Otea 12 - Kiribati New Version Bible

1E kabongnga Iteraera ni kakiokioa

te ang man te rereua;

keewe ao aaro n tiritiri

a nooraki n taabo nako.

A karaoaki taiani boraraoi ma Aturia;

a anaaki b'aan te oriwa nako Aikubita.

Kabuakakaan Iteraera Ma Iuta

2E katuaaia naba

kaain Iuta te UEA,

ake ana kariki Iakob'a.

E na katuaaia

i bukin te b'ai are a tia ni karaoia.

3I m'ain bungiakin Iakob'a,

E a kaman kam'anea tarina,

ao ngke e tabe n rikirake,

e manga un ma te Atua.

4E kaunrab'ata Iakob'a i Betaera

ma te anera ao e tokanikai;

ao i mwiina e buubuti ma ranni matana,

e buubuti i bukin kakab'aiana,

ao E taetae te Atua nakoina ikekei

5Aran te Atua bon te UEA,

te UEA ae te Atua ae Moan te M'aaka.

6Ma ngaia are, ko na okira Atuam.

Onimakinna ma te taotaonaki n nano,

ao kaota nakoina te tangira ma te eti.

7Iteraera, ko kukurei n te kewe

ao ko aonikaiia

aomata tabem'aang.

8Ko kaangai i bon iroum, “I a kaub'ai!

I bon karekei ni kabane i bon irou,

ao akea te bure iai.”E Bon Teimatoa Te Atua N Riki B'a Atuan Iteraera

9Iteraera, I bon teimatoa naba n riki b'a Atuam

Ngai ae te UEA,

ni bon arou naba ngkoa

man te tai are

kam mena iai i Aikubita.

Ngkai N na imanonoiko

b'a ko na manga maeka riki n te autinrianna,

n aron are kam karaoia ngkoa te rereua.

10I taetae nakoia burabeti

I aki toki n taetae n taian mii.

Ma ngaia are, N na kanakoa te burabeti

ma rongorongon rokon te kabuanib'ai.

11E rangi n rawaawata ana bure Kireata

ao tokina bon te urubekebeke.

A kareanaki taian kaom'aane i Kireata

i aon te baonikarea are e karaoaki n taian atiibu,

ma a na kamaaenikunaki taian atiibu aikai

nakon taian tawaana nako.

12E biri nako Iakob'a nako Turia

ike e kaawakina te tiibu iai

i bukin karekean buuna.

13I kanakoa te burabeti are Moote

b'a e na kairiia Iteraera mai Aikubita

ma ni kaawakiniia raoi.

14Iteraera, N na karaoiko b'a ko na kabomwi

i bukin am bure aika a kakamaaku

ao i bukin kamatauningaau.