1N te tai ae e aki maan ngke e a tia Reoboam n taua taekan abanueana, ao e a manga aki ongotaeka iroun te UEA ngaia ma kaain Iuta ni kabane.
2Ma ngaia are, n ana kanimaua n ririki n tautaeka Reoboam, ao e a katuaiia te UEA i bukin aia aki kakaonimaki ao e kariaia uean Aikubita are Titiaka b'a e na buakana Iuta.
3Ao e buaka Titiaka ma ana taanga ni buaka aika te ngaa uabubua aia kanibuaka ao onobwi te ngaa aia taani buaka i aoia aoti, ao ai uana naba ma tautian Aikubita ake a roko mai Ribia, Tukota, ao Itiobia.
4E tauia kaain te kaawa are e buubura are e nonoaki i Iuta ao i mwiina e a manga m'ananga nako Ierutarem.
5A tia ni m'ananga Reoboam ma ana taani kairiiri i Iuta nako Ierutarem b'a a biri nako man ana buaka Titiaka. Ao ngke a mena ikekei, ao e taku Temaia are te burabeti nakoia, “E taku te UEA b'a i bukina ngkai kam aki ongotaeka i rouna, ao E a tia ngkai ni kiitaningkami. E na bon aki buokingkami te UEA ni kamaiungkami man ana buaka Titiaka!”
6Ao a nanokawaki Reoboam ma ana taani kairiiri i bukin te b'ai are a tia ni karaoia ao a boni kakoaua ao a taku, “E bon eti te UEA. Ti a bon tia n tannako mai rouna.”
7Ao ngke e ongo aei te UEA, ao e taku nakon Temaia:
A raraoma ni koaua kaain Iuta n aia bure, ma ngaia are, n na aki kariaia Titiaka b'a e na tiringiia ni kabane. Ma i bukina ngkai e bon maraki naba nanou,
8ao e na bon kataenikaiia ma n tautaekaniia.
Ao ane a na ataia iai au aomata b'a tera aekakin te m'akuri iroun aia uea ianena ao te m'akuri ibuku.
9E buakana Ierutarem Titiaka mani uoti nako b'ain te Tembora aika a kakaawaki ao man te bareti, n reitaki ma ana otanga Toromon ake taiani koora.
10Ao e karaoi otanga aika taiani buraati Reoboam b'a oneani mwiin ake taiani koora, ao e tuangiia taan tei n te mataroa b'a a na tararuai raoi.
11N taai nako ake e nako iai Reoboam nakon te Tembora, ao a uoti taian otanga aikanne taan tei. Ma a manga bon kaoki n taai nako nakon taian ruu n tei ni bon te tai naba are e bane iai te taromauri.
12Ao e tanrikaaki Reoboam nakon te UEA, ai ngaia are, e a aki ni kamaunaaki Iuta ni kabanea ao e a manga mari aon Iuta.
Tautaekan Reoboam i aon Iuta(1 Uea 14.21; 29-31)13Ai tib'a abwi ma teuana ana ririki ni maiu Reoboam ngke e a riki b'a te uea, ao e tautaeka i nanon tebwi ma itiua te ririki mai Ierutarem, te kaawa ike e a tia n rineia te UEA b'a e na taromauriaki iai. Bon kaain Ammon tinana are Nei Naama. Bon te uea ae e korakora Reoboam,
14ma e bon teimatoa naba ni kakaraoa te kaairua ao e rawa n ongotaeka iroun te UEA.
15A bane n tauaki rongorongon b'aai ni kabane ake e karaoi Reoboam i nanon ana tai ni uea, n reitaki ma rongorongon ana utu i nanon aia rongorongo burabeti aika uoman ake Temaia ao Ito. I nanon ana tai n tautaeka Reoboam, ao a uaia ni ibubuaka i marenaia ngaia ma uean Iteraera are Ieroboam.
16Ngke e a mate Reoboam, ao e a taunaki i rarikiia ana bakatibu ake i Ierutarem, ao e a manga uea i mwiina natina te m'aane are Abiia.
Who We AreWhat We EelieveWhat We Do
2025 by iamachristian.org,Inc All rights reserved.
