1Ongora ngkami aika taan taua taekan Iteraera! Kam kantaningaaki b'a kam na kaawakina karaoan te eti,
2ma ngaia kam tangira te bure ao kam riba te raoiroi. Kam kuoti kuniia au Aomata ngke a boni maiu, ao kam taeki irikoia man riia.
3Kam kaniia au aomata, kam kanakoi kuniia, kam otoi riia ao kam korokoroia nako nanon te b'aata kaanga taian iriko maiu.
4E na roko te tai are kam na tang iai nakon te UEA, ao E na aki kaekai ngkami, E na aki kan ongo ami tataro, i bukina b'a kam a tia ni karaoa ae e buakaka.
5A tia ni keweaki au aomata irouia burabeti ake a taetae ni burabetiia te rau nakoia ake a reke booia mairouia, ao te buaka nakoia ake a aki reke booia mairouia.
6“Ngkami aika burabeti e a roko tokin ami bong ni burabeti, e a bung taai i aomi. Kam a tia n aki kairiia raoi au Aomata. Kam na aki kona ni manga noori mii ni burabeti, ao kam na aki manga taetae ni burabeti.”
7A na kamamaaeaki burabeti akana a taetae ni burabeti i bukin taai aika a na roko b'a a na aki koro bukin aia taetae ni burabeti. A na kamamaaeaki b'a E na aki kaekaia te Atua.
8Ma ngai bon irou, E a tia ni karina tamneina ao korakorana te UEA irou, ao E anganai ataakin te eti ao te ninikoria ni kan tuangiia Iteraera aroia aika a bure.
9Kakauongo ngkami aika taan tautaeka i Iteraera, ngkami aika kam riiribaa te eti, ao kam kab'aoua te raoiroi nakon te buakaka.
10Kam katea ana kaawa te Atua ae Ierutarem i aon aana ae te tiritiri ma te kaairua.
11A taua taekaia aomata taan tautaeka i bukin te babakanikawai. A kab'arab'arai tuua ibonga i bukin kaboakiia. A taetae ni burabeti i bukin te m'ane. Ao a bane n taekinna b'a aongkoa e mena te UEA irouia. Ao a kaangai, “Akea te rekenikai nakoira. E boni mena te UEA iroura.”
12Ao i bukim, e na kamarauaki Tion kaanga te tawaana, ao e na riki Ierutarem b'a b'ariko ni b'ai aika a uruaki, ao tabukin te Tembora, e na riki b'a te buakonikai.
Who We AreWhat We EelieveWhat We Do
2025 by iamachristian.org,Inc All rights reserved.
