Te Otinako 38 - Kiribati New Version Bible

Te Baonikarea i bukin Kabuokan Te Karea(Te Oti 27.1-8)

1Ao e karaoa te baonikarea Betarera man te kai ae te aketia i bukin te angakarea. Ao buburana bon uoua te miita raababana ma ab'akina ae tenua te miita rietana

2ma koonana aika a rine rake kaanga koron te kaomm'aane, ao e rabunaki ni kabane rab'atana n te buraonti.

3A karaoaki b'ain nako te baonikarea n te buraonti—te baan i bukin te mannang aika a kabuebue, taian tiabora, waiteken te irikoniman, ao baanin te ai.

4E karaoa riin te baonikarea ni katobibia te baonikarea i nuukan tabona mai eta ma oina, ao katamaroaana te warawara ae te buraonti.

5Ao i mwiina, e kanim'a te m'am'a te buraonti i aan te rii are n taian koona ake aua i bukin karinakin taian amo.

6E kabiri taian amo ake uoua ake taian aketia n te buraonti ao

7e karin i nanon taian m'am'a i bukin amoakin te baonikarea, are tein te b'aoki ae e uki.

Te Boora Te Buraonti Ae E Buubura(Te Oti 30.18-21)

8Ao e karaoa naba te boora te buraonti ae e buubura ao te kaintei man te buraonti aia tirotaam aine ake a buobuoki ni mataroan te Um'antabunrianna.

Te Katawanang Are I Tinanikun Te Um'antabunrianna(Te Oti 27.9-19)

9Ao e karaoa te katawanang Betarera i tinanikun te Um'antabunrianna

10ae abwi ma aua te miita ab'akina i maiaki ao i meaang ao uabwi ma uoua te miita raababana i mainiku ao maeao.

11E kamanenai uabwi boua buraonti n uniki i aon kaintei buraonti i bukin maiaki ao meaang ao tebwina i bukin maeao.

12Ao i mwiina, e katinei keeten aika riinen aika a tamaroa aikai i aon boua ake n itera aika tenua aikai,

13ao e kamanenai taian uki ake taian tirewa ao taian biti.

14E katei tenua boua buraonti i aon iteran nako keetenin te mataroa

15n rin are i mainiku n tatabeua nako,

16ao e katinea te keeten ae 6.67

17te miita raababana i aon teuana teb'ab'ati ni boua.

18E karaoa naba mataroan te katawanang Betarera, e karaoa te keeten ae ruaiwa te miita ab'akina, ao e katinea i aon taian boua aika a aai aika a tei i aon taian kai n tei aika buraonti.

19Ti te bo rietan te keeten aei ma ake n taian katawanang ni kabane ao a karaoaki n te riinen ae e tamaroa ao e korotinaki ao e rarangaaki n te buraentiibu ae e buru, ao ae uraro, ao e uraura. E katinea te keeten i aon taian boua aika aai, ao e kamanenai taian uki tirewa ao taian biti.

20A karaoaki taian beke i bukin te auti n rianna ao i bukin taian keeten ake a katobibia te auti n rianna n te buraonti.

Te Um'antabunrianna

21E kaai ni m'am'akuri Betarera ma Ooriaba,

22are bon te tia korotamnei ao te tia koroboki n te unika, ao te tia korooti n buraen te tiibu ae e buru, ae uraro, ao ae e uraura. A kaai ni katiaa raoi te m'akuri are e mwiokoia iai te UEA.

23Ao Moote, e angan natin Aaron te mm'aane are Itamara tauan mwiin taian biti ake a kamanenaaki i bukin Um'antabunrianna.

24N aron te kainibaaire n te rawaawata ae b'ainaki, m'aitin te koora are e anga te aba bon teuana te ngaa te kirokuraem,

25ao bootan m'aitin te tirewa are e rikoaki ngke e warekaki m'aitiia aomata bon 3,430 te kirokuraem

26A bane ni kab'aka te m'aiti ae e tangiraki aomata nako ake a warekaki, ao bootan m'aitiia mm'aane bon 603,550 aika e raka aia ririki i aon uabwi.

27E kamanenaaki tenibwi ma aua te kirokuraem te tirewa i bukin karaoan tebubua taian kai n tei nako i bukin te Um'antabunrianna ma keetenna.

28Ao te nikira are tenibwi te kirokuraem te tirewa a kamanenaaki i bukin taian uki ao kaibiti ao i bukin naba rabunan tabon taian boua mai i eta.

29E anga te aba uoua te ngaa abubua uabwi ma nimaua te kirokuraem te buraonti.

30Ao e kamanenaaki i bukin karaoan taian kai n tei i bukin te mataroa n rin nakon te Um'antabunrianna, te baonikarea ma warawarana, b'ain nako te baonikarea,

31taiani kaintei n taian boua ake a katobibia te katawanang n reitaki ma ake n te mataroa n rin nakon te katawanang, beken te auti n rianna ao te katawanang.