Ieremia 49 - Kiribati New Version Bible

Ana Taeka Te UEA

I bukin Ammon

1E taekina te b'ai aei te UEA i bukiia botannaomatan Ammon:

A rangi ni m'aiti

natiia Iteraera

aika a b'aib'ai n te aba.

Ma ngaia are, e aera ngkami aika taan taromauria

te anti are Mirekom

ngkai kam a anai taiani kaawa ao aaba

ake aia b'ai kaain te baronga are Kata?

2A na roko boong are N na kanakoa iai te taanga ni buaka

b'a e na buakana Rab'a,

are ami kaawa n tautaeka.

E na tiku n uruaki,

ao a na wene ni mannang

kaawa aika a uarereke ake i rarikina nako.

Kam anai tabeua abaia Iteraera,

ma n te bong arei

a na anai ami b'ai Iteraera.

3Kam na tang kaain Etibon:

E na riki ami kaawa b'a b'ariko n atiibu aika a maerikiriki.

Ane kam na rairaki n aki akaaka,

ma a na bonotaki kawaimi.

Karin kunnikai n aki akaaka i aomi ao taang,

ngkami aika kaain Rab'a,

i bukina b'a a na anaaki

bouananti ake kam taromauri

nako abaia ianena,

n reitaki ma ibongana

ao mataniwiin ana Tembora.

4Ngkami aika kaain Ammon aika taani kamangao

kam onimakin kaub'aimi ao kam titiraki ni kaangai,

“Antai ae e konaa ni buakaniira?”

Ma I kauringngkami b'a kam na aki kainikatonga

ngkana e a tabe ni mauna nako korakorami.

5Bon te UEA Ngai ae Moan te M'aaka,

ae I kona ni kanako ia botannaomata akana i rarikimi

b'a a na oreingkami n te maaku.

Ane kam na uamaaenako,

a na akea ae e na tararuaia

ami koraki ake taan raweimaiuia.

6Ma e ngae n anne, ao a na roko boong ake n na uotiia iai

au aomata nakon mwengaia.

Bon aei au taeka Ngai ae te UEA.

Ana Taeka Te UEA

I bukin Etom

7Aio te b'ai ae taekinna te UEA ae Moan te M'aaka i bukin Etom:

E a tia ni mauna nako te wanawana ma te iango raoi

mai Teman.

N nang karokoa te kabuanib'ai ni katuaaingkami

ngkami aika ana kariki Etau,

8ma ngaia are, e riai n rairaki

ni biri nakon Mwengana

ane e roko mai Tetan.

9A na katikui tabeua uaan aia kureebe

aomata aika a taia uaan aia kureebe i bukiia aika a maiu ni kainano

A na ti anai baika a tangiri taani kimoa

ngkana a roko ni kimoa n te tairiki.

10Ma N na anai b'aai ni kabane

aika kam b'ain,

ngkami aika kaain Etom,

ao n na kaoti taabo nako

ike kam kaakarabai.

Ao i mwiina, kam na mate,

ao ai uana naba ma ami ataei,

ami koraki ao kaain rarikimi nako.

11Ma kam na katikuia ami ataei

aika akea tamaia

ao aine aika akea buuia.

12Ao a na mooi naba ni m'angkon uniu botannaomata aika a aki riai ni katuaaeaki. Ao tera riki ami anga ni biri nako?

13Boni Ngai ae te UEA ae I tuea ni bon arau b'a oin ami kaawa ae Botira ao ami kaawa ni kabane a na bane n karawaawataaki ni katauakiia ae e kakamaaku. A na wene n uruaki n aki totoki, ao aomata ana kabongana te ara ae “Botira” b'a te taeka ni kamaraia

14N na kanakoa te tia uarongorongo

b'a e na tuangiia botannaomata nako

b'a a na katauraoi nakon te buaka

ni kaaitaraia kaain Etom.

15E na rangi ni uarereke ami botannaomata,

ao e na bon ribaaki irouia botannaomata ni kabane.

16E burebureingkami te kainikatonga b'a kam na iangoia

b'a a taraingkami botannaomata ake tabeua

ma te maaku.

Kam maeka i buakon taabo aika a katati rikaaki

ao i aon taiani maunga

kaanga taian ikare,

ma bon Ngai ae te UEA

ae N na uotiko rikaaki.

17Ane a na tiaoki

akana i rarikin abam ao a na maaku

ngkana a noora te kabuanib'ai

18ae kaanga ai aron buakakan te urub'ai

nakon ngkoa Totom ma Komora

ao kaawa nako ake i rarikiia.

