Etekiera 18 - Kiribati New Version Bible

Ana Mate Aika A Bure

1E taku te UEA:

2Etekiera, I ongo b'anaaia aomata b'a a kamanenaa te taeka nikawai ae e kaangai,

“Te kureebe ae e maai ae e kanaki irouia kaaro

e katuka te maai i nanon

wiia natiia.

3Ngkai ko na tuangiia b'a bon te UEA Ngai ae te Atua, ae I tuatua b'a e na aki manga taetaekina te taeka anne i aon Iteraera ngkai I bon maiu.

4Bon au b'ai maiuia aomata ni kabane, kaaro ao ai uana naba ma naati. Bon ti aika a bure aika a riai ni kamateaki.

5Ngkana tao arona b'a iai te m'aane ae e rangi n raoiroi ae e kaakaraoa ae e eti ao e raoiroi.

6E aki kan kang taian karea i bukiia antiia ianena n taiani baangota ke n taromauri bouannantin nako Iteraera. E bon aki wene ni bure ma buun te m'aane temanna ke te aine ae e aoraki n aine.

7E aki konaa ni burebureia aomata ke ni kimoa ana b'ai temanna ao e aki toki ni kaakaokii b'aai ake a katukaki i rouna b'a taiani b'ai ni kakoaua i bukin te roun; e angaanga taiani kunnikai nakoia aika a maiu ni kainano

8ao e aki taataui bakaon taian tangom'ane. E rawa ni karaoi m'akuri aika a buakaka; e karaoa ae e raoiroi nakoia aomata nako

9ao e kakaonimaki n ongotaeka nakon au Tua ma au reirei nako. E rangi n raoiroi te aro aei, ao I berita b'a e na reke maiuna.

10Ma ngkana tao arona b'a manga iai natin te m'aane aei ae te m'aane ae e buakaka ae e tiritiri ao e kaakaraoa te bure

11ae e aki kaakaraoia tamana. E kaakang iriko ake ni baangotan te aba, ao e wene ni bure ma buun temanna,

12e burebureia aika maiu ni kainano, ao e kimoaia aomata. E taui b'aai ake e anganaki b'a b'aai ni kakoaua i bukin te roun. E taataromaurii bouannanti, ao e karaoi b'aai aika a rangi n ribaaki,

13ao e anaa te bakao ae e buubura ngkana e kataarau n te m'ane. Te mm'aane ae e buakaka n aron anne e na bon aki maiu. Bon ngaia ae e karaoi buure aika a kakamaaku aikai, ma ngaia are, akea ae e bure nakoina.

14Ma ngkana tao arona b'a iai natin te m'aane aei te m'aane ae e bon nonori b'aai ake e karaoi tamana ao e rawa ni katotoongnga.

15E rawa ni kana te iriko ni man are e mena ni baangotan te aba ke n taromauriia aia bouannanti Iteraera, ao e aki wene ni bure ma buun temanna.

16E aki konaa ni burebureia aomata ke ni kimoa temanna ao e aki tangira te b'ai ni kakoaua i bukin te roun. E angaanga te kunnikai nakoia aika a maiu ni kainano

17ao e rawa ni karaoa te m'akuri ae e buakaka ke n anaa bakaon ana tangom'ane te aomata ae e tangom'ane i rouna. E iri nanon au Tua nako ma au reirei nako. E na riai ni maiu te m'aane aei. E bure tamana, ma e na kamaiuaki te m'aane ae e raoiroi aei ao e na aki tiringaki i bukin ana bure tamana.

18Bon tamana ae e na bon mate i bukin burebureaia aomata ma kimoakiia ao karaoan te m'akuri ae e buakaka.

19Ko na mimi b'a e aera ngkai e aki katuaaeaki natina te m'aane i bukin ana bure tamana. I bukina b'a e karaoa ae e raoiroi ao e ongotaeka nakon au Tua nako.

20Bon ti aika a bure aika a na tiringaki. A na aki karawaawataaki naati i bukin aia bure aia karo, ao kaaro a na aki karawawataaki i bukin aia bure natiia. A na bon riai n anganaki kaniwangaia aomata aika a raoiroi i bukin te b'ai are e a karaoia, ao aomata aika a buakaka a na katuaaeaki i bukin te b'ai are a karaoia.

21Ao ngkana arona b'a a katoka karaoan te bure ma ni moana iran au Tua ma ni karaoa ae e raoiroi. Ao a na bon aki tiringaki.

22A na bane ni kab'araaki aia bure, ao a na kamaiuaki ngke a karaoa ae e raoiroi.

23I bon aki tangiria n tarataraia aomata aika a buakaka ngkana a mate. I tangiria b'a N na nooria n rairaki man aia bure nako ma ni maiu.

24Ma ngkana a moana karaoan te bure aomata ma ni karaoi m'akuri aika a rangi n ribaaki, a na kamaiuaki? A na aki! E na m'aninga te aba taekan aia m'akuri aika a raoiroi aika a tia ni karaoi, ao a na tiringaki i bukin aia bure nako.

25Ngkami aika Iteraera kam bukinai b'a e aki eti ae I karaoia! Ma kam ongora, tiaki ngai ae I karaoa ae aki eti ma boni ngkami!

26Ngkana a manga moana karaoan ae aki raoiroi aomata aika a raoiroi, ao a na tiringaki, i bukina ngke a karaoa te bure.

27Ao ngkana a manga moana karaoan ae e raoiroi aomata aika a buakaka, ao a boni kamaiuia i bon irouia iai man te rekenikai.

28A na iangoi baike a tia ni karaoi ao a na katoka karaoan te bure, b'a aonga n aki tiringaki.

29Ma kam bon taku naba b'a I aki karaoa ae e eti. Bon ngkami aika kam karaoa te kaairua ao kam aki karaoa ae e eti!

30N na motikitaekami n tatabemaningkami nako ni kaineti ma te b'ai are kam a tia ni karaoia. Ma ngaia ae kam riai ni katoka karaoan ae e bure, b'a kam kaawa ni bon katuaaeaki.

31Kaaki arom aika a buakaka ao moana iangoan iango aika a raoiroi. Ao kakaonimaki nako iu! Ko tangiria b'a ko na tiringaki i bukin am bure!

32I aki tangiria Ngai ae te UEA ae te Atua b'a N na noora anne ngkana e riki nakoia aomata nako. Ma ngaia ae ani katoka karaoan te bure ao kam a maiu!