Iobi 39 - Kiribati New Version Bible

1Ko ataia b'a a bung ningai kootin maunga?

Ko a tia ni matakuakina te ria ae katam'anti ngkana e bungiia natina?

2Ko ataia b'a maanra ni uouotia natiia?

Ko ata aia tai are a bung iai?

3Ko ata aia tai are a na karinanoi bukiia iai kooti aine

ni bungiia natiia nakon te aonnaba?

4a rikirake ni marurung natiia i nanon te buakonikai;

A kitaniia tinaia, ao aki manga okiria.

5Antai ae anganiia taian aati aika katam'anti inaomataia?

Antai ae kab'ara kabaeana ma ni kanakonakoa?

6Bon Ngai ae I anganiia te rereua b'a mwengaia,

ao I kamaekaia i aon taabo aika aoraoi.

7A kararoaia man kaawa aika buubura aika karongoa,

ao bon akea ae kona ni kamananaia ma ni kam'akuria.

8A riki taiani maunga b'a aia tawaana n uteute ike a am'am'arake iai,

te tabo ike a ukoukori iai baika kiriin b'a a na kang.

9E kona ni m'akuri te kaom'aane ae katam'anti i bukim?

ke n tiku n te tabo ni kam'arake man ni katoa tairiki?

10Ko kona n rooa temanna ma ni kam'akuria b'a e na kamaraua te tano?

Ke ko kabaea te kai ae e buubura ma ngaia b'a e na katikitikia ni kaboraoa te tano?

11Ko kona ni mwiokoa korakorana

ma ni kantaningaia b'a e na karaoi am m'akuri aika rawawata?

12Ko kantaningaia b'a e na uoti rikaaki am tai,

ma ni boboti taian uita ake n am tabo n oro uita?

13E ubouboi baina ni kiba

te aotitereti ma te kakatonga,

ma e aki kakatonga

i bukiia natina.

14E kitana bunimoana

te aotitereti i aon te tano

b'a e na kaabueaki ni kabuebuen te tano.

15Ao e aki raraomaeakina

touakina n te wae,

ke uruakina i rouia maan aika katam'anti.

16E karaoa aron ae kaanga

tiaki bunimoana,

ao e aki tabe ngkana e a tia

ni banebuaka korakorana iai.

17Boni Ngai ae I kananobaba,

ma n aki anganna te wanawana.

18Ma n te tai are e biri iai,

ao e ngareakina te tia toka

i aon te aoti ae birim'aaka.

19Ngkoe Iobi ae ko karaoi ngkoa taian aoti b'a a na korakora,

ma n anganiia naba buraen roroaia aika tamaroa?

20Ngkoe ae ko karaoia b'a a na kiba n aroia taian taake

ma ni kakamaakuia aomata n tangitangin ikeikeia?

21A rangi ni ingainga nanoia ni kan biri;

A kabane korakoraia ni biri nako buakon te bo ni buaka.

22A babanga ni maaku,

ao bon akea te kabaang ae kona ni kaokiia rikaaki.

23A kekeruatai ma n raaitiiti i aan ootan taai

b'aai ni buaka ake e uoti te tia toka i aon te aoti.

24A kabane biriia n rimoa taian aoti ma te ingainga n nano;

ao aki kona n tei n aki kakam'akuri ngkana e a tang te bu.

25A katoa tangin te bu ma tangin ikeikeia;

ao a kaman aroka boin te bo ni buaka i m'aain rokona,

ao a ataa naba takaruan te mataniwi nako ia ana tautia.

26E koaua b'a e reireinna ni kiba te aoki mai roum,

ngkana e kiba nakoaiaki?

27E kona n tataninga am kaetieti te ikare

b'a e na karaoa ngaona i eta i aon taian maunga?

28E karaoa mwengana i aon taian b'a aika rietaata

ma ni kariki b'a nonona?

29Ao e taratarai taabo aika kaan ma aika raroa

i bukin baika e na tiring ni kang.

30A ikotaki taian ikare ni katobibia te mate,

ao a nima te raraa taian ikare aika uarereke.