Otea 13 - Kiribati New Version Bible

Rokon Te Kangaanga I aon IteraeraE taku te UEA:

1Ngke a taetae ami taan kairiiri,

a bane n ruru ni maaku

ma ni kaota te karinerine ae e korakora.

Ma kam bure n taromauria B'aara,

ao kam urubekebekeaki.

2Ao ngkai ko teimatoa naba ni karaoa te bure

n arom ni korotamnei ma ni karaoi

taian bouannanti aika taian tirewa

aika bannan taian kao ataei.

Ko tuangaki b'a ko na anga karea

nakon taian bouananti aikai

eng, ao ni kiiti naba ma ngaiia.

3Ai ngaia are, kam na bane ni mauna nako

kaanga te maabubu ke te aoi

n te moaningabong,

ke kunin taian uita n te ang

ke te bubu ma n te kainibubu.

4Ngai ae te UEA ae I a tia n riki b'a Atuami

man te tai are

kam mena iai Aikubita.

Bon ti Ngai te Atua ae kam ataia,

bon ti Ngaia ae e konaa ni kamaiungkami.

5I tararuaiko

n te rereua are e rangi ni b'atakataka.

6I kaam'arakeingkami ni karokoa kam rauaki,

ao i mwiina, kam a manga kainikatonga

ao kam m'aninga taekau.

7Ngkai N nang un kaanga te raian,

n na bakairaa kaanga te reeb'ari ae wene n tataninga,

8ao n na raebitingkami kaanga te bea aine

ae e iraeaki natina,

n na kakerui riimi

b'a kaanga aongkoa Ngai te raian

ke maan ake a aki manana ake tabeua.

9Iteraera, bon aei tokim.

Kam na aki kaantaningaa buokami mairou.

10Kam tangira te uea ao te tia tautaeka.

A angaa ngkai ami uea?

Kaawa raa aika iai taan tautaeka iai?

11I anganingkami te uea i bukin marakin nanou;

I uotia nako i bukin buakakan nanou.

Tokin Iteraera Ae E BuakakaE taku te UEA:

12Iteraera, a tia am bure aika a kakamaaku

ni koreaki taekaia

ma ni kaawakinaki.

13Ti te bo ngkami ma te ataei ae akea ana iango

ae e rawa ni bungiaki

ngke e roko raoi ana tai ni bungiaki.

14E bon riai Irou Ngai ae te UEA b'a N na kamaiungkami

man te mate ma te ruanimate?

I aki! I wetea te mate ma te ruanimate

b'a e na oreingkami kaanga rokon te kai.

I rawa ni kaota te nanoanga.

15E aoria ngkana kam kakab'aia

riki nakoia baronga ake tekorakina,

N na kamaunaa nakoko Ngai ae te UEA,

kaanga aron te ang ae kabuebue

ae kam'aua te karaanga n ran.

N na uoti nako

kaub'aimi aika a tamaroa.

16E na katuaaeaki Tamaria

i bukina ngke e manga kaaitaraai.

E na uruakaki n te buaka

a na oreaki ataeina

ma taiani b'aa,

ao a na katabwenaaki birotoia

aine aika a bikoukou.