Te Tua-Kaua 5 - Kiribati New Version Bible

Tuua Ake Tebwina(Te Oti 20.1-17)

1Ao e weteia ni kabane Iteraera Moote, ao e taku nakoia:

N nang tuangngkami taian tua ma reirei aika kam na iri nanoia, ma ngaia are, kam na kakauongo raoi.

2E karaoa ana Boraraoi te UEA ma ara botannaomata n te Maunga are Tinai.

3Bon tiaki ti te boraraoi ma ara bakatibu ma bon i bukira naba, ngaira aikai n te bong aei.

4Ao E taetae nakoimi te UEA mai nanon te ai,

5ma kam maaku n te ai, ao kam rawa n tam'arakea te maunga. Ma ngaia are, I a taetae ma te UEA i bukimi, ao i mwiina, I a manga tuangngkami baike E taekin nako iu ao I kaangai:

6Bon te UEA Ngai ae Atuami, are E kaotinakoingkami mai Aikubita are kam toronaki iai ngkoa.

7Kam na aki taromauria te atua riki temanna i rarikiu

8Kam na aki karaoi taini bouananti aika katotongan b'aini karawa ake b'ain te aonnaba ke b'ain nanoni marawa are i aan te aba.

9Kam na aki bobaraaki n taromauriia taiani bouananti. Bon te Atua ngai ae Atuami, ao I tangiria b'a kam na kabanea nanomi nako Iu. Ngkana kam aki kubarai ma n taromauriia taiani bouananti, ao N na katuaaia kanoami ni karokoa te katenroro ma te kaaroro.

10Ma ngkana kam tangirai ma n ongotaeka nakon Au tua, ao N na akoia ami utu ni karokoa tengaa te roro.

11Kam na aki kabonganaa arau n te aro n aki akaaka. Bon te UEA ae Atuami Ngai, ao N na katuaaia aomata ni kabane akana a kabonganaa arau n aki akaaka.

12Kam na karinea te bong ae te Taabati bon Au b'ai.

13Kam kona ni karaoi ami m'akuri nako i nanon onobong,

14ma bon Au b'ai te kaitiua ni bong, Ngai ae Atuami. Bon akea ae na m'akuri n te bong anne--ngkami, ami ataei, ami kao ke ami aati ke ami man tabeua, ao ami iruwa naba ake a maeka n ami kaawa. Ao kam na aki kam'akuriia naba ami toro.

15E na kauringngkami te bong ni motirawa aei arou ngke I kanakoa baiu ae m'aaka ni kamaiungkami man te toronaki i Aikubita.

16Karineia tamami ma tinami, ao e na ananau ma n tetekeraoi maiumi n te aba are I anganingkami.

17Kam na aki tiriaomata.

18Kam na aki wenenibure.

19Kam na aki kimoa.

20Kam na tai uaraoia tabem'aang.

21Kam na tai mataiakina aia b'ai tabem'aang. Kam na aki tataana buun temanna, ke nimataaiakina aia auti, abaia, aia toro, aia kao, aia aati, ke aia b'ai riki tabeua.

22E taetae te UEA nako ira ngkoa n te b'anaa ae korakora man te nang ae ura ngke ti bootaki i aon te maunga. E anganiira te UEA tuua aikai, ao bon ti aikai ao akea riki. Ao i mwiina, E koroi i aon atiibu aika uoua aika raababa ao E anganai.

Maakuia Aomata(Te Oti 20.18-21)Ao e taku Moote nakoia Iteraera:

23Ao ngke e tiirake te ai man te maunga, ao kam ongo te b'anaa man te rotongitong, ao a kawarai taani kairiri

24ao a taku:

E kaota korakorana ma mimitongina ara UEA ae Atuara nako ira. E taetae nako ira mai buakon te ai, ao ti a ataia b'a ngaia a boni maiu naba aomata e ngae ngkana E taetae te Atua nakoia.

25Ma ti aki kani mate n te ai are kamamate arei, ao ngkana ti teimatoa n ongo b'anaan te UEA, ao ti na mate.

26Iai aika a tia n ongo b'anaan te Atua ni koaua man te ai n ai arora? Ao ngkana a tia, a kona n teimatoa ni maiu ma n tataekinna?

27Moote, naako waerake ni kaaniiko ma te UEA n ongo i Rouna. Ao manga okirira n tuangiira, ao ti na karaoi b'aai ni kabane akana E taekin.

28Ao E ongo b'anaami te UEA ao E taku:

Moote, I ongo aia taeka aomata ake a taekin nakoim, ao I kakoauai.

29Tera ngke a taromauriai n taai nako ma n ruru ni maakai, ma n ongotaeka nakon Au tua ni kabane. B'a ngkana a karaoa anne, ao a na tetekeraoi ma natiia ma ni kukurei.

30Ko na tuangiia ngkai b'a a na okiri aia autinrianna,

31ma ngkoe ko na okirai ikai. Ao ngkana I tia n tuangko Au tua ma Au reirei, ao ko na manga taekin nakoia aomata, b'a a aonga n ongotaeka nakon tuua aikai n te aba are I anganiia.

Ao e taku Moote:

32Kam na riai n ongotaeka raoi nakon ana Tua te UEA.

33Irii nanoia, b'a a na kairingkami nakon te maiu ae ab'ab'aki ma n tetekeraoi n te aba are anganingkami te UEA.