mainiku ae a katea aia baonikarea i Kerirota are maeaon te Ioretan, ao tiaki i abaia.
12Ngke a ongo aei aomatan Iteraera ao a bane ni katauraoi nakon te buaka i Tiro b'a a na buakaniia barongan mainiku.
13A kanakoa Bineati are natin te ibonga are Ereata barongan maeao ake tebwina b'a e na kawariia barongan mainiku ake Reuben, Kata ma Manate mainiku n te aba are Kireata.
14A ira Bineati tengaun taan kairiri b'a kakatemanna man barongan maeao aika atuun utu mai nanon kaainga.
15Ao ngke a roko i Kireata ao a taetae nakoia baronga ake Reuben, ma Kata ma Manate mainiku ni kaangai,
16“Ti kanakoaki mai rouia ana aomata te UEA ni kabane b'a ti na ongora i roumi b'a kam aera ngkai kam aki kakaonimaki nakon te UEA, b'a kam a manga katea ami baonikarea anne bon ti i bukimi? E aera ngkai kam a manga tannako mai roun te UEA ni karaoa te b'ai ae rangi ni buakaka?
17Kam aki uringa ara bure nakon te UEA ngkoa i Beore are e katuuaira iai n te aoraki ae rangi ni kakamaaku, ao kam aki mwimwinikora? E bon tuai totoki raoi mwiin arei ao kam a manga moana naba ami aki ongotaeka?
18Ngkana kam aki ongotaeka i roun te UEA n te bong aei ao e na reke kaimi ma aomatan Iteraera ningabong.
19Ngkana kam taku b'a e aki raoiroi abami i bukin taromaurian te UEA ao e raoiroi riki ngkana kam karekei abami i buakora b'a kam aonga n taromauri n um'an te UEA ae i roura ngkai nakon ae kam na katea riki teuana bon i aon naba ikai ao bon iai baonikarean te UEA ae Atuara aei.
20Kam aki uringa Akan are natin Tera ngke e aki ongotaeka naba nakon Ana mwioko te UEA are a na aki anaaki baikeke a riai ni kamaunaaki ao a bane ni katuaaeaki aomatan Iteraera i bukin anne, tiaki ti Akan ni mate i bukin ana bure.”
21Ao a kaeka baronga ake Reuben ma Kata ao Manate mainiku nakoia atuun utu man barongan maeao ni kaangai,
22“Ti bon kaotia ma te koaua i matan te UEA ae te Atua ae m'aaka ae ara tia kakoaua. E ataa bukin karaoan aei iroura, ao ti bon tangiriia naba aomatan Iteraera b'a a na ataa bukin karaoan aei iroura.
23B'a ngke tao arona b'a ti katea aei i bukin karaoan ae buakaka nakon te UEA, ao ke e anga ngaira te UEA nako nanoni baimi b'a kam na tiringiira naba n te bong aei. Ti bon aki karaoa te baonikarea aei i bukin te angakarea ke te angab'ai.
24Ti karaoa aei b'a ti raraoma ngkana a manga taetae ami kariki rimwi ni kaangai, “Tera ami b'ai n taromauriia te UEA ae Atuaia Iteraera?
25E a tia ni karaoa te Ioretan b'a tiara ma ngkami. Tiaki Atuami te UEA! Ao ane a na tuukia ara kariki ami kariki rimwi man taromaurian te UEA.
26Ma ngaia ae ti katea te baonikarea aei tiaki i bukin te angakarea ke te angab'ai,
27ma ti karaoa aei b'a te kanikina i marenara ma ngkami, ao ara kariki ma ami kariki rimwi ni kaotia b'a ti teuana arora n taromauriia te UEA i nanoaan um'ana are e tabu, ma ara angakarea ma ara angab'ai. E na riki te baei b'a te kakoaua b'a ana aomata naba te Atua ngaira ma ngkami.
28Ma ngkana arona b'a kam taekina aei nakoira ke nakoia ara kariki rimwi, ao ti na kona ni kabooa ni kaangai, “Ao tera te baonikarea ae a karaoia ara ikawai. Tiaki i bukin te angakarea ke te angab'ai ma bon te b'ai ni kauring nakoira ma ngkami b'a ti riai n taromauriia te UEA.
29Ti bon aki konaa n tannako mai roun te UEA ni manga katea te baonikarea teuana ae kaanga ai aron te baonikarea i bukin te angakarea ke te angab'ai. Ti bon aki kona ni karaoa riki teuana i rarikin Ana baonikarea te UEA ae Atuara are i matan um'ana are tabu.
30Ao ngke a ongo Beniata ma raona ake atuun utu man barongan maeao ake tengaun aia taeka barongan mainiku ao a rau nanoia iai.
31Ao e taku Beniata are natin Ereata are te ibonga nakoia, “N te bong aei ao ti a ataia b'a e bon mena te UEA i roura, ao ngaia kam bon aki rawa nakon te UEA ma kam a tia ni kamaiuia Iteraera man ana karekekai te UEA.”
32Ao a oki rikaaki Bineata ma ana mataniwi ake tengaun mai i rouia baronga ake Reuben ma Kata man te aba are Kireata, ao a okiria aomatan Iteraera n te kaawa are Kanaan, ao a kaongoraaia b'aai ni kabane.
33Ao a bane n rau nanoia aomata ni kabane ao a neboa te Atua, ao akea riki manga iangoan te kan nako n urua te tabo are a mena iai baronga ake Reuben ma Kata.
34Ao a taku baronga ake Reuben ma Kata, “E na riki te baonikarea aei b'a te b'ai ni kakoaua i marenara ma barongan maeao b'a bon te Atua te UEA.
Who We AreWhat We EelieveWhat We Do
2025 by iamachristian.org,Inc All rights reserved.
