2.Rongorongo 2 - Kiribati New Version Bible

Ana Bubuti Toromon Nakon Iram Buokan Karaoan te Tembora(1 Uea 5.1-12)

1E iangoia Toromon b'a e na katea te Tembora are E na tataromauriaki iai te UEA, ao e na katea naba ae bon ana bareti.

2E kam'akuriia itibwi te ngaa te m'aane b'a taan uouoti b'ain te kateitei ao wanibwi te ngaa m'aane b'a taan koro atiibu man taian tabuki. Ao e rineia tenua te ngaa ao onobubua te m'aane b'a taani kairiia taani m'akuri.

3Ao e kanakoa ana rongorongo Toromon nakon uean Turo are Iram:

N taai ake ngkoa ngke e karaoa ana bareti tamau are Tawita ao ko katauraoi taiani kai aika tiira nako ina. Ao ngkai ko konaa ni karekei naba nako iu au b'ai ni m'akuri?

4I a karaoa ngkai ana Tembora te UEA ae Atuau are e na taromauriaki iai. A na kabuokaki iai taian b'ai ni kaboiarara, ao e na anganaki iai te kariki are e tabu. A na anga karea nakon te UEA taan taromauri ni katoa ingabong ao tairiki, ni katoa Taabati, ao ni katoa te Toa ae Moan Otin Nam'akaina, ao ai arona naba ma taian toa ni kabane. A na karaoaki b'aai aikai n taai nako n aron are E a tia n baaireia te UEA.

5E na riki b'a te Tembora ae moan te kakannato, i bukina ngke E kakannato riki Atuara nakoia anti ake tabem'aang.

6Bon akea temanna ae e konaa ni karaoa te Tembora ae e tau buburana i bukin te Atua, a rangi ni uarereke naba taiani karawa b'a nnena ni maeka! Ti te b'ai ae I konaa ni karaoia bon ti te tabo are ti na konaa n anga taiani karea iai nako ina.

7Kanakomai nako iu taani m'akuri aika a aki ti konab'ai ni karaobanna, ma a konaa naba ni m'akuri ma taiani koora, tirewa, buraati, ao taiani biti, ao ai uana naba ma karaoan taiani kunnikai aika a tokatoka mataia. Aomata akana ko na kanakomaia, a na m'akuri ikai i Iuta ao i Ierutarem b'a a na raoniia taani m'akuri aika a rabakau ake e a kaman kabooia ni kam'akuriia ngkoa tamau.

8I ataia b'a iai am taani m'akuri aika a rabakau ni korokai i Reb'anon, Ma ngaia are, ko konaa ni kanakomaia nako iu taian tiira, m'aiango, ao kaai ake arekam? A na roko ikekei au taani m'akuri ni buokiia,

9b'a I tangira te kai ae e rangi n rawata i bukin katean te Tembora ae korakora ae e mimitong.

10N na kaboia am taani korokai 2,000 te uita, ae m'aitin naba te b'are, 400,000 te riita te wain, ao m'aitin naba anne b'aan te oriwa.

11Ao e kaoka ana kaeka Iram nakon Toromon:

I ataia b'a E bon tangiriia ana aomata te UEA, b'a e a tia n rinea aia uea.

12Kamoamoa te UEA ae Atuan Iteraera are E karaoa karawa ma aonnaba! E a tia n angan Tawita natina te m'aane ae e aki ti rabakau ma ni m'aatai, ma iai naba rabakauna ni karaoa te Tembora i bukin te UEA ao ni karaoa naba te bareti bon i bukina.

13I kanakoatia nakoim Uram Abi. E rangi ni wanawana.

14Bon Iteraera tinana man te baronga are Taan, ao tamana bon kaain Turo. E aki ti rabakau ni m'akuri ma te koora, te tirewa, te buraati, te biti, te atiibu, ao taiani kai, ma e boni konaa naba ni karaoi taiani kunnikai aika tokatoka mataia ao taian rinen aika a raoiroi. E konaa naba ni katotongi taiani banna ni kabane akana ko anganna b'a e na katotongi. E konaa naba ni buokiia am taani m'akuri ao koraki akana e kam'akuriia ni kabooia ngkoa tamam are Tawita.

15Waaki ni kanakoi am uita, b'aare, b'aan te oriwa, ao te wain akana ko a tia ni berita b'a ko na kabooia iai au taani m'akuri.

16N na tuangiia b'a a nang waakina korean taiani kai i Reb'anon. A na koroi n aron m'aitin ane ko tangiria, ao a na booti ni kabaei b'a taian ebaeba, ao a na kabeti ri mataniwi nako Ioba. Ao a konaa n anai am taani m'akuri mai ikekei nako Ierutarem.

Ana taani M'akuri Toromon

17Ao Toromon e wareki m'aitiia iruwa ake a maeka i Iteraera, n aron are e karaoia naba ngkoa tamana are Tawita ngke e uea, ao bootaia bon 153,600.

18E anganiia aia m'akuri 70,000 mai buakoia b'a taan urakin b'ain nako te kateitei ao 80,000 mai buakoia b'a taan koroatiibu man taian tabuki. E rineia 3,600 b'a taan taraia taani m'akuri ma n taraia raoi b'a e na tia raoi te m'akuri.