1.Rongorongo 21 - Kiribati New Version Bible

Warekaia Aomata iroun Tawita(2 Tam 24.1-9)

1Ao e iangoia Taatan b'a e na karekea te kangaanga nako ia Iteraera ngke e karika Tawita b'a e na iangoia b'a te iango ae e raoiroi kakaean m'aitiia aomatan Iteraera ma Iuta.

2Ao e taku Tawita nakon Ioaba ao mataniwiin te taanga ni buaka, “Wareki m'aitiia aomata ni kabane i Iteraera, man te kaawa are Beerateb'a i maiaki ni karokoa Taan i meang. Ao n na ataia iai b'a m'aitira aika a mena ngkai i nanon au taanga ni buaka.”

3Ao e kaeka Ioaba, “Teuae ko karineaki, e ngae ngkana E karaoa abanueam tebubua te tai buuburana te UEA, ma ko bon tautaekaniia naba kaaina ni kabane. E aera ngkai ko tangiria n ataia b'a m'aitira am tautia? Ko aki ataia ae e na un iai te botannaomata ae e b'anin?”

4Ma e aki roko n te bitaki nanon Tawita. Ma ngaia are, e a nako Ioaba n taabo nako i aon Iteraera ma Iuta ni warekia aomata ni kabane. Ao e okira Ierutarem

5ao e tuanga Tawita b'a m'aitiia m'aane aika kaain ana taanga ni buaka bon teuana te mirion ao tebubua tengaa mai Iteraera ao abubua itibwi tengaa mai Iuta.

6E rawa ni kariniia kaain te baronga are Rewi ao Beniamin Ioaba, i bukina ngke e aki boraoi ana iango ma ana babaaire Tawita.

Katuaaia Kaain Iteraera iroun te Atua(2 Tam 24.10-17)

7E un te Atua n ana babaaire Tawita i bukin warekaia aomata, ao e katuaaia Iteraera.

8Ao e tataro Tawita ao e taku, “Bon am toro ngai. Ao e rangi nanobaba te b'ai ae I a tia ni karaoia ao e bon rangi ni kaairua. Taiaoka, kab'ara au bure.”

9Ao e taku te UEA nakon Kata, ana burabeti Tawita temanna,

10“Tuanga Tawita b'a N na katuaaea teuana mai buakon tuua aika tenua. Ma ngaia ae, e na rinea te tuua ane e tangiria b'a N na katuaaea iai.”

11Ao e kawara Tawita Kata ao e tuangnga te b'ai are e a tia n tuangnga te UEA:

Ko na rinea ane ko taku b'a E na katuaaeko iai te UEA:

12E na roko tenua te ririki ae e na akea iai te am'arake i bukiia ana aomata? Ke e na kookonaaki Iteraera irouia ana kairiribai i nanon tenua te nam'akaina? Ke E na karokoa te aoraki ae moan te kamaamate te UEA n orea iai te aba i nanon tenua te bong? Ko na iangoi baikai ao baairea, b'a n na manga angan te UEA are e kanakomaiai i bukin am kaeka.

13E rawaawata nanon Tawita ao e taku, “Bon te b'ai ae e matoatoa irou rineana! E akoi te UEA, ao I kukurei riki ngkana I rineia b'a ngaia ae e na katuaaeai nakon ae n na rineia tabem'aang.”

14Ma ngaia are, E kanakoa te aoraki ae moan te kakamaaku te UEA nako aon Iteraera, ike a mate iai itibwi tengaa Iteraera aika a mate iai.

15Ao i mwiina, e kanakoa te anera ni kamaunaa Ierutarem. Ma ngke e nang waaki te anera arei, ao e a uringaaba te UEA ngke e a noori taian rawaawata ni kabane ake E a tia ni karikia nako ia aomata, ao E taku nakon te anera, “E a bati n tau rawawataia anne.” E riki aei n te tabo ni kaaki kun ni uita are ana b'ai Arauna are kaain Iebu.

16Ao e noora ana anera te UEA Tawita i nanon te akea n taua ana kabaang i aon Ierutarem. Ao a bane ngaia ma taan kairiiri i aon Iteraera, ake a kunnikaia ni kunnikai aika a mangaingai, ni bobaraaki ni kabomataia ma aontano,

17ao e tataro Tawita ni kaangai, “Bon au kaairua te b'ai aei! I bure ngke I anga au taeka b'a a na warekaki aomata. Bon akea aia bure--bon tiibu ngaiia aika akea aia bure. Te UEA ae te Atua, taiaoka katuaaeai ma au utu, ao tai tiringiia am aomata n te aoraki.”

Kaboan te Tabo ni kaaki kun ni uita are ana b'ai Arauna iroun Tawita(2 Tam 24.18-25)

18Ao e tuanga te burabeti are Kata ana anera te UEA b'a e na tuanga Tawita b'a e na kabooa ana tabo ni kaaki kun ni uita Arauna ma ni katea te baonikarea iai b'a karinean te UEA.

19Ao e karaoi b'aai ni kabane ake e tuangaki Tawita iroun te UEA.

20A tabe ni kaaki kun ni uita Arauna ma natina m'aane ake aman n te tai anne, ao ngke a noora ana anera te UEA, ao a biri nako natina m'aane ake aman ni karabaia.

21Ao e rina n roko Tawita, ao ngke e nooria Arauna, ao e katoka ana m'akuri ao e bobaraaki nakoina.

22E taku Tawita nakoina, “Ko rawa ni kabooa am tabo ni kaaki kun ni uita aei nako iu, b'a I aonga ni konaa ni katea iai te baonikarea i bukin te UEA? B'a e aonga n toki tiringakiia aomata n te aoraki aei. N na kabooa nakoim n aron boona ane ko bon taku.”

23Ao e taku Arauna, “Anaia, teuae ko karineaki, ao karaoa ane ko bon taku nako iai. Ao ngai n na anganiko naba taiani kao b'a am karea ni kabuokaki, ao taian uita b'a am angab'ai are te uita. Ao ko konaa naba ni kabonganai taian baba ni kaaki kun ni uita i bukin am aia. Bon am b'ai ni kabane!”

24Ma e kaeka Tawita ni kaangai, “I aki! I tangiria ni kabooa n aron booia ane ko taku. I aki konaa n ti anaa te b'ai mairoum ao i mwiina, I anga te karea nakon te UEA ae tiaki korakorau.”

25Ma ngaia are, e kabooa te tabo ni kaaki kun ni uita arei Tawita nakon Arauna n te m'aiti ae onobubua te tianti ae te koora.

26E katea te baonikarea Tawita ao e anga karea i bukin kakukureian te UEA E tataro Tawita, ao e kaeka te UEA ni kanakoa te ai mai karawa nako aon te baonikarea.

27Ao E tuanga te anera te UEA b'a e na kanakoa ana kabaang.

28Ao ngke e nooria Tawita ae E a tia ni kaekaa ana tataro te UEA, ao e a manga anga riki ana karea ikekei n te tabo ni kaaki kun ni uita arei,

29i bukina b'a e maaka ana kabaang te anera arei ao e aki tangiria b'a e na nako Kibeon.

30Bon anne te tabo are e kaawakinaki iai te Um'antabunrianna are e karaoia ngkoa Moote i nanon te rereua, ni ikotaki naba ma taian baonikarea ike a anga te aba iai taiani karea nakon te UEA.