1Ai tib'a uabwi ma nimaua ana ririki ni maiu Etekia ngke e moana ueana i aon Iuta, ao e tautaeka i nanon uabwi ma ruaiwa te ririki mai Ierutarem. Aran tinana bon Nei Abiia are natin Tekaria te aine.
2E ongotaeka Etekia iroun te UEA b'a e karaoi m'akuri aika a raoiroi, n aron are e a tia ni karaoia ana bakatibu are Tawita.
Kaitiakan te Tembora3N te moan nam'akainan ana moan ririki n tautaeka Etekia, ao e kauka mataroan ana Tembora te UEA ao e a manga onob'aia.
4Ao i mwiina, e weteia ibonga ao kanoan Rewi nakon katawanangin te Tembora are mai mainiku
5ao e taku:
E a bo te tai ni kaitiaka ana Tembora te UEA ae Atuaia ara bakatibu. Kam na moan nako ngkami kanoan Rewi nakon te bootaki b'a kam na kaitiakingkami, ao i mwiina kam na manga nako nakon te Tembora ao kam na kaotinakoi b'aai n kabane aika a baareka ao aika a aki tau i bukin te UEA.
6A aki kakaonimaki tabeman ara bakatibu ao a aki ongotaeka naba iroun te UEA ae Atuara. A aki ti tannako mairoun te UEA ma a bon aki karinea naba ana Tembora.
7A kain mataroana, ao a manga tiring taurana ao a katoka kabuokan taiani b'ai ni kaboiarara ma te anga karea i nanona.
8E rikirake ni korakora unin te UEA irouia kaain Iuta ma Ierutarem, ao a bane ni mimi aomata ma ni maaku n te b'ai are e karaoia ni katuaaia iai.
9A aki ti tiringaki ara bakatibu n taian buaka, ma a bon uotaki nako naba ara ataei ma buura b'a taian taenikai.
10Ma ngaia are, I a tia n baaireia b'a ti na manga kabooua ara boraraoi ma te UEA ae Atuan Iteraera. E na mena ngkoa ao e a ti toki naba iai unna iroura.
11Ti na aki kabane tai, raou. Boni ngkami aika kam a tia n rineaki b'a kam na riki b'a ana ibonga te UEA n angaanga taiani karea.
12Ngke e bane ana taeka Etekia, ao a m'ananga nako ni m'akuri kanoan Rewi ake taani kairiiri aika:
13Maata are natin Amatai te m'aane ao Ioera are natin Ataria te m'aane ake kaain te kaainga are Koata;
14Kiti are natin Aberi te m'aane ao Ataria are natin Iearerera te m'aane ake kaain te kaainga are Merari; Ioa are natin Timm'a te m'aane ao Eten are natin Ioa te m'aane ake kaain te kaainga are Kerition;
Timri ao Ieuera ake kaain te kaainga are Eritaban; Tekaria ao Matania ake kaain te kaainga are Ataba; Ieuera ao Timei ake kaain te kaainga are Eman; Temaia ao Utiera ake kaain te kaainga are Ierutun.
15Aikai taani kairiiri ake a bootia ni kabane kanoan Rewi, ao a bane n nakon te bootaki i bukin kaitiakaia. Ao i mwiina, a moana kaitiakan te Tembora n aron kanoan ana Tua te UEA, n aron are e a tia ni baaireia Etekia.
16Ao a rin i nanon te Tembora ibonga ao a kaotinakoi b'aai aika a aki itiaki. A katikui baikanne ni katawanangin te Tembora, ao mai ikanne, are a uoti nako iai kanoan Rewi ni kaotinakoi i tinanikun te kaawa nakon te M'arua are Kiteron.
17A moana aia m'akuri ibonga ao kanoan Rewi ni moani bongin te moan nam'akaina. A kabanea teuana te wiiki i bukin kaitiakan katawanangin te Tembora, ao teuana riki te wiiki i bukin kaitiakan te Tembora. Ma ngaia are, ni katebwi ma onouan bongin te nam'akaina naba anne
18ao a oki nakon Etekia ao a taku:
Teuae ko karineaki, a bane ara m'akuri. E a manga itiaki te Tembora ni kabane, ao ai uana naba te baonikarea ao taiani b'ainam'arake, ao te taibora naba i bukin te kariki are e tabu ma b'ainam'arakena nako.
