Nakoaia Ibonga 13 - Kiribati New Version Bible

Tuua I bukin Aorakin Te Kun

1Ao te UEA e angan Moote ma Aaron tuua aikai.

2Ngkana iai te aomata ae iai te maneka i aon kunna ke te kaboa ke te baauraura ae na karikirakea tarakin kunna ae e kakamaaku, ao e na riai n nikiria iroun Aaron are te ibonga.

3E na karaua n tuoa te ibonga, ao ngkana e a tia ni bitaki ni mainaina buraena ao manekana e tabe n nano riki nakon te kun are i tinanikun te maneka, ao e na ataaki b'a bon aorakin te kun ae e kakamaaku, ao e na katanoataa te ibonga b'a te aomata anne e aki itiaki.

4Ma ngkana e mainaina te maneka ao e aki taraa n tam'arake rikaaki nakon te kun are i tinanikuna, ao a aki mainaina naba buraen nanona, ao e na kaokoroa te aomata anne te ibonga i nanon itiua te bong.

5E na manga tuoa riki te ibonga n te kaitiua ni bong, ao ngkana e taku n ana iango b'a e aki bitaki taraana ao e aki rakanako, ao e na manga kaokoroa naba te aomata anne i nanon riki itiua te bong.

6E na manga tuoa riki te ibonga n te kaitiua ni bong, ao ngkana e a mao ma n aki raka nako, ao e na katanoataa te ibonga b'a e itiaki te aomata anne; bon ti te maneka. E na riai ni uaati kunnikaina te aomata anne ao e a itiaki naba ni kaineti ma aron te taromauri.

7Ma ngkana arona b'a e a manga raka nako te aoraki arei i mwiin tuoana iroun te ibonga ma ni katanoataa b'a e itiaki, e na manga riai riki ni kawara te ibonga.

8E na manga tuoa riki te ibonga, ao ngkana e a tia n raka nako, e na katanoataa te aomata anne b'a e aki itiaki; bon aorakin te kun ae e kakamaaku.

9Ngkana iai aorakin kunna ae e kakamaaku, e na kairaki nakon te ibonga,

10b'a e na tuoa te aomata anne. Ngkana iai te maneka ae e mainaina i aon kunna are e a manga bita buraen te kun ni kamainainai ao e onrake n te kanakana,

11anne bon aorakin te kun ae e karaba. E na katanoataa te aomata anne te ibonga b'a e kam'araa; ao akea manenan kaokoroana, b'a e a bon teretere raoi b'a e kam'araa.

12Ngkana arona b'a e raka nako te aoraki ma ni kaona rab'atan te aomata mai atuuna nakon waena,

13ao e na tuoaki riki iroun te ibonga, ao ngkana e noria te ibonga b'a e a manga bitaki matan te kun ni kabane nakon te mainaina, ao e kam'araa te aomata anne ni kaineti ma aron te taromauri.

14Ma n te tai are e ure iai matan te maneka, ao e a kam'araa naba ni kaineti ma aron te taromauri.

15E na tuoa riki te ibonga, ao ngkana arona b'a e noora te maneka b'a e maiu, ao e na katanoataa te aomata anne b'a e kam'araa.

16Ma ngkana e mao te maneka ao e a manga mainaina naba, ao e na nakon te ibonga te aomata anne,

17b'a e na manga tuoaki riki. Ao ngkana arona b'a e a mainaina, ao e itiaki te aomata anne, ao e na katanoataa te ibonga b'a e itiaki.

18Ngkana arona b'a iai te aomata ae iai kaboana ae e a tia ni mao

19ao i mwiina, e a manga riki te b'ai ae mainaina ke e a manga kaoti te b'ai ae e baauraura ni mainaina n te tabo are e mena iai te kaboa, ao e na riai ni kawara te ibonga.

20E na tuoa te ibonga, ao ngkana e taraa n nano riki te maneka nakon te kun are i tinanikuna ao a manga mainaina burae akana iai, ao e na katanoataa b'a e kam'araa. Bon aorakin te kun ae e kakamaaku ae e moana rikina man te kaboa.

21Ma ngkana e tuoa te ibonga ao e kunea b'a a bitaki buraena ni mainaina ao e aki nano riki te maneka nakon te kun are i tinanikuna, ma e a tabe n raoiroi, ao e na tuangnga te ibonga b'a e na kaokoroa i nanon itiua te bong.

22Ma ngkana e tabe n raka nako, ao e na katanoataa te ibonga b'a e kam'araa te aomata anne; e aoraki.

23Ma ngkana e tiku n arona n aki raka nako, ao bon ti te m'aka ae mwiin te kaboa, ao e na katanoataa te ibonga b'a e itiaki.

24I bukin te aomata ae e bue, ngkana e a mainaina te iriko ke e baauraura ni mainaina,

25e na tuoa te ibonga. Ngkana a tabe ni mainaina buraena ao e rikirake n nano nakon te kun are i tinanikuna, ao bon aorakin te kun ae e kakamaaku ae e moana maiuna n te bue, ao e na katanoataa te aomata anne te ibonga b'a e kam'araa.

26Ma ngkana a aki bitaki ni mainaina buraen te maneka ao e aki rikirake n nano nakon kunna are mai tinanikuna, ma e taraa ni beebete, ao e na tuangnga te ibonga b'a e na kaokoroa i nanon itiua te bong.

27E na manga tuoa riki te ibonga n te kaitiua ni bong, ao ngkana e a manga raka nako, ao bon aorakin te kun ae e kakamaaku, ao e na katanoataa te ibonga b'a e kam'araa.