E na akea kaain te kaawa ae Etom.

19N na buakaningkami

kaanga te raian man te buakonikai,

ngkana e un nakon te tiibu n te tawaana

are i mataniwiin te Ioretan.

N te tai are a biri iai te nanai n tiibu,

e na akea kanoan te aba.

Antai ae N na rineia b'a e na buakaningkami?

Boni Ngai!

Bon akea ae e konaa ni kairoroai b'a N na buaka

ke ni kakioai nako.

20Kam na ongora nakon Au babaaire i bukimi

aika kaain Etom.

Ane a na aeaeaki nako natimi

ao e na uruakaki abami.

21A roko karongoaan uruam

n Taari are Uraura

ao e na ioioa te aonnaba.

22A na kiba rikaaki aiam ni buakaniko

kaanga te ikare ae e taakin baina ni kiba

ma ni kibakiba i aon Botira.

Ane a na tauaki n te maaku

am taani buaka.

Ana Taeka Te UEA

I bukin Tamateko

23E taku te UEA i bukin Tamateko:

A a tia n ongo rongorongom ae e aki raoiroi

ni kaawa aika Amata ao Arab'ata.

A a tia ni bua aia kaantaninga,

ao e a taoniia te nanououa

kaanga ai aron naon marawa.

24Ngkami aika kaain Tamateko

e a tia ni bua ninikoriami,

ao kam na rairaki n iakaka ni biri nako,

ma n tauaki n te maaku ao te maraki.

25I rangi ni kukurei ngkoa

n ami kaawa aika a buubura aika tanoata taekaia.

Ma I kauringkami, “Biri nako

i m'aain ae kam a aki konaa!”

26N te tai ae e aki maan, a na wene

ni mate ami tautia i nanon kawain nako te kaawa.

Bon aei au taeka Ngai ae te UEA

ae Moan te M'aaka.

27N na kaura te ai i aon oon nako ami kaawa

ma ni kabuoki ni kab'akai

taian nono ake karaoi ngkoa te Uea are Benatata.

Nebukaneta Ma Aomatan Te Rereua

28Aio te b'ai are e taekinna te UEA i bukin baronga are Keta ao kaawa aika a uarereke n te rereua ake a tauaki i roun Uean B'aburon are Nebukaneta: ake a tia n tauaki i roun uean B'aburon are Nebukaneta

Ongo, ngkami aika kaain Keta

ma baronga ake te korakina

ake n rereua i mainiku.

I a tia n tuanga Nebukaneta

b'a e na buakaningkami ma ni kamaunaingkami.

29Ane ana katobibiaki

irouia ana taanga ni buaka aika akea maakuia,

ma n anai ami autinrianna ma ami b'ai,

ami tiibu ao ami kaamero nako.

30Biiri ni karabaingkami,

ngkami aika kaain te rereua

aika kam maeka n taiani kaawa aika a uarereke!

Iai ana babaaire ae e buubura Nebukaneta

i bukimi.

31Bon akea oon ami kaawa aika a buubura

ao bon akea kaain rarikimi aika a na konaa ni buokingkami,

ao ae kam bon iangoia naba b'a kam mano

ma ngaia ae, I tuangnga b'a e na buaka.

32Ao i mwiina, a na aki riki ami kaamero

ao te nanai n tiibu ae e korakora

b'a ami b'ai.

Kaain Rereuan Arabia,

ane e na oroingkami te kabuanib'ai

man taabo nako,

ao ane kam na kamaaenakoaki

i aon te aonnaba.

33Ti taian tiakaore aika a na maiu

ike a tei iai ami kaawa aika a uarereke.

Bon aei au taeka Ngai ae te Atua.

Ana Taeka Te UEA

I bukin Eram

34-35E aki maan i mwiin uean Tetekia i aon Iuta, e taku te UEA ae Moan te M'aaka nako iu:

Aomatan Eram.

Ngai, te UEA ae Moan te M'aaka,

N na tiringiia taani katebe

ake a kakorakoraa Eram.

36A na buaka kairiribai

man taabo nako,

ao kam na kairaki nako b'a taenikai

nako ia botannaomatan te aonnaba.

37Ko na kamanatuaaki

ao ko na tiringaki irouia aia taanga ni buaka,

ao kam na kaitibo ma te kabuanib'ai

are e reke man marakin nanou.

38Ane a na mate

ami uea ma ami mataniwi, ao N na tautaeka

n aia tabo.

Bon aei au taeka Ngai ae te UEA.

39Ma I berita b'a n te tai teuana

are N na uotiia ami aomata

n okira abaia.