19Ao ti a tia ni kaoki b'aai ni kabane ake e anai ngkoa te uea are Aati man te Tembora i nanon te tai are e aki kakaonimaki iai nakon te Atua. Ti kaitiaki ni kabane ao ti katikui i matan te baonikarea.
Te taromauri I nanon te Tembora20Ao e weteia naba ngkekei taian mataniwi Etekia mai Ierutarem, ao a nakon te Tembora.
21A uoti itiman taiani kao, taian tiibu m'aane itiman, itiman taian tiibu teteei, ao itiman taiani kooti b'a taian karea i bukin kab'araan aia bure ana utu Etekia ao kaain Iuta, ao bon kaitiakan naba te Tembora. E tuangiia ibonga Etekia ake ana kariki Aaron, b'a a na karea taian man aikai i aon te baonikarea.
22A tiringi taian kao ni kabane ibonga, ma taian tiibu m'aane, ao taian tiibu teteei, ao i mwiina, a katimtim'a te raraa nako aon te baonikarea.
23A uoti taian kooti nakon Etekia ma taan taromauri, ao a katokai baiia i aon taiani man.
24Ao a tiring taiani kooti ibonga ao a katimtim'a raraaia i aon te baonikarea b'a taian karea i bukin kab'araan aia bure Iteraera ni kabane, i bukina ngke e a kaman anga ana taeka Etekia b'a e na karaoaki taiani karea aikai i bukiia Iteraera ni kabane.
25I mwiina anne, e anganiia nneia kanoan Rewi Etekia i nanon te Tembora. E anganiia taian timbara, aabi, ao taiani b'ai ni katangtang ake taiani karai, ni kaineti ma taian kaetieti ake e a tia n anga te UEA nakon te uea are Tawita ao burabeti ake uoman, Kata ao Natan.
26A tauraoi kanoan Rewi ni katang taian b'ai ni katangitang ake ana b'ai ngkoa Tawita; ao a tauraoi naba ibonga ni katang taian bu.
27Ao ngke e a tia n anga te kanikina Etekia b'a a nang kabuokaki taiani karea i aon te baonikarea, ao a waakina aia anene n nebo nakon te UEA taani katangtang ao a katangi aia b'ai ni katangitang,
28ao a bane aomata n taromauriia te UEA. E reitinako ni karokoa karaoan te angakarea i aon te kabanea ni man.
29I mwiin anne, ao Etekia ma taan taromauri a katorobubua man taromauriia te UEA.
30Ao i mwiina, a anga aia taeka Etekia ma ana mataniwi nakoia kanoan Rewi b'a a na anenei taian anene n nebo ake e a tia ni koroi Tawita ma Ataba are te burabeti. Ao a bobaraaki ao a kukurei n anenei kuuna n nebo nakon te UEA.
31Ao e taku Etekia nakoia aomata, “Ao ngkai kam a manga itiaki i matan te UEA, uoti mai taiani karea ao taian angab'ai i bukin anganakina b'a kaaitauana.”
A karaoi baikai aomata, ao tabeman mai buakoia a anga nanoia ni uoti taiani man b'a ana kareanaki.
32Itingaun taiani kao, tebubua taiani tiibu m'aane, ao uabubua taian tiibu teteei ake a uotaki b'a taian karea i bukin bubutian te UEA;
33Onobubua taian kao ao tenibubua taian tiibu ake a uotaki b'a taiani karea i bukin butian te UEA ana kakab'aia.
34A bon aki tau m'aitiia ibonga i bukin kanakoan kuniia taiani man, i bukina b'a a bon m'aiti taian ibonga ake a tuai reke aia tai n ri nanon te bootaki i bukin kaitiakaia. Ma i bukina ngke a m'aiti kanoan Rewi ake a tia ni kaitiakia, a buokiia ibonga ni karokoa banen kuniia taiani man.
35I rarikin taian karea ake a kabuokaki i aon te baonikarea, ao a kabuokaki naba nenean taiani man ake taian karea ake tabeua, ao a kab'aroaki taian angab'ai ake taian wain i aon te baonikarea.
Ma ngaia are e a manga moanaki kamanenaan te Tembora i bukin taromaurian te UEA.
36A rangi ni kukurei Etekia ma kaain Iuta, i bukina ngke e a tia te Atua ni buokiia ni kariki baikai n te tai ae e waekoa.
Who We AreWhat We EelieveWhat We Do
2025 by iamachristian.org,Inc All rights reserved.