28Ma ngkana e tiku n arona te maneka arei ao e aki raka nako ao e taraa n raoiroi taraana, ao bon tiaki aorakin te kun ae e kakamaaku. E na katanoataa te ibonga b'a e itiaki, b'a bon ti te m'aka i mwiin te bue.

29Ngkana arona b'a iai te m'aane ke te aine ae e maneka atuuna ke b'angena,

30e na tuoaki iroun te ibonga. Ao ngkana e taraa n nano nakon kunna are mai tinaniku ao a meamea buraena i nanona ma n irariki, ao bon aorakin te kun ae e kakamaaku, ao e na katanoataa te aomata anne b'a e kam'araa.

31Ngkana arona b'a e tuoa te ibonga, ao e aki nano nakon te kun are i tinanikuna, ma bon iai naba taiani burae aika maiu i nanona, ao e na kaokoroaki i nanon itiua te bong.

32Ngkana e a manga tuoa te maneka te ibonga n te kaitiua ni bong, ao ngkana e aki raka nako ao bon iai naba buraena aika meamea i nanona, ao e taraa n aki nano nakon kunin tinanikuna,

33ao e na riai te aomata n imanii burae n te tabo are e mena iai te maneka. Ao e na manga tuangnga te ibonga b'a e na kaokoroa i nanon riki itiua te bong.

34E na manga tuoa riki te maneka te ibonga i mwiin itibong, ao ngkana e aki raka nako ao e aki taraa n nano nakon te kun are i tinanikuna, ao e na katanoataa te aomata anne b'a e itiaki ni kaineti ma aron te taromauri. E na riai ni uaati ana kunnikai te aomata anne, ao e a itiaki iai.

35Ma ngkana arona b'a e a manga raka nako te aoraki i mwiin katanoataakina b'a e itiaki,

36ao e riai ni manga tuoaki riki iroun te ibonga. Ao ngkana e a raka nako te aoraki, ao e aki manga tangira nooran buraena b'a a meamea ke a aki; e a teretere b'a e kam'araa te aomata anne.

37Ma ngkana e taku te ibonga b'a e aki raka nako ao iai buraena aika a raoiroi i nanona, ao e a toki te maneka anne, ao e na katanoataa te ibonga b'a e itiaki ni kaineti ma aron te taromauri.

38Ngkana arona b'a iai te m'aane ke te aine ae iai te b'ai ae e mainaina i aon kunna,

39e na tuoa te ibonga te aomata anne. Ao ngkana e a akea mainainana, ao ngkanne bon ti te m'aka i aon te kun; e itiaki te aomata anne ni kaineti ma aron te taromauri.

40Ngkana e mm'aa iran te aomata mai bukin atuuna ke moan atuuna,

41ao e bon aki kam'araa iai.

42Ma ngkana e kaoti te baauraura ni mainaina i aon te tabo are e mara, ao bon aorakin te kun ae e kakamaaku.

43E na riai n tuoa te ibonga, ao ngkana iai te maneka ae e mainaina ni baauraura,

44ao e na riai ni katanoataa te ibonga b'a e kam'araa, i bukin aorakin te kun are i aon atuuna.

45E na riai ni b'ainna te aomata ae e iai i rouna aorakin te kun n te kunnikai ae e raeraeaki, ao e na aki koom'a irana, e na rabuna ubuna are mai nano, ao e na tatakarua ni kaangai, “I kam'araa! I kam'araa!”

46E na tiku ni kam'araa ni karokoa tokin aorakina, ao e na riai ni maeka i tinanikun te maeka, ni kararoa mairouia aomata.

Tuua i bukin Aorakin Te Kun ae Kakamaaku

47Ngkana arona b'a iai aorakin te kun i aon te kunnikai ae buraen te tiibu, ke te riinen,

48ke kunin te man, ke b'aai nako aika a karaoaki ni kunin te man,

49ngkana arona b'a e kiriin ke e uraura, ao bon aorakin te kun ao e riai ni kaotaki nakon te ibonga.

50E na riai n tuoa te ibonga ma ni kanakoa te b'ai anne i nanon itiua te bong.

51E na riai n tuoa riki n te kaitiua ni bong, ao ngkana arona b'a e raka nako, ao e kam'araa te kunnikai anne.

52E na riai te ibonga ni kabuokia, b'a aorakin te kun ae e eweewe ae e riai ni kamaunaaki n te ai.

53E na manga tuoa riki te ibonga, ao ngkana e tabe n raka i aon te b'ai arei

54e na tua b'a e na uaatiaki te b'ai anne ao e na kaokoroaki i nanon itiua te bong.

55Ao i mwiina, e na manga tuoa riki, ao ngkana e aki bitaki matana, e ngae ngkana e aki raka nako, e bon kam'araa naba; ko riai ni kabuoka te b'ai anne, e aoria ngkana e mena mai akuun te tabo are e aoraki.

56Ma ngkana e tabe ni mauna nako te aoraki, ao e na raeia ni kanakoa man te kunnikai ke te kunniman.

57Ao i mwiina, ngkana e a manga kaoti te aoraki arei, ao e a manga raka nako, ao e na riai te aomata are a na b'ai te b'ai anne ni kabuokia.

58Ngkana e a mauna naba ngkana e uatiia, e na manga uatiia riki, ao e itiaki ni kaineti ma aron te taromauri.

59Ao ai anne ngkanne tuua i aon aorakin te kun n te kunnikai, tao buraen te tiibu ke te rinen, ke i aon te rinen, ke kunnikai aika buraen te tiibu, ke i aon te b'ai ae e karaoaki man kunnin te man; anne aron iangoakina b'a e itiaki ni kaineti ma aron te taromauri, ke e kam'araa.